شنو الوداك بالعشراب..... يا اصلة!!!

[Hassan Farah]

عبدالمنعم العوض 6مارس2014
أصلة تروع المواطنين بمنطقة مروي وتستنفر وزارة الدفاع

الأصلة

شنو الوداك بالعشراب
كايسي الحن؟
مكمسدة يا اصلة الجن
وكم عكاز علي راسك
وكم فرار علي نصك
وكم طوريي فوق ضنبك
وضباحك يسن و يسن
كايسي الحن؟
شنو الوداك بالعشراب
ما خلوك اندسيتي في الورتاب
ولا تركوك في الهباب
يا الجابوك بالواتساب
شنو الوداك بالعشراب
من وين جايي؟
ما سميتي
لا كوركتي لا نريتي
لا كاتلتي لا عضيتي
قدر ما قلتي واترجيتي
ماخلوكي يا الكتلوكي
في العشراب
شنو الوداك بالعشراب
كمان فضوحكي في (الواتساب)
ما ستروكي
من وراء بي حذر رفعوكي
ضكر انتايي ما خلوكي
يا الهجموكي
بالحصا والحجار رجموكي
من كاس المنية سقوكي
يا مسكيني وينو اخوكي؟
والدابي الكبير يا ابوكي
كيفن هملوك خلوكي
لامن تمشي بالعشراب
تبلعي في الصبار والطير
وفي بطنك لقو ال ك ل ب ة
حق الناس مولعبة
عليكي الحالة كيف صعبة
وثبتي الوثبة فوق وثبة
وكيف مندغمة بالوثبة
يا الطعنوك بالحربة
نامن جيتي منقلبة
وشرط بطنك جنا العشراب
شنو الوداك بالعشراب
قالوا نقبله القبلي
ونكبر في ثبات وامان
ونضبحها جخ
حلال وضمان
ونسلخها بي رفق واحسان
اوعكن الجلد ينقد
وختوه اللحم كيمان
نقسم منو للجيران
عديراب ناس رباط وتويدي
وندس باقيهو للضيفان
وندبغ جلدها الغالي
خاتين القرض كيمان
بخيتة الحال
شنو الوداك للعشراب
وهناك تبكي الدوابي تنوح
امكي ابوكي ده المجروح
قالو صغيري مالي السوح
ويا النبي نوح ويا النبي نوح
ان جوكم يشيلو التار
ويا ستار ويا ستار
من عضة دبيب فرفار
عاد وين تمشو يا العشراب
تعصري وتجري بالواتساب
كتي تزوغي بالفلوكة بالعيراب
شنو الوداك للعشراب
وبعد ما كل شي شحشح
واللحم الكتير بابح
وفي الاعلام خبيره رشح
قام حامي الحمى صرح
دفاعنا البنظر صحصح
اوامر صح
تقوم القوة من مروي
تشيل كل السلاح ترررح
منظومة دفاع وهجوم تتبحبح
تموينات وتعيينات
نفاسات ودبابات
مأكولات ومشروبات
قواصات وفرطاقات تندحدح
عشان سودانا مستهدف
ولاسرائيل بقينا هدف
والاصلات من اسرائيل بتتسلح
والجبخانة فوق الاصلة قالت تح
وبقت تتبكي تتوحوحوح
سوت حيلة همدت همدة
ما ماتت
بشيش زاغت
وبي عند الحفير فاتت
وقام اعلامنا يتبجح
كتلناها وضربناها
نهيناها وهزمناها
وخطب ريسنا واتنحنح
لبس برنيطو وإتشوبح
وصهل ..... ينبح
وين ناس الضرايب وين؟
لحم للصادر!!
الجلد السمح للدين!!
وصهل ينبح... وصهل ينبح
وعقلي سرح
بحبك وأزهريك ما مات
بعز عازه الهواها فرح
ابابي عليها بالغنوات
وانضم بي غرامها سبح
فداك ارواحنا في الجايات
بي دم غالي نتوشح
على وعدك بنمحى الفات
نعيد حزن الليالي فرح
شنو الوداك بالعشراب
ما كان تمشي بي نوري
تشردي وتركبي اللوري
بدل تتفضحي في(الواتساب)
شنو الوداك بالعشراب

عبدالمنعم العوض 6مارس2014

http://up.nilelove.org/uploads/1395035197.mp4