كفارة البيك يزول ...هدية للمعرِّسين
[align=center]
من زمـني الصِّبَي وأنا كنت بحلم أعرِّس
حد ما أشوف لِي تُوب دَاقِّي الوَحِيح مِتجرِّس
واقف فـي المـرايا وكل يـوم مِتلبِّس
أجلـُط فـي وَشِي بالنِّيفيا ليهـو أملِّس
مَاسْكْ أمِّي وأخـالي ومـرَّة فيها أحنِّس
تَخَتِِب لَي بنية سميحـة ليّـَا تونس
باريت الشباب في الحِلَّة حـايم أجكِّس
لاقيت لي بنية ورُحـت عييييك مُدبِّس
شَـرَك الحُب قبض ووقعت فيهو مكبِّس
كِنكيشة عـدوك بى إيدها أخنق فَطِّس
مرَّت بى سنين جوّا القفص متكـرفس
في الاول هُـيام وزهـور وباقات نرجِس
وهسه بقيت عديل أشهق براي وأعطِّس
حليل أيام زمان كابِّي الضِّحِـك متونِّس
حتى أكان بقيت جيعان وجـيبي مفلِّس
هَسَّـه بقيت تجي وتلقاني صارِّي مدبرِس
ومـَرَّاتاً براااي أنضم تقول ده مهلوس
كان الجيب زمـان مليان قروش متكدِّس
وهسـه العنكبوت ماليهـو لمّـا مسوس
فرَّامة الجيوب بى إيدها ماسكـا وتهرِس
جنَّنَت التِجـار تمشي وتجـيب وتَدَفِّس
دولاب الهـدوم نامن بَكَى وبقى يرفِس
والإيدين دَهَب كِشكيشو لامَن يَضرِس
وكان شُفتُو الشُبَاطة الكـارًّو زااتا تَفَنقِس
إن دُرتَ المـروق قالت لي قبَلَك أجلِس
روح شـوف الولاد ذاكِر معاهم ودرِّس
وإن زعلت تَنِقْ والنِقَّة حـاجة تَمَغِّس
وإن فَـاقَت كَلِيلَة ودِمْنَة لمَّـا تَنَعِّس
وإن جـونا الضيوف تلقاها ماسكة المجلس
تَحَمِينِي النَضِم دايمـاً عَلَيْ مِتحَسِّس
شهَّتْنِي الهَـبُوب يا أخـواني كُتْ متنفِّس
يا ريت لو زمــاان ما قلت داير أعرِّس[/align]
|
