طارق كل عام وانت بخير
في باب الأسئلةونوافذ الاجوبة :
اقتباس:
|
انتو العشاق مزقوا فاتورة الجوابات المعطرة ولا شنو !!
|
ج 1/ لا تفكر مرتين في الامر فقط عليك بادارة محرك البحث نحو بوستات عصمت العالم ..
ج 2 / كنت دائما اعتقد ان المسلسلات المصرية لها سلبيات وايجابيات :
1 .. السلبيات تتمثل في غلاء الاراضي في السودان لتخدير الناس واوهامهم باننا نعاني من ازمة
سكن وان البيت الكبير دقة قديمة .
2 .. السلبية التانية علمتنا ان الحب ما بكون حب صاح اذا لم يتعذب المحبوب .. يعني مافي حب
بي اخوي واخوك .
3 .. الايجابيات انها هيأت للمحبين ساعة صفاء يومي وتحولت كل الشوارع المظلمة الي حدائق عشاق ..
في باب القصص والحب :
واحد اخونا كان حابي جديد .. وكاسح ( وهو مصطلح ساعة الصفاء وقت المسلسل تقول العرب شاب كاسح
اي خالط ساعة المسلسل .. او تقول الي صاحبك كنت كاسح مع فلانة ..وسوف يكون المعني واضح بالنسبة له لذا لزمن الشرح والتوضيح )* ... اخونا كان كاسح والشغلانة بالنسبة ليهو جديدة خالص وما عارف يتكلم ويقول حاجة .. والبنت شفته ومفتحه .. فقالت تحاول تديهو مدخل عشان يتكلم .. وقالت ليهو :
- وين الايام دي عجلتك ما شايفاك بتسوقها ..
وصاحبنا ما صدق ووجد المدخل .. فرد عليها ..
- والله العجلة الايام دي خسرانة لانو كدرها**مكسور .. عشان ساقها اخوي ... قبل كم يوم ولما صلحت الكدر
وعملت ليهو لحام .. ما نفع .. اها قمت مشيت الطيب خوجلي وسالت من كدر جديد .. لقيتو غالي . قمت مشيت
الدلاله .. لقيت لي كدر مستعمل طلع ما قدرها .. ... و .. و .. الكدر ... و .. و .. الكدر ... و ... و .. الكدر ... و .. الكدر
... والكدر .. والكدر .. والكدر ... .. وانتهت المسلسلة ولم تنتهي حكاية العجلة والكدر ...
ومنذ ذلك اليوم ( والعهدة علي لسان الراوية ).. لم تكسح مع واحد عندو عجلة .. ولن تسأل عن معني الكدر ابدا
واصبح مثل وسط الشلة لكل من يضيع منو الكلام ويقول ما عرفت اقول ليهو شنو ..
يكون الرد : احكي ليهو عن الكدر
.....
يعني ياطارق مش الجوابات الانتهت المواضيع زاتا انتهت وبقت عبارة عن كدر ...
* المصدر : اللسان الفصيح في علم الكسح والتكسيح ..
** الكدر : هو الهيكل الذي يربط بين جميع اجزاء الدراجة ببعضها ... والكدر هو ايضا موضوع لمن لا موضوع له ..
