الله يمسخكم يالمسختو القمر الصناعي ..

[nezam aldeen]

يمسخكم دي بكل التشكيلات ....
هي الاساس فتح الميم المامفتوحة وكسر سنون السين ...
بس
ممكن بدل تشرد الميم في دول المهجر تسكنوها ..
وتفتحو السين بدل كسير السنون ...

[nezam aldeen]

ال1
بعد مايخلي (الأرض) البرتقالية المغبرة دي
ويشوف ليهو حتة يملأ جيوبو الأنفية دي هوا نقي بدل كتاحة السودان
كتحه الله بموية نار من بنشر في جهنم
بصلحو فيهو العربات البتوصل سكان وادي اووب
وبعد مارقبتو تنملي خطوط وطبقات طين من عرق المواصلات
اصلو في الحافلة لاتعرف تفتح الشباك تنضرب كتاحة
لاتعرف تقفلو تنفسخ ذي انفساخة كيت والو اطي البطران داك

[nezam aldeen]

وبعد ماينزل من الحافلة
وركبو من ضيق المقاعد تكون انصبت
تستلمو ليك الشوارع بالمدافرة من ورا وقدام
دا كان ماأتنشلت باقي الجنيهين القاصيهم بالحناسة
وبعد داك تجي ماشي تكنكش في كراعك اليمين
شافعة الله تديني الرسول تديني النبي تديني ابن ابي طالب تديني المك نمر تديني الأزهري تديني
‏
تحلفك بي كل سادة الطرق الصوفية والحريرية والدمورية والهجرة والتكفير
‏
الله يدينا ويديك .
لااااا
لا وتواصل تشحدك خمسمية الفطور جنيه العلاج وألفين ابوي
ولسة تلقاها مكنكشة في كراعك
لاتقدر تديها حق مواصلاتك لاتقدر تقنعها انو ماعندك
بس معقولة زول في نظرها شايل موبايل
وراكب مواصلات
وماعندو خمسمية
وتزييييد كنكشة علي كنكشتها
في ناس بهددو
تلقاهم يكوركو:
ياميتين ماعندي بديك شلوت افجخ ليك راسك دا بالعمود دا فكيني .
بعد داك إحتمال تفكك وتديك لفظين كدة يريحنك في حنانك
او تصر ليك ووشها مصرور ووسخان ومقضي ومدمع وفيهو باقي برآة جاية من
مراية كافتيريا بتكشف فيها
هناك يمكن قلبك يرجف حبتين عشان خلعت البت وخوفتها بي فطيس راسها في العمود

[nezam aldeen]

تمشي حبة تلقى في 60 واحد خاتي قدامو ميزان وقاعد

ها اوزن نفسك وراعي صحتك يا
ميتين جنيه اوزن نفسك يا
‏
ياخ اوزن نفسك ؟
وتحتار هسة الناس ديل قعادهم في الشمش قدام موازينهم دي اليوم كلو بجيب ليهم قروش ؟؟
يعني خلااااس السودانين بقو من عدم الموضوع لامن يوزنو روحهم كل يوم ؟
وقول ياخ الناس ديل جت وزنو ياخ
بتتقسم الميات علي 60 ميزان دي كيف
كمان ماتقولو جابو ليهم كنتة جديدة :
اسمع يا اوزن روحك وكان فايت اقل من 50 كيلو جرام بنديك جنيه
والطير ديل بس يسمعو بالكيلو جرام دي وقايلنها حاجة كبيرة
ماعارفين شوال الفيني بطلع 200 عيشة في الفرن البلدي
تركب الماسورة وتوزن روحك تلقى روحك 701
لاتعرف تدفع ميتين جنيه لاتعرف تدي الميزان شلوت تكسرو عامل كشبو دا ؟
ميزان والا ركشة منورنو كدة

[nezam aldeen]

وتمشي قدام حبة تلقى الشحادين مرصوصين اكتر من الناس البيبيعو ملابس داخلية على الهواء مباشرتن
يااااالخجلتك ياخ
دا شنو البتبيع فوقن ديل ؟
وفي ناس بيشترو كدة الحاجات دي في السهلة ساي ؟؟
والغريبة قالو اكتر تجارة مضمونة البيع والربح
اما حكااااااااية
‏
المهم تلقى الشحادين مرصوصين ليك في الشارع
وكل واحد بيتفنن في إظهار بطاقته التجارية
التلقاهو مشتح عشان يوريك اطراف اصابعينو الكلها واحد
والبتلقاهو مادي يدينو وبهن من البهن مابهن
غير الناس الشداد ونصاح وقاعدين
كل الكنتة في انو ال1 يلف كراعو بي كيس اسود ويكشح فيها باقي عصير منقة
الضبان براهو برخص ليهو
‏
‏
قدام حبة بتلقى الشحادات الحريم
وديل امرهم عجيب جدن ياخ
عندهم قدرة على القعاد بصورة تحيرك
وعندهم قدرة على تحمل الشمش بصورة تشككك في انهم ناس تبخ
لو ماأشكالهم المحروقة بشمس الله ونار الناس دي
وتلقى 1ة خاتة في راسها ودرجة الحرارة 50 خاته في راسها كرتونة جزمة نظام سايد كاب وكدة
ولو قلت ليها نشتري لي طاقية تقوليك جيب قروش الطاقية
الطاقية دي توقف الشغل يازول

[nezam aldeen]

تمشي حبة تلاقي عطشومية محل عصير
واروامية كافتيريا ...
ياخ شعب تقول فاطمنو بي رملة
دعايات التلفزيون جت عصاير
والشارع كلو عصاير
والكوش كلها كرستالات
المجانين ذاتهم خلو لقيط الأكياس وبقو يلقطو كرستالات
العرديب 500
الليمون 500
البرتقال 500
المنقة 500
‏
يلا ياماشي تعال غاشي
يلا يازهجان شكلك عطشان
يلا ياالبتدافر في الخلاطة عافر
الراحة في البراحة
والسكر في عصيرنا
‏
‏
والناس تشيييييل وتشرب لابتعرف دا سكري لابتعرف دا سرويس

[nezam aldeen]

دا كوم والمواصلات كوم تاني
حاجات عجيبة خلاس
الساعة 9 صباحن في الموقف بتلقى الحافلات واقفة مالية الموقف
ومدفقة بي برة في الشارع وتلقى بداية الصف في الموقف
وآخر حافلة في اول محطة
‏
اما الساعة 2 ضهرن فبتلقى الموقف اباطو والنجم اللهم إلا من عربات الموز والدرداقات
‏
والناس زهجانة وبتسبسب والناس بت سبسب وزهجانة
‏
ولو كان يوم ذي يوم الليلة دا مغبر
أيييييك
ياخ بتعرف شناة السودانيين دي جد جد
غايتو يوم القيامة كان بتقومو بي حالتكم دي
الله يبعثني مع خواجات مسلمين ياخ

[مهند الخطيب]

اقول ليك حاجة، واصل ولمن تصل الشماسة بجيك .............

وحدد البوكيت بالله

[بابكر مخير]

محي الحبيب
بوستيك دآ حقهو تهديهو لي ناس السياحة
وعنوانه يكون:
"زورو بلدن ما ليهو شبيه"..
بينوبك سواب
الأجر ما ترجهو
بعد (الضرايب)
الضريبة بتخلي خشمك ملح...
ما كلهو بقآ مالح والسكر، على قولك بيجيب السُّكْر..
"شكلناها عشان ما يقولوا سْكْر"

[nezam aldeen]

المشاركة الأصلية كتبت بواسطة الرباطابي

اقول ليك حاجة، واصل ولمن تصل الشماسة بجيك .............

وحدد البوكيت بالله

‏
اوووو الرباطابي
ياخ الكلام دا ماليك ياخ
دا للناس التلقاهو ال1 جزمتو نضيفة وكفيلو عندو دين
كفيلو دي لو في البلد الفريزر والناسها تشته السمك لحمن بكون الله
وكان عند الإرهابيين ديل بكون اب دقن
المهم تلقاهو مرتاح وماعندو أي هم ولاغم ولامشكلة
كان صلى الله يقبل صلاتو
وكان سكر يسكر سكرة محترمة
وبعد دا يجي ينق نق في القمر الصناعي ويتجدع يعمل ليك فيها جون مارثون
ياخ الله يصقعك في بقالة في سوق 6 جمب كوة سمك
يملاك المشاكل الكايس ليها دي
لامن روحك تطلع
ونحنا ال1 كان قعد يتوضأ تجيو كفوة تخليهو يسب دين الإمام الغزالي ذاتو
وكان مشى لي ميري ماتطفي الشمعة
‏
طبعن قصة ميري تطفي الشمعة دي بجيبها ليك تشوفها
ماطالعة من سياقنا دا

[nezam aldeen]

المشاركة الأصلية كتبت بواسطة الرباطابي

اقول ليك حاجة، واصل ولمن تصل الشماسة بجيك .............

وحدد البوكيت بالله

قصة ...
ميري تطفي الشمعة ...
‏
الليّل ، في مدينتي التي تنام منذ السابعة ،
حزن يتدلى بحبال ، يُرخي سداوله السوداءْ لتخرج المواجع القديمة ، وما أكثرها، من انفاق الذاكرة لتلتف حول عنقي خانقة ،تقفز فوق صدري المنهك بالهزائم ، ثم تغرز مخالبها في جبهتي فتدمى بلا دماء، يهرب الهواء من المكان ، فأنهض صارخاً من فراشي الذي رافقني لتسع سنوات مضين ولكل سنة جرح في الدواخل ، عليه نمتُ وتقلبتُ مع أجساد البائسات اللائي يأتينّ في مواسم الحصاد ، واطفالهنّ في سلّات على الظهور ، مأخوذات بالمدينة ،عليهن رائحة دهن القرى الغائرة في الرمال ،غليظات الصوت ،قاسيات غير انّ خمسُ جنيهاتٍ وإبتسامة صامتة، كتلك التي يتقنها التجار، كانت كافية لإقتيادهنّ طائعات إلى البيوت المهجورة ليرمينّ على الارض أثوابهنّ ذات الالوان الصارخة فيتدحرج التجار عراة فوقها، ميري - والتي حملها ،من قوقريال الى حيث تقيم ، لوري ودالحسين تصارع عجلاته الوحل قبل ان يصير ملاذاً للقطط ، وقبل أن يأتي المهاجرون من بسطام - لم تثر حماس الرجال العطشى ، فلم يحاولوا إغرائها ، فقد كانت كبيرة في السن مشوهة الملامح ، ويقولون ان المانع شيئ آخر، لكني ، تحت اعواد النيم التي تسقف بيتي ..
الآن، مخنوق، مخنوق، تدور عيناي في ارجاء الغرفة تبحثان عن منفذٍ للهروب ، اغادر المكان، ألملم أشيائي من على المنضدة ثم أحشرها في حقيبتي الجلدية المهترئة خارجا تسري الى أذنيّ وقع أقدامي على رصيف الشارع المتسخ بروث الحمير والابقار التي يقتحم بها الرعاة مزارع النائمين في أحضان النساء، أطلق صفافيري في افق الصمت ، الحوانيت والمطاعم مغلقة، و الارض ليس عليها ثمة خبز او خضار، فمنذ ان كشر الجوع انيابه صار الاكل من القمامات شيئا لا يجلب الارتياب ، فواصلتُ المسير غاضا السمع عن بكاء الامعاء،


" هل الدنيا قيثارة تعزف ألحان الخلود لغيرنا ثم تبكينا ؟".


هو السؤال الذي قفز الى ذاكرتي يوم وجدنا صديقي ، بعد ثلاث ليال من البحث ، معلقا في سقف حمام ، رأيناه فبكيت وحدي ، دفناه والامطار تعانق ارض المقبرة، ثم عادوا يغمغمون ،


"هكذا ينتهون".


" لو ما عصى ربه لما انتفخت جثته كجثة الثور".


" ليت الناس يتعظون".


كهوهوة الكلاب التي تتبعني في الازقة حتى دخلت بيتها الذي تحيط به اشجار المسكيت كشارب غجري ، على السرير، كما ظلت تفعل لعشرون عاما ، ترقد مكشوفة الساقين تعيد .....
(اها ماشة كيف ياعمك نتمها ليك والا كفاية )

[nezam aldeen]

المشاركة الأصلية كتبت بواسطة بابكر مخير

محي الحبيب
بوستيك دآ حقهو تهديهو لي ناس السياحة
وعنوانه يكون:
"زورو بلدن ما ليهو شبيه"..
بينوبك سواب
الأجر ما ترجهو
بعد (الضرايب)
الضريبة بتخلي خشمك ملح...
ما كلهو بقآ مالح والسكر، على قولك بيجيب السُّكْر..
"شكلناها عشان ما يقولوا سْكْر"

‏
بابكر مخير
إزيك يازول ؟
‏
بعد كل هذه المعاناة في الشارع ..
وطبعن لسا مابدت معاناة المواصلات
ودي معاناة من نوع ابو كديس
ابو كديس دي جاية من حجار البطارية ابو كديس ديك تتذكرها ؟
المهم
ال1 يصل بيتو
وبيتو دي مجازن طبعن
يصل يرتاح يقول يديها نومة الجمرة الخبيثة تطقو ليك تريحو من الشد العضلي
كان عندو مرة والا كان عندها راجل نقناق بس مجبور علي عدم الفراق
والا معرساهو الظروف
‏
الأهم
بعد خلاس يقنع من خيرن في ال واطة
آخر حلولو انو يطلع القمر الصناعي
‏
إتخيل معاي زول يومو ذي ملطم الخرصانة
وحياتو ذي الجركانة المقدودة
وعيشتو ذي فرشة المكسورة
‏
يدقها مشوار للقمر الصناعي ويلاقيهو زول يطمم بطنو
ذي دا تسوي ليهو شنو ؟
لو برضى يجي معاي يومين بيرجع شفيف صدقني

[ود الخير]

المشاركة الأصلية كتبت بواسطة محي الدين عوض نمر

ال1
بعد مايخلي (الأرض) البرتقالية المغبرة دي
ويشوف ليهو حتة يملأ جيوبو الأنفية دي هوا نقي بدل كتاحة السودان
كتحه الله بموية نار من بنشر في جهنم
بصلحو فيهو العربات البتوصل سكان وادي اووب
وبعد مارقبتو تنملي خطوط وطبقات طين من عرق المواصلات
اصلو في الحافلة لاتعرف تفتح الشباك تنضرب كتاحة
لاتعرف تقفلو تنفسخ ذي انفساخة كيت والو اطي البطران داك

ياود نمر لو قلت ليك الكتاحه العندكم الليله في الخرطوم
عامله فينا عمائل في أوربا ما حاتصدق!!
اكتب ليك وانا فارش لي فرشه في المطار
لان الشخص المفروض استقبله طيارته ما أقلعت من الخرطوم
بسبب الكتاحه شفته كتاحتكم قويه كيف؟


بعيد من الكتاحه
عندك علاقه بنمور الحلفايا

[ابومشكاة]

سرد رائع
ومتابعة لصيقة
واصـــــــــــل

[جيجي]

سلام يازول
ابكي... اقصد
اكتب وجيب كل الوجع برة