اليوم أبأس يوم فى حياتى

[رأفت ميلاد]

المشاركة الأصلية كتبت بواسطة عادل عسوم

ماسألتو يازين والله
وما حأسيئ الظن لا بيك ولا بيهو لأني كمسلم مطلوب مني أن أحسن الظن بالناس

تحية ومودة يازين

لكن أنا كغير مسلم سأسيئ الظن بيك وبيه .. غالباً تكون كذاب ومافى زول زى ده ولا لاقيته كده ..
عصومى كيف جه أدلى بى صوته لسياده ..

هسة يا عادل سيبك من الولد الما أدوه قروش ده .. أنت أدوك كم .. ولّ حيدخلوك كلية الطب

[عادل عسوم]

المشاركة الأصلية كتبت بواسطة رأفت ميلاد

بخيت وسعيد عليك وطنك والبشير ..
قلت لى قال ليك (-معليش ياعم صحباني جمّعوا ليهم كم زول ماشي أجيبم للتصويت!!!) .. هم بجمعوهم من وين بلقوهم فى الأنادى ولا فى سبعة بيوت .. والله كنت قايل بجوا براهم ..
أنا غايتو ما داير أستوثق من حاجة وعاجبنى أكون على عماى .. وأنت حمت على كم صندوق إقتراع ليه .. مشرف ولا ما عندك شغلة .. كان فى نسوان فى الشغلة دى يا سحس

مرحبا ابوميلاد

بخيت وسعيد عليك وطنك والبشير ..

شكرا لك على الدعاء ياأخا الوطن والمنبر

قلت لى قال ليك (-معليش ياعم صحباني جمّعوا ليهم كم زول ماشي أجيبم للتصويت!!!) .. هم بجمعوهم من وين بلقوهم فى الأنادى ولا فى سبعة بيوت .. والله كنت قايل بجوا براهم ..

بجمعوهم من دورهم وساحات الأحياء يارأفت ...
وليس من الأماكن التي ذكرتها ...وأعف لساني عن ذكرها.
اذ فيهم كبار السن وفيهم من لاظهر له ليأتي.

أنا غايتو ما داير أستوثق من حاجة وعاجبنى أكون على عماى .. وأنت حمت على كم صندوق إقتراع ليه .. مشرف ولا ما عندك شغلة ..

لست مشرفا ...انما كان ذلك بدافع حب الوطن والأستيثاق-ولو قليلا-عن تزوير يدعيه آخرون.

كان فى نسوان فى الشغلة دى يا سحس

لا أدري ماتعنيه بلفظة (سحس)...وأدعه للقارئ الكريم ليقيمه ويحكم عليك وعليّ
أما ال(نسوان) فكان هناك العديد منهن ... محتشمات يحترمن ويُحترمن
...

[عادل عسوم]

المشاركة الأصلية كتبت بواسطة رأفت ميلاد

لكن أنا كغير مسلم سأسيئ الظن بيك وبيه .. غالباً تكون كذاب ومافى زول زى ده ولا لاقيته كده ..
عصومى كيف جه أدلى بى صوته لسياده ..

هسة يا عادل سيبك من الولد الما أدوه قروش ده .. أنت أدوك كم .. ولّ حيدخلوك كلية الطب

لك أن تحسن الظن أو تسيئه ...اذ أنت (راشد) في عمرك ولك رب سيحاسبك على ظنك (حسنه) و(سيئه) كما سأحاسب أنا...ولا أجد مايدفعني الى كذب لايرضاه ديني الذي أدين...

عصومى كيف جه أدلى بى صوته لسياده ..

لم أفهم شيئا مما تريد ايصاله

هسة يا عادل سيبك من الولد الما أدوه قروش ده .. أنت أدوك كم .. ولّ حيدخلوك كلية الطب

فعلت ذلك بدافع الوطنية التي أحمل يارأفت...
الدنيا لم تزل (وضيئة) وبها الكثير الذي يمكننا فعله بدافع من (قيمنا) التي نؤمن ودونما انتظار من أحد ليدفع لنا...
هناك أله يعطي الأجر...
وهو رقيب علينا ...دنيا وأخرى
اسأل الله لي ولك الهداية

[رأفت ميلاد]

طيب مع السلامة

[أميرى]

المشاركة الأصلية كتبت بواسطة أميرى

عدّي؟؟؟

انت معاي؟
اااي معاك ياااخ
طيب عدّي؟
أظن أظن أظن
اممممممم

المشاركة الأصلية كتبت بواسطة رأفت ميلاد

طيب مع السلامة

[رأفت ميلاد]

المشاركة الأصلية كتبت بواسطة أميرى

عدّي؟؟؟

ياخ تعبت وقوقلتها وقلبتها لامن نفسى قام .. ياخ ما تمارس علىّ إرهاب

[أميرى]

المشاركة الأصلية كتبت بواسطة رأفت ميلاد

ياخ تعبت وقوقلتها وقلبتها لامن نفسى قام .. ياخ ما تمارس علىّ إرهاب

عدّي
العين جنب الدال الشاداها الشِدّة وجاورتهم ياء
يعني فات ,شتت,مشي

اليوم الأسوأ دة فات يا رأفت؟

ـــــــ
علي فكرة مداخلتك الاولي وردك علي مواطن فيها كمية عاطفة
مااااااااااااااااااااااااااااااااااااااااااااااااا ااااااا بتودي لي قدام

وصدقني الاسوأ ما جا
ـــــــــــ
لي راهنت علي يوم غلط!!!

[رأفت ميلاد]

المشاركة الأصلية كتبت بواسطة أميرى

عدّي
العين جنب الدال الشاداها الشِدّة وجاورتهم ياء
يعني فات ,شتت,مشي

اليوم الأسوأ دة فات يا رأفت؟

ـــــــ
علي فكرة مداخلتك الاولي وردك علي مواطن فيها كمية عاطفة
مااااااااااااااااااااااااااااااااااااااااااااااااا ااااااا بتودي لي قدام

وصدقني الاسوأ ما جا
ـــــــــــ
لي راهنت علي يوم غلط!!!

تعرف أنا ما جهجهتنى العين القبال الدال المشدودة .. أنا بقيت فى الـ (ى) ولّ ألف ميت .. بركة المات
والحاجة التانية رغم هى (قبل) لما شفتها البوست كان إنضرب لغم .. فأخوك زغلل .. وجاتنى الحالة البتحول 360 درجة يعنى (تقوم تلف) .. فطلباً للسلامة فطيتا ..

أما مداخلتى مع مواطن ما كان فيها عاطفة ولا شتين .. أبيت عديل كدة .. الجلاكين ديل بعرف ليهم .. و المداخلة الأولى (لمن تفتح بوست وتكون ممغوص وراسك فاضى)

عدّى ياخ

بالمناسبة هنا (ياء) ما (ألف ميت)

[عادل عسوم]

المشاركة الأصلية كتبت بواسطة رأفت ميلاد

طيب مع السلامة

مع سلامة الله...
يبدو أنك قد كتبتها من بعد خروجي ليلة الأمس!
...
ما كان لي أن اعود...
لكني وددت بيان أمر:
طالما امتلكت الشجاعة التي تجعلك تتطاول وتتهمني بالكذب قائلا:

غالباً تكون كذاب

فلماذا عدت وحذفت المظلل من مداخلتك هذه؟:

المشاركة الأصلية كتبت بواسطة رأفت ميلاد
بخيت وسعيد عليك وطنك والبشير ..
قلت لى قال ليك (-معليش ياعم صحباني جمّعوا ليهم كم زول ماشي أجيبم للتصويت!!!) .. هم بجمعوهم من وين بلقوهم فى الأنادى ولا فى سبعة بيوت .. والله كنت قايل بجوا براهم ..
أنا غايتو ما داير أستوثق من حاجة وعاجبنى أكون على عماى .. وأنت حمت على كم صندوق إقتراع ليه .. مشرف ولا ما عندك شغلة .. كان فى نسوان فى الشغلة دى يا سحس

؟؟؟
لكن لابأس يارأفت...
لأن كان ما ترميني به مذمة ...فهي وأيم الله شهادة لي بايجاب...
وكل ينفق مما عنده...
أقول ذلك وبين يدي نضح دواخلك:

بلقوهم فى الأنادى ولا فى سبعة بيوت

!!!

[رأفت ميلاد]

المشاركة الأصلية كتبت بواسطة عادل عسوم

مع سلامة الله...
يبدو أنك قد كتبتها من بعد خروجي ليلة الأمس!
...
ما كان لي أن اعود...
لكني وددت بيان أمر:
طالما امتلكت الشجاعة التي تجعلك تتطاول وتتهمني بالكذب قائلا:

فلماذا عدت وحذفت المظلل من مداخلتك هذه؟:

؟؟؟
لكن لابأس يارأفت...
لأن كان ما ترميني به مذمة ...فهي وأيم الله شهادة لي بايجاب...
وكل ينفق مما عنده...
أقول ذلك وبين يدي نضح دواخلك:

!!!

ياخ الله يديك العافية ويخدر طريقك

[عادل عسوم]

المشاركة الأصلية كتبت بواسطة رأفت ميلاد

ياخ الله يديك العافية ويخدر طريقك

اللهم آمين
لي ولك

[رأفت ميلاد]

طيب

[مواطن]

لأ فيها .. وقراية أميري هي الأبصر طلما إنت إنضربت حول 380 درجة.
الليلة مشيت صوتّ ...
وأنا في طريقي نحو المدخل .. إستهدفني رجل كث اللحية أغبرها .. وبادرني بسلام سريع "عكس السير" لأني أنا كنت متحرك وهو ثابت ، وبالتالي يفترض أن ألقي التحية أنا. أردف هامساً "إن شاء الله الشجرة" يا مواطن .. ؟؟ وتحرك ليتبعني .. فعاجلته قائلاً " لأ .. لاماب بحر أبيض" ، ثم بعد خطوتين أو ثلاثة حسكنت .. (بصراحة العارف معنى حسكنت دي يقول ليّ - أنا سمعتها كده ) ، أقول حسكنت وقلت في عقل بالي " الكوز ده قال "يا مواطن" ..!! يكونش رأفت محرشو ..؟؟ بعدين أنا كمسلم مطلوب مني أن أحسن الظن بالناس .. ، تاني حسكنت .. طيب رأفت ده ما مسلم .. ياربي أحسن بيه الظن ؟ .. ولا أديه قرن جعبة ؟؟ يازول بصراحة .. رجعت للكوز تاني ، قلت ليه "جزاك الله خير يا شيخنا .. إنت بتعرف واحد إسمه رأفت " .. الرجل ما أحسن بيّ الظن مع إنه إن شاء الله مسلم ، وكاد أن يزجرني .. ولكنه عدل عن ذلك فإرعويت.
تحسست جزلاني وأخرجت صك الإقامة وقدمته للموظف مستبقاً إستفساره بأنني أضعت قصاصة التسجيل ـ فقوقلني في الكمبيوتر مشكوراً ثم كتب رقم التسجيل طالباً مني الذهاب إلى قاعة الإقتراع .. الموظف الأول راجع الإقامة ثم سألني عن قصاصة التسجيل ، فقلت ليه يعني إنتو كان ما عايزنها تضيع من الناس ما كنتو عملتوها 2x3 سم (وهذه حقيقة) لم يعقب وقام بإخراج إسمي من كشف الناخبين وجرررررررررررررر شطبو شطبة لمّا قلبي وجعني .. ( شكيت الديمقراطية للذي لا ينام ولا يآكل الطعام ) ، ثم طلب مني بدوره الذهاب لآخر موظف .. الأخ راجع الإقامة وإقتص ورقة أنيقة بها صور المرشحين والدوائر الفارغة مقابل كل صورة وطلب مني بكل رقة أن أذهب خلف الستارة وأختار مرشحي ..
وكيلك الله عاينت للورقة إتخلعت .. ياها زاتا ال 380 درجة من الحول حقت روفي جاتني .. لقيت ليك الزول وش .. والشدرة .. هآ .. يا أخوانا .. غايتو أمي محفظاني وأنا صغير حاجة كده إسمها "محمد معانا ما تغشانا" .. المهم تمتمت سريع سريع .. وبي ده كلو أتعترت لما داير أنكفي على وشي قدام النسوان والراجلين .. تماسكت كي أبدو مقداما .. ومشيت ورا الستارة .. طارت السكرة وجات الفكرة .. وجاك الموت يا تارك الصلاة .. عليك أمان الله كلما أحك راسي أشيل القلم وأوديه على دائرة ألقى مرشحها إنسحب .. يا جماعة الخير .. الحل شنو ..؟ بقيت حمار الشيخ عند العقبة .. هدأت من روعي قليلاً وبدأت في إجراء تحليل كمي لمعطيات ما هو غائم من أفق مقارناً بنسبة السكر في دمي مقسوماً على نصيب الباعوض كحق مكتسب .. وصلت لنتيجة كيفية وهي أن الشيخ صاحب الحمار مرشحو ما بيخارج معاي لأنو كان راكب في سرج البيان الأول .. وصاحب البيان الأول ذاتو شجرتو ما مخارجة مع ال 28 ضابط مرفوعين إلى القوة الميل 40 دارفور يبقى النتيجة كحش منظمات الإغاثة وإعلان الجهاد في الجنوب .. أما الدكتور كامل فراجل أكاديمي وماليه في اللهط وبيع الذمم وترسية المناقصات ورقيق جداً "زي النور صاحبي" يبقى برضو في الكيس ...! الباقي منو طيب يا مواطن ..؟ آها مولانا الصغير .. أخف الأضرار .. قمت أديت مولانا الصغير .. وطلعت بحبر أخضر في الإبهام الأيسر .. والله يكفينا شر الإبهام .. وشر الأيسر وكلما هو يساري .. ونسقط نحن ..
وعجبي ..

[رأفت ميلاد]

الأكيدة يعنى صوت يا مواطن
ياخ ما إتفقنا نقاطع .. حتى كان ودونا كلية الطب

[نبراس السيد الدمرداش]

عمو رافت ازيك
اولا مشتاقين
تانيا اعتذر لانو النت عندي قطع اثناء حديثنا

ثالثا
انا على احتكاك يومي بالانتخابات و الناخبين
و يوميا بعد انتهاء وقت التصويت بنجتمع في غرفه طوارئ
هناك تجاوزات غريبه و غير منطقيه بتحصل

اليوم تم القبض على امرأه بمنطقة طيبة الاحامده(بحري)
تنتحل شخصية اخرى علما بانها غير مسجله اصلا للانتخابات
امس تم ادراج حالة تصويت طفل دون ال 18 عام وهو ممنوع رسميا
اول امس في منطقة الكبيراب (الدائره الجغرافيه 18 الحلفايا) تم العثور على صناديق الاقتراع مفتوحه و الاقفال اصلا غير مطابقه لمواصفات المفوضيه و تم استدعا الاصم للمركز في وجود المرشحين وفي اقل من ساعه حضر للمركز نافع الذي حاول بشتى السبل احتواء الموقف و عبد الرحمن الخضر

انا ممكن احكي ليك كتييييير
كفايه ولا اذيد