يااااااااااااااااااه ألوحده قاتله

???

[أبومناهل]

المشاركة الأصلية كتبت بواسطة جميلة

وقتها حسيت بي الم فظيع وفكرت في أمي وفي المستقبل
هل ممكن يجي يوم ويشتكو امهاتنا او ابواتنا من ألوحده؟
هل الجيل الجاي حيهتم بالاحاسيس والمعاني الاصيله الزرعوها فينا اهلنا
ولا حتكون حاجه ثانويه وما مهمه بالنسبه ليهم؟

بنت العم جميلة . .
أبائنا وأمهاتنا في مدى قريب منظور
لا خوف عليهم فهذه التغيرات من الصعب حدوثها في فترة وجيزة . .
ولكن فعلاً الخوف على القيم والمعاني الأصيلة في الأجيال القادمة . .
ولا أعتقد أن هذه القيم ستزول من تلقاء نفسها . . ولكن في ظل
تسارع إيقاع الحياة وإرتفاع القيمة المعنوية للزمن نتوقع أن
تضعف الروابط الإجتماعية شيئاً فشيئاً . . حتى تقتصر على العلاقات
من الدرجة الأولى فقط وحتى هذه ستكون في حدود ضيقة جداً .

[عبد الوهاب هنداوى]

يا جميلة لك الود
اهلنا العرب قالوا ( البتزرعوا بتحصدوا )
ودمتى بس انتى تزوجى وانجبى وربى زى ما اهلك السودانيين ربوك
وبعد ذلك ح تعرفى انو اهلك ربوك التربية الطيبة .....................!
........................................هنداوى

[أبو خليفه]

سلام ياجميله

والحمد لله نحن السودانيين الحاجه دي ماعندنا أو نسبتها ضعيفه جداً يعني تلقيها في بعض الأسر الفيها خلل ترابطي ناتج من تباعد الأب والأم (مثلا) لكن حتي دي نادره
والله لا ورانا زمن زي ده
لكن !!!! أطمئني ياجميله برضو الدنيا لسه بخير طالما الواحد بلقي ليهو زول يفضفض معاهو ويبثو همومو

[عكــود]

[media]http://sudaniyat.net/upload/uploading/radiannak.wma[/media]

[align=center]عـــافــيـــة مــنــك وراضــيــة عنــك سـو رضايـا
ومـــا بـيــخــــيـــــب الـرضــا والـدتــو يـا جــنـايـا
أنت مـن يـا دوب صـغــيـــر مـن زمان دايماً مـعايا
أنــت ديـمـه أمـامـي سـايـــر مـا بخـليـك بـي قـفايـا
ما بتغيب من عيني لحــظـة ولا حصـل سبتك ورايا
لا من الله يشيـل أمانتوا أنا بـبـقي خاصاك بالرعـاية
ليَ يــرعــاك الـبـيـــرعـي لـيَ بـيــك يبـــرد حشايـا
أصــلـك أنــت هـديــه مـنـو والله بـيـك أجزل عطايا
جيـتــنـي واحـد مـالـي تــانى رحمـه في آخر صبايا
قـبــل مــا أفــقــد قــدرتـي وقـبــل مـا تنـهـار قـوايـا
جيـتـنـي ذي بــدر منـور وفجـأة طلـيــت فـي سمـايا
انـت لــمـا خـلاص كـبـرتـا دار تسيبني أعيش برايا
دار تـفـارقـني وتـسـافــر والـحــزن يصـبــح جـزايا
كيف يـهـون لك تحـزن أمـك شـان تحـقـق ليـك غاية
كان مسـافـر شـان عـلاجي بـلـقي في شـوفتـك دوايا
وكان عشـان تـســقـيــنـا نهـلك نحـن بي حنـك روايا
كان عشـان كــرعــيــنـا راحـل نحن بي بـعدك حفايا
كان مهاجـر شــان تـعـرس خـيـر أبـوك مالي التكايا
خـيـرو وافـر أبــوك يحـمـدوا مراحو مليـان بالسعايا
وبالـقروش الجـيــب مـجكن ولسه برضو الجايا جايا
بـرضـي مــنــك مـا بـقـصـر بـحـفــر أديـــك المعـايا
كــان ده كـلــو كـمــان شُـويّ بـتلقي في دهبي الكفايا
أصـلـي مـن ســويـتــو نــاذرا إبـقـي لــي أيـام قسـايا
خـاتـــا للــزمــن البـعــانـد لـي سعــادتــك يــا عشـايا
أنـت مـن شبـيـت صـغـيــر راسـي مـا بتحتاج وصايا
مـا حـصـل خيـبـتــا ظـني ولا فشــل فيـك زين غنـايا
لا تسـيـب أمــك تـهـاجــر يـمـه محـتـــاجــي الحـمايا
لا تسـيـبـني وراك تـرحـل إنـت يـاك ضُـلـي وضرايا
أنـت فـوق الـحـوبــة مـقـنــع إنـت للـمـكشـوف غطايا
دايري مـنـك تـبــقـي جنـبي . جنبي في فـرحي وبلايا
دايـري كـان قحـيـت اتـبـنـك ارفـع اقـســمـلـك غـتـايا
أنت سـاعـة تـبـقي جنـبـي تـبـقـي ضُـلــي وتـوب قفايا
ومـا بخــاف ظـلـم الـلــيــالي وأنـت يــاك عكاز عمايا
دايـري أقـضـي عـمـيـري جنـبـك أصـلو قارب للنهايا
خـايـفـي كـان ســافرتـا ترجع تلقي فـاضي البيت بلايا
حـيـنــا مـا بتـنـفـع قـروشـك وما تجـيــب لك أم سـوايا
مـاني عــارفـي سـبــب رحـيلك يـا وليدي شنو الحكاية
إلا تبـقي بـــراك شــايـف فـي فــــراق الــوالــدة غـايـه
ما بعاتبك وما بلومك لو رحلت بلـقي في الأمثال عذايا
عـلـي حـجــر دايـمـاً قليـبـك وقليـبـي كـله عليـك جنـايا[/align]


موضوعك جميل يا جميلة
وقد غنّت الأم هنا خوفاً من الوحدة القاتلة
ربنا يرزقنا برّهم
حتى يبرّنا أبناءنا
فالبر يورّث
تماماً كما العقوق

لك الود،


عكــود

[قمر الزمان]

جميلة العزيزة ..

الإسلام فعلا نعمة ..

عشان الواحد لما يشوف التفكك الأسري والضياع عند الغرب بحمد ربو انو هو مسلم
لكن في المسلمين .. من لا يكرم أبويه و يلقي بهما في دار المسنين و العجزة
وللأسف الشديد..
ينسى انه كما يديـــــن يــــدان ..
وحتمر الأيام و أولادو حيعملو فيها نفس العملو في أبويه ..

عشان كدة جميلتي لا تخافي ..زي ما قال أخونا هنداوي .. البتزرعو بتحصدو ..
أزرعي خير و حب .. و حتجني خير و حب..

يومك سعيد

???

???

[اشجان البـــ الحديقه ـــت]

فى البدء اشكركى على هذا الموضوع
الوحيدة صعبة بالزات لما يكون ليك اولاد وما يسأو عنك
احساس فظيع جدا ما اقول ليك بالرغم ما جربتو بس شفتو فى عيون ناس كتيرة
وبقول ليك ما تخافى مادام الحاجة مزروعة فى الشخص من هو صغير
وجارية فى دمو صعب يتخلى عنها
ودمتى بخير

[haneena]

الأخت جميلة
تحياتي

مثل هذا الموقف جعلني أواصل كتابة يومياتي ..إمرأة في الزمن الصعب (2)
بعد إنقطاع أكثر من سنة كاملة
هذه هي مقدمتي..

صباح بارد من صباحات لندن...في طريق العودة من العمل بعد سهرة شاقة
شبه نائمة ..فجأة صحوت علي صوت يحادثني...
Iam going to the Dentist
Iam having my teeth done
(ـأنا ذاهب لطبيب الأسنان لمعالجة أسناني_)

تنبهت كل حواسي....و نظرت إليه...رجل في حوالي السبعين أو يذيد
رديت عليه بابتسامة
Are you???good luck then
(_حقآ؟؟ حظ سعيد_)

إبتسم الرجل بعرفان و رد...
Thank you
و مضي كلانا في طريقه


يا الله....رددتها مرات
الرجل وحيد و لا يجد من يكلمه بلا شك
و يبدو إنه سعيد جدآ بأنه وجد من يستمع إليه ولو لدقيقة واحدة في هذه البلاد الجافي أهلها
و بعد أن كنت أمني نفسي بنومة هنية, جافاني النوم

نعود..

الرابط..
http://sudaniyat.net/vb/showthread.php?t=801

هو العقوق أحيانآ... و الإنشغال بأمور الدنيا في بلاد قاسية

تعرفي..بجد أخاف على مستقبلنا و على مصيرنا أن يصبح مثل هؤلاء بعد تغير ناس بلدنا
و ان ننتهي يومآ ما في بيوت العجزة يراعينا من لا يحمل لنا أي نوع من العواطف و تنكشف عوراتنا على الأجانب

يا إلهــــــــــــــــــــي

???

???

???

???

???