جدادة مزمل !

أحمد طه · 31-03-2015, 08:34 PM

صديقي مزمل الذي لم أره منذ سبع و عشرين عاماً اتصل علي ذات مساء و أخبرني أنه سيصل لمدينة كريمة الليلة في مأمورية ، و أنه سيأتي للمبيت معي في المنزل .
سررت جداً بهذه المفاجأة ، و مرّ بخاطري شريط من ذكرياتِ أيامٍ و أحداثٍ عشتها معه في الديم و حلّة الحجر ، و يا لها من أيام !

أتراه ما زال يهيم حباً ب (رباب) و ينتظرها في محطة باشدار صباحاً حيث يقلّها الترحيل إلى معهد الكليات التكنلوجية ؟

لا شك أن رباب قد تزوجت منذ زمان و أصبحت أمّا رائعة ، فمثل ذلك الجمال لا يجلس في كنبة الانتظار .

أما مزمل فقد بلغني أنه قد تزوج من إحدى فتيات البني عامر و أنه قد طلقها بعد أقل من عام من اقترانه بها ، ثم لم يتزوج مرة أخرى .

يا لحظه العاثر !

عند التاسعة مساءً اتصل بي مزمل ليخبرني أنه ينتظرني في الموقف المقابل لمستشفى كريمة ،
فذهبت إليه على عجل ،
و رأيته من على البعد وهو يدخن سجارة و حقيبته أمامه على الأرض ، إنه هو كما عهدته ، لم تغيره السنين إلا قليلا .
(تقالدنا) بحرارة حتى انتبه من حولنا لضجيجنا و صخب انفعالاتنا ، و من ثم ذهبت به إلى المنزل
حيث انثال بيننا شلال من الذكريات الحميمة ، و بعد فترة من المؤانسة الممتعة اقترحت عليه أن يزيل وعثاء سفره بحمّام منعش ، ففعل .
و انتهزت أنا هذه الفرصة لتدبير عشاء يليق بضيفي ، إذ كانت زوجتي مع والدتها المريضة في تلك الليلة.

ذهبت إلى السوق على عجل و احضرت دجاجة مشوية و بعض المخلل و رجعت إلى المنزل قبل انتهاء صديقي من حمّامه .
و بعد خروجه من الحمام أحضرت العشاء لنكمل عليه ما انقطع من حديث .
فنظر مزمل بريبة إلى الدجاجة و قال :
- مشيت جبتها من شوّايات السوق .. مش كده ؟
- و مالا شوايات السوق ؟ و بعدين الزول الجبتَ منو الفرخة دا قريبنا و شغلو محترم و نضيف و مضمون !
- ياخي دا ما قصدي ... الشواية دي مش قاعدة برّه قدام المطعم ؟
- أيوه ... والمشكلة شنو ؟
- يعني الماشي في الشارع كلو بعاين ليها !
- و مالو كان عاينو ليها ؟
- مالو كيف يا زول ؟ إنت الله ما ليك ! .. ياخي لو جا أي زول فايت قدام المطعم و عاين للجدادة القدامنا دي و هي في الشواية بي شهوة و جينا نحن أكلناها بننضرب ، و والله تاني أجعص دكتور ما يعالجنا !!
- ننضرب كيف يعني ؟!
- يا أحمد ياخي العين حق ... إنت ما مؤمن ولا شنو ؟
تأملت وجه مزمل وهو يتكلم ، لقد كان في غاية الجدّية ! ، لذا فقد احترمت قناعته ، فغيرت مجرى الكلام و قلت له :
- طيب الفول معاك كيف .. من القدرة بتاعت الدكان !!
- الفول ما فيهو مشكلة .. مافي عين بتدخل فيهو !

و بسرعة أعددت طبقاً من الفول المصلح و جئت به لصديقي ، فاعتدل مزاجه و بدأ يتعشى ، فنظرت إلى الدجاجة و قلت :
مزمل أقول ليك حاجة ... أنا عايز انضرب !

فضحك و ضحكت ، و أكل فوله و أكلت دجاجتي

و قد استفدت من هذه الواقعة فيما بعد ،
ففي ذات ليلة خف فيها جيبي و تعكر فيها مزاجي قالت لي حرمي المصون :

- الليلة ما تغيّر علي الوليدات ديل و تجيب ليهم جدادة مشوية من السوق

- جدادة مشوية ؟؟ إنتِ دايره الوليدات ديل ينضربو ولا شنو ...

طارق صديق كانديك · 31-03-2015, 09:05 PM

أضحك الله مساك يا ود سليمان

غايتو مزمل عصر عليك والله بس أهو برضو وفر ليك مراقة أجدع من أحسن دو ديناري

كتابتك من القلب وصادقة يا حبيبنا،متعك الله بالصحة

تحياتي

أمير الأمين · 31-03-2015, 09:32 PM

اها و رباب ؟

ناصر يوسف · 31-03-2015, 10:57 PM

اقتباس:

المشاركة الأصلية كتبت بواسطة أمير الأمين

اها و رباب ؟

هي ما كلمتك ؟
رباب ما بقت نباتيييييه ياخ

😃😃😃😃😃

أحمد طه · 01-04-2015, 05:20 AM

اقتباس:

المشاركة الأصلية كتبت بواسطة أمير الأمين

اها و رباب ؟

هههههه

غايتو رباب دي كان ما أخاف الكضب تكون في أبو ظبي أو الرياض ، السودان دا يتبالو بيهو الشقايا الزينا

أحمد طه · 01-04-2015, 05:16 AM

اقتباس:

المشاركة الأصلية كتبت بواسطة طارق صديق كانديك

أضحك الله مساك يا ود سليمان

غايتو مزمل عصر عليك والله بس أهو برضو وفر ليك مراقة أجدع من أحسن دو ديناري

كتابتك من القلب وصادقة يا حبيبنا،متعك الله بالصحة

تحياتي

كانديك سلامات و عساك بخير

ثناؤك على ما أكتب أكليل يزين هامتي ، و أنت أيضاً متعك الله بالصحة و العافية

ناصر يوسف · 31-03-2015, 10:58 PM

احمد طه

شكرا ليك يا فخيم

أحمد طه · 01-04-2015, 05:26 AM

اقتباس:

المشاركة الأصلية كتبت بواسطة ناصر يوسف

احمد طه

شكرا ليك يا فخيم

تسلم يا ناصر ، و ما تنسى وعدك بالزيارة في احتفالية مهرجان جبل البركل القادمة

بضبح ليك جدادة في البيت ... عين واحدة ما شافتا

ناصر يوسف · 01-04-2015, 06:23 AM

اقتباس:

المشاركة الأصلية كتبت بواسطة أحمد طه

تسلم يا ناصر ، و ما تنسى وعدك بالزيارة في احتفالية مهرجان جبل البركل القادمة

بضبح ليك جدادة في البيت ... عين واحدة ما شافتا

ها زول هه
انا بعد ما ناسبتكم ما بقيت زول قراصي ساي ياخ

ههههههههه

الله يحيينا للمهرجان القادم يا احمد وليك الشوق يا حبوب

عبد المنعم حضيري · 01-04-2015, 06:27 AM

شكراً يا أحمد يا حبوب

إنبهال إحساسك الرهيب دا بلقاء صديق قديم بيخلينا نحس إنو الدنيا لسه بخيرا

والعين حق وأخوك بيخاف منها موت زي صاحبك دا

كتر خيرك

ياسر ابراهيم · 01-04-2015, 10:25 AM

اقتباس:

المشاركة الأصلية كتبت بواسطة عبد المنعم حضيري

إنبهال إحساسك الرهيب دا بلقاء صديق قديم بيخلينا نحس إنو الدنيا لسه بخيرا

الحضيري ياخي خليني معاك هنا
الجداد ملحوق
شكرا احمد طه

عبد المنعم حضيري · 01-04-2015, 10:30 AM

اقتباس:

المشاركة الأصلية كتبت بواسطة ياسر ابراهيم

الحضيري ياخي خليني معاك هنا
الجداد ملحوق
شكرا احمد طه

وين لقيتك لامن آباك

تسلم

أحمد طه · 01-04-2015, 01:20 PM

اقتباس:

المشاركة الأصلية كتبت بواسطة ياسر ابراهيم

الحضيري ياخي خليني معاك هنا
الجداد ملحوق
شكرا احمد طه

مرحب بيك يا ياسر ، و شاكرين على المرور

أحمد طه · 01-04-2015, 01:03 PM

اقتباس:

المشاركة الأصلية كتبت بواسطة عبد المنعم حضيري

شكراً يا أحمد يا حبوب

إنبهال إحساسك الرهيب دا بلقاء صديق قديم بيخلينا نحس إنو الدنيا لسه بخيرا

والعين حق وأخوك بيخاف منها موت زي صاحبك دا

كتر خيرك

الأخ عبد المنعم ، لك قواسيب التحايا

كتر خيرك إنت على الطلة الجميلة ، ياخي الدنيا لسه بخير رغم انكماش مساحتو في الناس

نعم ، العين حق

لكن يتخيل لي لو الزول وصل لي مرحلة صاحبي مزمل دا ممكن حياتو تتجهجه و يعيش عمرو في قلق مستمر ..
و دي مشكلة أخير منها العين ( من باب كتلك ولا جاك جاك

)

31-03-2015, 08:34 PM	#[1]
أحمد طه :: كــاتب نشــط::	جدادة مزمل ! صديقي مزمل الذي لم أره منذ سبع و عشرين عاماً اتصل علي ذات مساء و أخبرني أنه سيصل لمدينة كريمة الليلة في مأمورية ، و أنه سيأتي للمبيت معي في المنزل . سررت جداً بهذه المفاجأة ، و مرّ بخاطري شريط من ذكرياتِ أيامٍ و أحداثٍ عشتها معه في الديم و حلّة الحجر ، و يا لها من أيام ! أتراه ما زال يهيم حباً ب (رباب) و ينتظرها في محطة باشدار صباحاً حيث يقلّها الترحيل إلى معهد الكليات التكنلوجية ؟ لا شك أن رباب قد تزوجت منذ زمان و أصبحت أمّا رائعة ، فمثل ذلك الجمال لا يجلس في كنبة الانتظار . أما مزمل فقد بلغني أنه قد تزوج من إحدى فتيات البني عامر و أنه قد طلقها بعد أقل من عام من اقترانه بها ، ثم لم يتزوج مرة أخرى . يا لحظه العاثر ! عند التاسعة مساءً اتصل بي مزمل ليخبرني أنه ينتظرني في الموقف المقابل لمستشفى كريمة ، فذهبت إليه على عجل ، و رأيته من على البعد وهو يدخن سجارة و حقيبته أمامه على الأرض ، إنه هو كما عهدته ، لم تغيره السنين إلا قليلا . (تقالدنا) بحرارة حتى انتبه من حولنا لضجيجنا و صخب انفعالاتنا ، و من ثم ذهبت به إلى المنزل حيث انثال بيننا شلال من الذكريات الحميمة ، و بعد فترة من المؤانسة الممتعة اقترحت عليه أن يزيل وعثاء سفره بحمّام منعش ، ففعل . و انتهزت أنا هذه الفرصة لتدبير عشاء يليق بضيفي ، إذ كانت زوجتي مع والدتها المريضة في تلك الليلة. ذهبت إلى السوق على عجل و احضرت دجاجة مشوية و بعض المخلل و رجعت إلى المنزل قبل انتهاء صديقي من حمّامه . و بعد خروجه من الحمام أحضرت العشاء لنكمل عليه ما انقطع من حديث . فنظر مزمل بريبة إلى الدجاجة و قال : - مشيت جبتها من شوّايات السوق .. مش كده ؟ - و مالا شوايات السوق ؟ و بعدين الزول الجبتَ منو الفرخة دا قريبنا و شغلو محترم و نضيف و مضمون ! - ياخي دا ما قصدي ... الشواية دي مش قاعدة برّه قدام المطعم ؟ - أيوه ... والمشكلة شنو ؟ - يعني الماشي في الشارع كلو بعاين ليها ! - و مالو كان عاينو ليها ؟ - مالو كيف يا زول ؟ إنت الله ما ليك ! .. ياخي لو جا أي زول فايت قدام المطعم و عاين للجدادة القدامنا دي و هي في الشواية بي شهوة و جينا نحن أكلناها بننضرب ، و والله تاني أجعص دكتور ما يعالجنا !! - ننضرب كيف يعني ؟! - يا أحمد ياخي العين حق ... إنت ما مؤمن ولا شنو ؟ تأملت وجه مزمل وهو يتكلم ، لقد كان في غاية الجدّية ! ، لذا فقد احترمت قناعته ، فغيرت مجرى الكلام و قلت له : - طيب الفول معاك كيف .. من القدرة بتاعت الدكان !! - الفول ما فيهو مشكلة .. مافي عين بتدخل فيهو ! و بسرعة أعددت طبقاً من الفول المصلح و جئت به لصديقي ، فاعتدل مزاجه و بدأ يتعشى ، فنظرت إلى الدجاجة و قلت : مزمل أقول ليك حاجة ... أنا عايز انضرب ! فضحك و ضحكت ، و أكل فوله و أكلت دجاجتي و قد استفدت من هذه الواقعة فيما بعد ، ففي ذات ليلة خف فيها جيبي و تعكر فيها مزاجي قالت لي حرمي المصون : - الليلة ما تغيّر علي الوليدات ديل و تجيب ليهم جدادة مشوية من السوق - جدادة مشوية ؟؟ إنتِ دايره الوليدات ديل ينضربو ولا شنو ...
أحمد طه :: كــاتب نشــط::

31-03-2015, 09:05 PM	#[2]
طارق صديق كانديك :: كــاتب نشــط::	أضحك الله مساك يا ود سليمان غايتو مزمل عصر عليك والله بس أهو برضو وفر ليك مراقة أجدع من أحسن دو ديناري كتابتك من القلب وصادقة يا حبيبنا،متعك الله بالصحة تحياتي
طارق صديق كانديك :: كــاتب نشــط::	التوقيع: الشمس زهرتنا التي انسكبت على جسد الجنوب وأنت زهرتنا التي انسكبت على أرواحنا فادفع شراعك صوبنا كي لا تضيع .. ! وافرد جناحك في قوافلنا اذا اشتد الصقيع واحذر بكاء الراكعين الساجدين لديك إن الله في فرح الجموع الفيتوري .. !!

31-03-2015, 09:32 PM	#[3]
أمير الأمين :: كــاتب نشــط::	اها و رباب ؟
أمير الأمين :: كــاتب نشــط::

31-03-2015, 10:58 PM	#[7]
ناصر يوسف :: كــاتب نشــط::	احمد طه شكرا ليك يا فخيم
ناصر يوسف :: كــاتب نشــط::	التوقيع: ما بال أمتنا العبوس قد ضل راعيها الجَلَوس .. الجُلوس زي الأم ما ظلت تعوس يدها تفتش عن ملاليم الفلوس والمال يمشيها الهويني بين جلباب المجوس من التيوس النجوس

01-04-2015, 06:27 AM	#[10]
عبد المنعم حضيري :: كــاتب نشــط::	شكراً يا أحمد يا حبوب إنبهال إحساسك الرهيب دا بلقاء صديق قديم بيخلينا نحس إنو الدنيا لسه بخيرا والعين حق وأخوك بيخاف منها موت زي صاحبك دا كتر خيرك
عبد المنعم حضيري :: كــاتب نشــط::	التوقيع: إذا فتحت ابواب خير فأقبلوا موائد أهل الله خير الموائد