اقتباس:
المشاركة الأصلية كتبت بواسطة Dr. Mohammed Hassan
فارق النيل الضفاف
مات بين حسرة القول الاكيد والاحتمال
برق السحابات الخفاف .
مالت نخيلات البلد
والقيف موسَم بالجفاف
فقدت ملامح خطوها رمل الطريق
ناحت بويتات الفريق
واتوشح الليل الحريق.
ماكنا نحملم بي الزفاف
عاشقين ونيل
فنان نذر دم الكتابة
للمخاليق الفقارى
اتمهر الحرف العصي
واتلزم القافية الجبال.
اترملمت كلمات عفاف
شلتك زمن
سادر نصايص الغربة والسهر العميق
شلتك صبر زاد المسافة البين حداك
ولئامة السفر الصفيق
اتدفق الامل الرهاب
واتناوحت حاجات رهاف
وكتمت في جواي نزيف
لا خل وفي
لا غيمة بتضلل علي ولا رفيق
(نم في دسايس الليل غناك
يا هو النديم الباقي ليك )
والباقي لي كاسا مترع بالزعاف
ياليل اقيف
يانيل اقيف
يا ....
يرجع صدى الحس الموجع بالرعاف
( ياليل اقيف
يا نيل اقيف
ارجع براك
يازول شليق)
الاهة واللحن الكفيف
الموية والكسرة الرغيف
وندواة القصر المبهرج بالبريق
ناحت سواقي الارتجا
لاحت بواقي الامنيات
ضاع الخريف.
نص البيوت اتفرقت
والقمري كان ما بخاف
الا الفزع
عشعش وفرخ في عيون ناسا جهال
الحسكنيت ،
عود العشر
ما انكسر
بس انحشر
والناس تطمبر بي جهل
دخان وشاف
دخان وشاف
عطرابة تسكر لي عقول
كترابة تمسح من عقول
كل القديم من السماح والاعتراف
يانيل اقيف
يازول اقيف
يا كلمة ماتت زي غريق
لازول سمع
لا زول مبصر ليها شاف
|
يا سلام يا دكتور كلمات كبرادة الذهب
وحرف مريش ذرب
سلمت اخي اما النيل والضفاف فنأمل ان يغازلها الربيع
