الاستدراج وفن الاصطياد
بسم الله الرحمن الرحيم
دوما خير افتتاحية للكلام وعليكم السلام خير تحية لبني الانسان والفكاهة منبع الحب والامان لكن ما سوف نتحدث عنه يفتقد الي الامان والموضوع هو :-
الاستدراج وفن الاصطياد :-
ومعني العنوان واضح وهو ان تستخدم طاقتك العقلية لتنفيذ شئ دون شعور الشي المقصود ليتفاجأ بك عن اللحظة الحاسمة وانت تنقض عليه ومن ناحية اخري ان المستدرج في كل الاحيان هو الصياد والمستدرج هي الفريسة وتتشابه انواع الفرائس بين الحيوانات لانها كلها تؤكل اما بين بني البشر فالفرائس اشكال انواع واغراض واهداف ليس لي المجال لاخوض فيها كلها .
لابد ان يكون الصياد اذكي من فريسته اما بصنع الة تفوق مقدارت الفريسة او التحايل عليها بوسائل ذكية
فأن الهدف من الاستدراج كله هو الاصطياد لكن كيف نستدرج الفريسة يكون ذلك باستفزاره بما يحب وهو ما يسمي بالطعم وجره الي هدفك وهي وسيلتك للصيد وتسمي الشرك التي تريد ايقاعه فيها
لنعد الي للدارجية قليلا
اتخيل عندك فار في قطيتك عمال ليك كركبكة بالليل في الصحانة والورق هنا تقوم تشوف ليك شرك الياي بتاعو كارب وتشوف ليك طعم عبارة عن قطعة جنبة من فول العشاء وتستفزوا بيها ويقع في الشرك ومرات يطلع اذكي منك ويأكل الجنبة ويكون شاركك في العشاء بالنص
وفي هذه الحالة عليك استخدام ذكائك وتغيير الشرك باستجلاب كديسة من النوع ابو كديس الجعان وخلي فارك الشبعان يستفزو وينطط قدامو ولكن لو غلبوا والله دي تبقي مشكلة كبيرة
طيب لو جاتك كديسة الكتابة تصطادها كيف دي دايرة حاجة تاني بس بحلها ليكم تجيب ليك شرك عبارة عن ورقة وقلم وتستخدم طعم عبارة عن مكان هادي جنب النيل او غرفة مظلمة والصيادين من هذا من اكثر انواع الصيادين رقيا في استدارج المفردة الجميلة واللبقة .
[align=center]وياحمام شتتو ليك سكر [/align]
دا نوع من الاستدارج فيه نوع من التورية هل الحمام الحمام ولا ( الحمام الحنان ) وان اختلفا فان الهدف هنا الاستدارج . اما استدراج الحنان فيستخدمه الشباب كثيرا من كلمات منمغة ومنغمة علي الحان بعرسك وكدة .
ومن انواع الاستدارج القبيح استدراج ناس الامن والمباحث ديل كمان صيادين من الدرجة الممتازة يمكن يستدرجوك ويدخلوك صفقة عبارة عن طعم او يستدرجوك الي الوكر المهجور ويقبضوك بأدلة ثابتة
اما استدراج الموساد للجواسيس فهو علم يدرس وفيه الغاية تبرر الوسيلة فهم يستخدمون كل الوسائل الاستفزازية لبني البشر من الشهوات (مال , نساء,...., الخ ) بمهارة يحسدون عليها لاستخلاص المعلومات واذا لم تنجح فلهم وسائل اخرى
واتفقنا هنا ان المستدرج يقوم باستفزازك من ثم الانقضاض عليك ويجب ان تتوفر فيه الذكاء والدهاء لانفاذ عملية الاصطياد
ومن انواع الاستدراج الحميد استدراج بنات حواء لنقع في شباكهم وهن ايضا صيادات ماهرات بدرجة فوق للامتياز ففتاة في العشرين جملية جدا يمكن ان تستدرج من هو في الاربعين والروح تروح ما مشكلة .
انا شخصيا لست معني بهذا النوع من الاستدراج لاني فريسة غير مستساغة لهذ النوع من الصيادين ولكن لو حالوا بكفيني بسمة مع ما فيها زجاجة بارد وبدل واحد ممكن اقع واسيقها عشرة
طفشة صغيرة . لابد ان يستدرج هذا الموضوع بعض الاقلام الصامته الي الكتابة
استدراج من نوع خاص
ذهبت الي الخرطوم في اجازة شهر وقعت ليك دوس في البيرقر الجامبو والشاورمة وجداد امواج وسمك الموردة وفول بابا حسين وطعمية الراكوبة ورجعت سمين منفخ عديل كدة
واحد صاحبي عزمني فطور بقينا نتونس عن اخبار الخرطوم وبعد كل فترة كان ياسأل
في الخرطوم البيرقر الجامبو عمل كم قلت ليه خمسة جنيه معاهو بارد ونواصل في الونسة وبعد شوية رايك شنو في الفول دة قولت ليه والله الفول عند بابا حسين
ومرة تانية قال لي والله طولت من السمك لميت فوقوا قلت والله ضربت ليك سمك بعشرين جنيه في الموردة خليتهو ليك صور اشعة قام طلب اثنين ببسيي وقال لي الببسي دا داير جداد , وعليك الله الجداد في امواج بيكم قلت ليه بعشرين جنيه
صاحبي نط فوق وقال لي عشان كدة جاي منفخ كده انت مشيت اجازة ولا مشروع تسمين
ولك التحية صاحبي العزيز
ولكم كل الشكر والتقدير ( وجدي مازالت تطوق عنقه مسبحة اللالوب ويضع قرنين وريش النعام علي راسه ويرقد وسط بكنه خنجر ويجلس علي الككر لينادي سيدتي الاميرة اماني شختا )
|
