سلامات يا حلوين
ندى مشتاقووووون ، مشتاقة لفهمك فى بنات بلدي
الجيلي تحياتي الكتيرة
خلينا ننطلق من نقطة ارتكازك الانت بنيت عليها كل ما سبق وهي استنكارك لرجل مثقف يعي معنى الحرية فى تسلطه او تحديده للمرأة فى اختياراتها وكما وضحت لندى فى خصوصيتها اللهو زيها .. تفتكر يا الجيلي فى بلدنا الطوييييييييلة العريضة دي المزدحمة بالعقائد المختلفة والتقاليد المتفحمه هل بنعي لكلمة خصوصية ؟ دي الكلمة الوحيدة المنعدمه فى قاموس البيئة السودانية من أصغر تفاصيلنا لأكبرها ، لا فى بيوتنا وحيشانا ، لا فى تربيتنا ، لا فى قراراتنا ، لا فى زمنا ، لا فى سلوكياتنا .. عشان كدة قبل ما نعي لمعنى حرية وتوزيع الحريات نفسها وتدخلها فى حياتنا لازم نضع اساس لفهم الخصوصية .. حتى الدولة البتعتبر نفسها عبارة عن قادة ومثقفين وسلطة تشريعيه وتنفيذية هي لا تعي لخصوصية المواطن فى إختيار مرشحيه ، ولا فى قاطني مدينته ، ولا فى كسب حقوقه كإنسان ناهيك عن مواطن .. دى نقطة
بالنسبة لما سبق حنلقى نحن الاجيال الاتخرجت حديثا على مناهج الحرية وفهمنا ليها ، فى حالة ضياع بين انك تعتقد فى نظرية الحرية وبين تربيتك على الراديكاليه فى كل شى مثلا تعامل ابوينك معاك ، المدرس فى المدرسة ، اختيارك لقرايتك ، لزوجتك . إضافة لجهجهتنا بين عقائديتنا وبين شعورنا بضرورة التغيير والتحرر ومحاولة تطبيقه فى ارض لا تحتمل ، ولا ترضى ، ولا تستقبل التغيير .. طيب اقول ليك حاجه قريبه من حكاية الزي دي مثلا انا الليلة ملاذ حسين خوجلي لو ما بت سودانية من الجزيرة واتربيت على اصول دينية دة كله قول نسيناهو ما بقدر انفلت من اني مثلا بت حسين خوجلي فى بيئتنا دي .. دة بيعني انه خطواتى وتوجهاتي وتمردي مفروض يكون مؤسس بمعنى ما يكون نشاز ..
الان مثلا ملاذ يطلق عليها متمرده على الحديدة ليه يا الجيلي عشان أؤمن بمعنى الحرية بالفهم الانت شايفه طالما هي حالة خصوصية اي بتعني ملاذ وحدها ،وعلى هذا الاساس اعيش لكن تعال مثلا نشوف نتائج هذه الممارسه ، قصيت شعري بلبس بنطلون ومتحركه من بيتنا بعربيتي وقمت أتعرضت لمضايقه او مشاغله فى الشارع البحصل انه اوتماتيكلي عقلي الباطن بشتغل ، هواجسي بتتمرد ، الاحساس ما بين التقليد والعادة ، وانا منه بينتح .. دة العايزه اقولوا ليك لمن تتربى على منهج وعلى منظومة محددة فى مجتمع فهمه للاشياء ضيق جدا وبإعتبار انه البت سُمعه فى بلدنا اقل كلمة بتطلع بتأثر على اشياء كثيرة جدا فى حياتها ببقى تحقيق الحرية صعب بل احيانا مستحيل لفتيات او رجال لا يملكون جرأءة ملاذ او فلانه او عِلان فى مواجهة النقد وكيفية الدفاع عن النفس ..
لذلك كثيرون بالنسبة ليهم التماشي مع لونية المجتمع ، وتقمص شخصيته دة اريح وأسكن من المواجهه كما جاء فى راي سابق ، ما نوع من الضعف لكن نوع من الاختيار الاجباري لانك ما بتقدر تعيش براك ، ما بتقدر تخسر اسرتك لمجرد انك متمرد ما بتقدر تستحمل خدش الاخر ليك وحكمه عليك بالخروج عن التقليد . إذن نظريات الحرية البندرسها وشايفنها تتمدد فى العالم هي مجرد حلم لدولة شمولية الى حد ما ، فقيرة ، ضخمه من حيث التعدد والاختلاف ، متحجره بالعُرف وإستخدام الدين المتوارث . دى كل القصه
وكل الود
|
