قاموس المفردات العامية فى اشعار حميد

[أبوبكر عباس]

المشاركة الأصلية كتبت بواسطة أزهري سيف الدين

تحياتي أحيلك إلى دراسة الأستاذ كمال الدين بشير بخاري (حميد، ثروة الشعر وثورته):

ما عارف يا ازهري؟ هل الدراسة الأصلية لكمال الدين أم للقاص والأديب فيصل عباس؟

[أزهري سيف الدين]

المشاركة الأصلية كتبت بواسطة حافظ حسين

(1)
سلام ماريل و ضيوفها.... بالجد دا من البوستات القيمة جداً و تحديد علي صعيدي الشخصي البوست دا أضافة لي أضافات حقيقية, عرفني ببيئة ثقافية كانت بعيدة عني.... شكراً ماريل, شكراً طيبان, شكراَ اسامة معاوية, أسامات, أزهري و حقيقة كل من مر بهذا البوست أضاف لي جديد حتي بابكر عباس .....

(2)
بس يا أزهري انا حاسي ان تفسير الرقم ستة في شعر حميد يعني بلوي الحقايق لوي , و ما بذكرني الا بقصص الاعجاز العلمي في القرأن الكريم أو تفسيرات أهل الباطن.... اتفق مع كتاب المقال أن الرقم ستة أتكرر كتير في أشعار حميد, لكن قبل ما نحكم و نبدأ في التفسير هل فقط في كل أشعار حميد فقط أتكرر الرقم 6 و لا في أرقام تانية أتكررت؟

(3)
و بعدين هل كانت فعلاً الأحزاب ستة؟
ماذا عن الحزب الجمهوري, و الحزب دا كان موجود و مؤثر جداً في الفترة المقصودة, وين الحزب القومي بتاع الأب فليب غبوش, و ماذا عن حزب سانو؟
يعني بالمنطق دا مفروض علي الاقل يكون 9 خرفن و تيس؟
و بعدين الأحزاب السياسية الستة دي ما أقدم من الجبهة الإسلامية , فالجبهة أتأسست سنة 1949م, بينما الحزب الناصري الذي يدعي قبل الجبهة الاسلامية أنه تأسس سنة 1959 بجامعة القاهره الفرع....

(4)
غايتو لو حميد فعلاً قاصد تشبيه الجبهة الاسلامية بالبنت السابعة لام زين, دي تكون كارثة و ما أظن حميد يكون بحتقر المرأة كما ورد في التفسير أعلاه

سلامات يا حافظ

(1)
البوست فعلاً مفيد جداً، وبالنقاش وتلاقح الآراء حتتغربل المعاني والدلالات أكتر وأكتر.

خليني في البداية أثبّت إنو قراءة الأستاذ كمال بخاري يُؤخذ منها ويُرَد، وإيرادا مهم بالنسبة لي لأنها الوحيدة - حسب إطّلاعي المحدود - الإتناولت السؤال الطرحتو ماريل بشكل مباشر.

(2)
ما فهمت قصدك، يعني لو في أرقام أخرى اتكررت معناها تكرار ال 6 ما عندو دلالة؟

(3)
أتفق معاك في إنو تحديد الأحزاب ال 6 المذكورة ما منطقية، للأسباب الذكرتها في مداخلتك.
لكن ممكن يكون لامس الحقيقة بربطو الرقم 6 بالأحزاب، ويكون حمّيد اختار ال 6 أحزاب بناءاً على فهم آخر غير (بقية الأحزاب السودانية وأقدميتها).
أنا بميل لربط الرقم 6 بالأحزاب لأنو فكرة ربط التيس أب دقينة بالحركة الإسلامية منطقية (مع الأخذ بالإعتبار إنو الدقن حاضرة بشدّة في شعر حمّيد)، ولأنو ربطها بالأحزاب بتماشا مع أبيات كتيرة (وردت في مداخلتي الأولى).

(4)
ما أعتقد إنو البت هنا مقصود بيها شي سيئ، خصوصاً لو قرينا الأبيات من النسخة النزّلا أسامات:

أي يا الزين زغرد ما قتلك
بت تام زين جابتلها بت
ست قصاف حتان البت

لاحظ للزغرودة (الفرحة بولادة البت)
والقصاف ( كِجّين الأولاد) 


مع تحياتي وإحترامي

وفي إنتظار إضاءات أخرى حول رمزية (الرقم 6 والبت) منك ومن باقي الأخوة/ات.
...

[أبوبكر عباس]

المشاركة الأصلية كتبت بواسطة أزهري سيف الدين

وفي إنتظار إضاءات أخرى حول رمزية (الرقم 6 والبت) منك ومن باقي الأخوة/ات.

كدي يا ازهري شوف مصالحة بورتسودان بين نميري والاحزاب، كم كان عدد الاحزاب الصالحت (الطهور) فيها؟

[أزهري سيف الدين]

المشاركة الأصلية كتبت بواسطة بابكر عباس

ما عارف يا ازهري؟ هل الدراسة الأصلية لكمال الدين أم للقاص والأديب فيصل عباس؟

سلامات يا بابكر

لو رجعت للصفحة التانية من المصدر الجبتو في مشاركتي، حتلقى انو في اختلاف حول صاحب الدراسة. أكتر كلام منطقي، لقيتو في سوانيزونلاين - راجع مشاركتي في المصدر - بقول انو صاحب الدراسة كمال الدين.
على العموم لو ثبت انو صاحبا الكاتب فيصل بعتذر ليهو وأعدّل مشاركاتي.

تحياتي

..

[البديري]

المشاركة الأصلية كتبت بواسطة ماريل

محمد الحسن حسن سالم

شكرا لك ياختى ..ومن الان سانده علية :"محمد الحسن حسن سالم " كماقلتى لان (حميد) هو الله فقط ، كمثل : عبد الحميد ، وعبد العزيز ...والخ من اسماء الله الحٌسنى .

تسلمى.

الولي الحميد : (وَهُوَ الْوَلِيُّ الْحَمِيدُ) (الشورى:28) الحفيظ المجيد : ( وَرَبُّكَ عَلَى كُلِّ شَيْءٍ حَفِيظٌ )

(النور:25) الْقُوَّيُِّ الْمَتِينُ : ( وَهُوَ الْقَوِيُّ الْعَزِيزُ )

[wadosman]

المشاركة الأصلية كتبت بواسطة طارق صديق كانديك

مع تقديري للاخ ماجداب واصحاب المداخلات التي تلت مداخلته، وحاشاي أن أسلب لأحد حقاً.

لو تتبع المداخلات المقتبسة فوق دي ما تحريك ايجابي للحوار وحديث غير علمي سأتحسس قدرتي على التفرقة بين مجاملة صديق ووجهة نظري.

ويصبح قولك :



تنقصه الدقة.


وانت برضو مع وجدي ، عليك الله اعفي لي

يااخ زغللت عيونا و جننت الاقتباس المتعدد زااتو...

[أحمد طه]

[

شكرا لك ياختى ..ومن الان سانده علية :"محمد الحسن حسن سالم " كماقلتى لان (حميد) هو الله فقط ، كمثل : عبد الحميد ، وعبد العزيز ...والخ من اسماء الله الحٌسنى .

[نغم]

لمشاركة الأصلية كتبت بواسطة حافظ حسين
غايتو لو حميد فعلاً قاصد تشبيه الجبهة الاسلامية بالبنت السابعة لام زين, دي تكون كارثة و ما أظن حميد يكون بحتقر المرأة كما ورد في التفسير أعلاه

الشئ يقولو تيس وسته خرفن - فى القصيدة
صاحب الدراسة قال السته خرفن هى الاحزاب
تقوم ات تسوى التيس خروف وتضيفو كمان لبنات السته و تحسبو بت عديل كدى لام الزين
وتكتب كارثه حسب ظنك انو احتقار للمرأة
دى قريتا كيف
ومن وين جاك الخاطر شان تفكر كده

الدراسة ابانت كيف تصوير التيس حزب الجبهة
ما تورينا كما ظنك فى احتقار حميد للبنات كيفنو كدى - من القصيدة بس


و اسالك بنفس القياس لماذا لم تفكر فى ان الاحتقار فى تشبيه الاحزاب بالخرفان من قبل حميد

تمهل قليلا ثم اكتب ياحافظ عن حميد - حسب ظنك

[البديري]

المشاركة الأصلية كتبت بواسطة أحمد طه

[

يا طه
انا ماعوز اجر البوست لونسة ومهاتارات جانبية لا يستفيد منها القارئ فى شئ! ، البضحكك شنو؟ عشان اصلحو واعتذر أو العكس!.

افتكركلامى واضح!

[طيبان]

سلام للجميع .
أؤكد متعتي الكبيرة كمتابع - لا كمشارك - للعصف الذهني الحاصل في هذا البوست - يا حافظ حسين لفـّـلك سندوشتي من العصف الذهني دي - متعة لا نهائية .

نغم واضح إنّها متمكّنة جدا من لهجتنا ، أعجبت جدا بشرحك لكلمة يشهّل ، في يشهّلنا على الدوام ، ماكنت عارف معناها أبدا ولا طقشت أضاني قبل كدة إلا في هذه القصيدة ..
ما بتهدل فوق خنادق ، تهدل من الهديل ،صوت الحمام ،أظنك كنتي قاصدة الكلمة التانية تقدل في ولا بتقدل فوق حطام ..وللا ماكدي؟

يا أزهري أنا والله زي حافظ حسين أخوي دا ، ما أقنعنتني أبدا دلالة الرقم ستة وفق الدراسة المنشورة ، ياخي دي مجرّد لتـّيق لفكرة دارت برؤوس أصحابها ، لماذا لم يتبيّنوا مراميها من حميد وحميد كان بيننا إلى وقت قريب ، القصيدة فيها ترميز قريب ،تشفير علي خفيف كدة ، المشي للبعيد بيعقّد شعر حمّيد ، وحميد جمال شعرو في بساطتو ،وعمقو .هذا رأيي .

وقفة تانية في موضوع طهورة راشد :
فجأة كدة انتبهت لقول ست الدار :
شهر اتنين ح نطهّر راشد
شهر اتنين المدرسة تجّز .
المدرسة دي مافي أي شي يدخّلا هنا لو راشد ما كان في المدرسة ، وح يطهّروهوا في الإجازة ، ويا أسامة معاوية راشد عمرو كدة تمانية سنوات تقريبا ماهن ستّة ، راشد صبي ،وماهو طفل ..أمانة ما بيفرز رقيص الشوق .

__

يديكم العافية جميعاً .

[شهرزاد]

المشاركة الأصلية كتبت بواسطة نغم

الشئ يقولو تيس وسته خرفن - فى القصيدة
صاحب الدراسة قال السته خرفن هى الاحزاب
تقوم ات تسوى التيس خروف وتضيفو كمان لبنات السته و تحسبو بت عديل كدى لام الزين
وتكتب كارثه حسب ظنك انو احتقار للمرأة
دى قريتا كيف
ومن وين جاك الخاطر شان تفكر كده

نغم ..
سلامات ومساك طيب
كلنا متفقين إنو حميد في قصايده بتكلم بلسان حال مجتمعه وبيئته بكل ثقافته ومفاهيمة وعاداته وتقاليده زي ما بتقمص شخصيات قصايده بالضبط وبعيش فيها .
يعني حميد حتي لو عايز يقول إنو ولادة البت ولو بعد ستة اولاد ما مفرحة أو شي عادي فهو بعكس حالة وفكرة المجتمع ليس الا ودي يمكن حقيقة لي يومنا هذا الناس بتفرح بالولد أكتر من البت .
طبعا ده بعيداً عن موضوع الأحزاب وتسيس الفكرة الحاصل في القصيدة .

ببساطة ياحافظ عايزة أقول ليك إنو حتي لو كانت دي فكرة حميد في القصيدة فهي ما بتعني أبداً إنو حميد بحتقر المرأة أو بقلل من شأنها هو بس بتكلم بلسان حال مجتمع دي فكرته أصلاً قام هو بإستخدامها بزكاء في توصيل فكرة تانية مختلفة .

[طيبان]

المشاركة الأصلية كتبت بواسطة البديري

شكرا لك ياختى ..ومن الان سانده علية :"محمد الحسن حسن سالم " كماقلتى لان (حميد) هو الله فقط ، كمثل : عبد الحميد ، وعبد العزيز ...والخ من اسماء الله الحٌسنى .

تسلمى.

سلامات يا البديري :
يا أخوي متين الله بقى اسمو حمّيد ؟ الأسماء الحسنى دي عملوا ليها أبديت بي ورانا وللا كيف ؟

حمّيد بتتنطق HIMMAID حاء مكسورة وميم عليها شدّة وياء ساكنة ودال مابعرفا عاملة شنو ..أها ناس البلد زي ماقال أحمد سليمان بيلقـبّو تقريبا أي زول اسمو محمد الحسن بي (حمّيد ) .

انت زمنك دا كلو ما لاقاك زول نطق قدّامك اسم حمّيد دا ؟ تقوم تسوّيهو (حميد ) وتسرح في الأسماء الحسنى ؟
ياخي قول اسمو حميد مجيد المشكلة وين ؟؟ ما تراهو أخوك (حافظ حسين ) دا اسمو حافظ - بلا تشكيل - ماهو من أسماء الله الحسنى ؟ مالك ما جيت اعترضت ؟
__

بس ما كسرن لي خاترك من هني ولا قدّام انطق اسم حميد كامل عشان ما تؤثم .

[البديري]

المشاركة الأصلية كتبت بواسطة أحمد طه

[

اوع تتحرفن..وتقول حميد مازى الحميد! وتلعب بلبلاغة العربية ومفرداتها!

[البديري]

المشاركة الأصلية كتبت بواسطة طيبان

سلامات يا البديري :
يا أخوي متين الله بقى اسمو حمّيد ؟ الأسماء الحسنى دي عملوا ليها أبديت بي ورانا وللا كيف ؟

حمّيد بتتنطق HIMMAID حاء مكسورة وميم عليها شدّة وياء ساكنة ودال مابعرفا

نحن فى السودان ولا فى دوله لاتنية ؟
يا طيبان

[طيبان]

المشاركة الأصلية كتبت بواسطة البديري

نحن فى السودان ولا فى دوله لاتنية ؟
يا طيبان

انا غايتو ماعارفك انت وين , لكن بالنتيجة الطلعت بيها من اسم حميد دي ، عادي ممكن تكون في شيلي .