البشير يصرح: لا بديل للسكة حديد إلا السكة حديد

[اشرف السر]

وجاء تصريحه هذا في اللقاء (الحاشد) بمناسبة افتتاح مصنع الفلنكات الاسمنتية اليوم..

كما صرح أنهم لن يرضوا بأقل من أن ترجع للسكة حديد مكانتها الأولى..




ياربي الغتس حجر سكة حديد السودان
وسكة حديد الجزيرة منو؟

ظنيتها امريكا.. ودول الاستكبار




المصدر: انا زاتي.. سمعتو بأضاني دي في تلفزيون السجم دا

[imported_جيجي]

معليش
يعني شنو فلنكات اسمنية
وهل بترجع بنفس تخلفها الاول ولاكيف

[اشرف السر]

والله يا جيجي علمي علمك في موضوع فلنكات أسمنتيه

الكان بعرفوا انه الفلنكات خشبية..
لكن بما انه اضافو عبارة أسمنتية..
فمعاناها ح تتصنع من الاسمنت يصبوها في قوالب ويربطوا بيها سكة حديد السودان الجديدة..
متى؟ الله أعلم

بس خلي في بالك انه
لا بديل للسكة حديد الا السكة حديد
ولا نامت أعين البصات

[اسمر]

المشاركة الأصلية كتبت بواسطة اشرف السر

والله يا جيجي علمي علمك في موضوع فلنكات أسمنتيه

الكان بعرفوا انه الفلنكات خشبية..
لكن بما انه اضافو عبارة أسمنتية..
فمعاناها ح تتصنع من الاسمنت يصبوها في قوالب ويربطوا بيها سكة حديد السودان الجديدة..
متى؟ الله أعلم

بس خلي في بالك انه
لا بديل للسكة حديد الا السكة حديد
ولا نامت أعين البصات

يا دوب الكلام ده وقع للسيد الرئيس طالع عمره
ـــــــــــــــــــــــــــــــــــــــــ
انا غايتو يا اشرف بتمنى السكة حديد ترجع عشان اركب القطر ولو مرة واحدة في حياتي

[عبدالمنعم الطيب حسن]

يا اشرف سلام وضيوفك
السكة حديد في بلد زي السودان حار جاف ومترامي الاطراف
تبقى الحل الاوحد لربط بلد قارة - وان تقلص وفقد نحو ما يقرب من تلته -
ولكنها فترة وتمر ويرجع السودان مترامي من حلفا الي نمولي
ومن خور برنقا حتى قرورة ...
اقول ان هذا البلد الحل الوحيد والاقتصادي لربطه مفاصله مع شرائينه والوريد
هو السكة حديد ....
اقتصادية جدا السكة حديد
ومعمرة جدا
وتنقل اكبر عدد من الناس والبضائع
وهي الاقل تكلفة من بين وسائل النقل جميعا ...
الحكومة الحالية عابرة في تاريخ السودان ولا شان لها
لذا ينبغي ان تكون من اوليات الحكومات اللاحقة الاهتمام بهذا القطاع وتنميته
وتحديثه ...
وبعدها ما اجمل الرحلة بالقطار لاسمر
الي الجنينة او مريدي او حلفا او بورسودان ،

ويبقى الامل الذي هو شريط اخضر لولاه لاحترقنا

الم تقرا لعبدالله علي ابراهيم ان
( السكة حديد قربت المسافات و جِدَّا )

[اسمر]

المشاركة الأصلية كتبت بواسطة عبدالمنعم الطيب حسن

يا اشرف سلام وضيوفك

وبعدها ما اجمل الرحلة بالقطار لاسمر
الي الجنينة او مريدي او حلفا او بورسودان ،

ويبقى الامل الذي هو شريط اخضر لولاه لاحترقنا

الم تقرا لعبدالله علي ابراهيم ان
( السكة حديد قربت المسافات و جِدَّا )

نسأل

الله يعطينا فرصة لزيارة الجنينة وكل مدن السودان

وإن شاء الله سوف ابحث عن كتابات عبدالله علي ابراهيم

تحياتي يا منعم

[imported_Hassan Farah]

( لا بديل للسكة حديد الا السكة حديد)
دا شعار رفعو الباشمهندس مكاوى المدير السابق للهيئة المركزية للكهرباء والذى اقيل ارضاء لعديل البشير الفاقد التربوى اسامة عبدالله ثم القوا به فى ( مزبلة) السكة حديد حسب فهمهم.. رب ضارة نافعة الرجل مشهود له بالمهنية العالية

[imported_ام التيمان]

و قبلها صرخ
لا بديل لا بديل لشمس الدين
الا وداد

[imported_أبومنذر]

هو يا دوب صحو وعرفو لا بديل للسكه حديد الا السكه حديد ..

صحيان متأخر شديد ,.. عقبال يصحو من غفوتهم ويقولو لا بديل لحكم السودان

الا بالديمقراطيه الحقيقه وليست حكومه العسكر ..

لكن اظن اخذتهم سكره السلطه وما حا تفك منهم بسهوله ..

[imported_أميرى]

المشاركة الأصلية كتبت بواسطة Hassan Farah

( لا بديل للسكة حديد الا السكة حديد)
دا شعار رفعو الباشمهندس مكاوى المدير السابق للهيئة المركزية للكهرباء والذى اقيل ارضاء لعديل البشير الفاقد التربوى اسامة عبدالله ثم القوا به فى ( مزبلة) السكة حديد حسب فهمهم.. رب ضارة نافعة الرجل مشهود له بالمهنية العالية

صدقت يا خال
الباشمهندس مكاوي هو أكفأ رجل أنجبته الإنقاذ العقيمة
و نجاحاته في الكهرباء غير مسبوقة منذ الإستقلال

الرجل إذا قال فعل بس يسيبوهو يشوف شغلو و حينجضو تمام

ربنا يطول عمرنا و عمره عشان نشهد نجاحاتو ف السكة الحديد

[imported_Sana Mursi]

التاجر لما يفلس يفتش في الدفاتر القديمه والمشير من ما قروش البترول شتتت بدأ ينكت في الزراعه والسكه الحديد والوزراء ينكتوا في النبق والحرجل وابو قضيم والانكى انهم ختوهم في قفه واحده مع الدكاتره.
غايتو بس الحمد لله