صدور كتابي الأول، نصوص إسفيرية

[حجة امنة]

ذات مره من المرارات في منبر سودانيز اون لاين، نزلت أحد قصايدي الجميلة gap
(بين الباحت و الهواب)
قام أستاذي بشرى الفاضل تفضل بالرد الاتي:

(و تتذكر بنات الحلة لكن ما طشاش زي طعنة الروح حرقتك
المارقه لي درس العصر,اللازمه حدها بي جمال
عاينت ليها إتبسمت , برااااحه عرفت جهرتك
و الما مارقه لي درس العصر , اللازمه زيق المسخره
حمرت ليها برضو إتبسمت , هاهااااااااي و لما ضحكت غمزتك)

،،،،،،،،،،،،،،،،،،،،،،،

هناك اشكالات كثيرة يا حجة آمنة في هذه القصيدة رغم أن الصورة التي اقتبستها منها هنا تضج بالحركة
وتشي يشاعرية وقدرة على إيراد التفاصيل. لكن انظري بالله كيف كسرت الوزن وأنت ملتزمة به في كل القصيدة انظري للمقطعين (المارقة لي درس العصر ، والما مارقة لي درس العصر)طالما جبت (ما) هنا ولم تتحايلي كي لا يختل الوزن فهو سيختل طبعاً .والأمر نفسه ينطبق على المقطعين (عاينت ليها اتبسمت، وحمرت ليها )برضو اتبسمت. برضو دي كسرت الوزن ولديك بالتأكيد قدرات لتلافي ذلك.
لكن الأهم من هذا كله أنك تكتبين القصيدة بلسان رجل فما الداعي لهذا التقمص وأنت حجة آمنة.
لم يعجبني ان تكتبي باسم قلم في هذا البورد.لقد ظللنا نحارب هذه المسالة هنا في البورد منذ عام 2004 فالشخص الذي يكتب كلاماً يجب ان يكون مسؤولاً عنه والإبانة بذكر الاسم كاملاً تخدمه.
هناك نقاط كثيرة في النص يمكن مناقشتها وهو يفصح عن قدرات شعرية لديك بائنة تنتظر أن تعملي على صقلها أكثر بدلاً من الانتقالات بها من موضوع لموضوع داخل القصيدة نفسها.

واخد بالك يا بابكرgap
كان قايلني راجل، واااي

المهم
قام وليد المبارك الشهير بالشفت جا قال ليو :

مرحب استاذنا بشرى الفاضل

Quote: لم يعجبني ان تكتبي باسم قلم في هذا البورد.لقد ظللنا نحارب هذه المسالة هنا في البورد منذ عام 2004 فالشخص الذي يكتب كلاماً يجب ان يكون مسؤولاً عنه والإبانة بذكر الاسم كاملاً تخدمه.
،،،،،،،،،،،

حجة امنه هي امنه حسين .. وحجة امنة هي كنيتها التي تعرف بها في كل الاوساط داخل الاسافير وخارجها
من تكتب هنا هي حجة امنة اقول ذلك وانا متاكد
لانها صديقة عزيزة واعرفها معرفة فيزيائية

باقي المداخلة يتبع للأهمية gap

[حجة امنة]

قام أستاذ بشرى الفاضل جا رد :

في هذه انت محقة يا آمنة حسين .إذ يمكنك مخاطبة رجل طوال القصيدة. لكن الذي يخاطب ليس آمنة حسين بل الكائنة فيها التي تقوم مقام الراوية في الحكايات.أنت حين تكتبين الشعر يا آمنة تكونين آمنة بلاص(+)، أكثر من كائن بشري..في هذه معك حق يمكن للشاعرة فيك ان تخاطب الرجل .لكن شباباً وكتاباً كثيرين اعتادوا أن يظهروا لنا الذات في كتاباتهم بلسان المخاطب* (انت تفعل كذا أنت كذا) بينما يقصد المرء ذاته الشاعرة .ومن هنا تجيء احتمالات الالتباس.
PS
* تجدين مثل هذا الأسلوب كثيراً في قصص الكاتب الراحل على المك وهو أستاذي.
(عدل بواسطة Bushra Elfadil on 25-08-2010, 04:01 PM)

عليك الله يا بابكر ركز لي مع ال ps gap

لكين دي ما مبالغة

[أبوبكر عباس]

نص رابع
سميرة راجل بانقا
بابكر عباس
النص:
رحل لفريقنا* و سكن جنب فسحة الدافوري بتاعتنا، سعادة اللواء م: علي بانقا علي، رجل ليهو شنبات، فارع الطول تحسدو علي مشيتو، قال بشرى الفاضل في تشكير بطلته البنت طارت عصافيرها:"اخذت من الضباط أجمل ما فيهم؛ مشيتهم، ومن الناس أخذت ألبابهم"، من اليوم الأول جانا قبل الدافوري يبدا ووقفنا طابور وهرشنا وقال لينا: اسمعوا هوي يا صبيان، إزعاج قبل الساعة خمسة ما دايرو، كورة بعد المغرب يأذن ما دايرها، والبلقاهو قبل المواعيد دي أو بعدها بكسر ليهو كرعينو الاتنين، مفهوم؟

سبينا ليهو كلنا، طبعا بسرنا، وطنطنا وقلنا: هو أهم حاجة في الدافوري، المكاواة بعد المغرب، المعفن دا داير يمنعا ليها، هو رجالتو دي ما بمشي يسويها في الجنوب!! لكن نسوي شنو مجبورة خادم الفكي علي الصلاة
سعادة اللواء بطلع كرسيهو قدام بيتو الساعة خمسة بالتمام معلنا بداية الدافوري وبدخل بيتو مع أذان المغرب.
عشرة أيام بالتمام والكمال، ما دقنا للدافوري فيها طعم وفكرنا نحول ميدان الدافوري شرقا، لكن أولاد فريق تكاريمو كانوا عاملين معانا مشاكل وما بنقدر نمشي للميدان الجنبهم، لعنة الله علي الديش و الدياشة.
اليوم الحداشر جاب الفرج، اليوم داك اللواء ما طلع كرسيهو برة، قبل الدافوري يبدأ قلنا لعثمان مُشكلة: الليلة ما بدقها معانا عشان إنت ما دافع الإشتراك. عثمان مُشكلة ما كضب طوالي شال الكورة وشاتها في بيت اللوا و قام جاري..
إتوكلت علي الحي الدائم و مشيت لبيت اللوا عشان أجيب الكورة وقبل ما أدق الجرس، لقيت ليكم الباب متاكا والكورة بتاعتنا قاعدة مصنقرة براها في نص الحوش، و براحة إدبيت لجوا البيت، وكانت المفاجأة: لقيت ليك سميرة موقفا ليك سعادة اللوا طابور، في نص البرندة، و بتهرش فيهو وصاحبنا بقول ليها: ما خلاص يا سميرة إنتي ما تزعلي و الاهي (و الله) الجُمادة وبقية الحاجات ديك، بكرة بجيبها، وهي تقول ليهو: بكرة شنو؟ هسي دي هسي تلبس هدومك وتدرع عمتك ومن دربك دا تمشي تجيبها... قال ليها حاضر بس إنتي ما تزعلي عشان الضغط...
ختفت الكورة و جري للجماعة، وأطرش ليهم الشمار، عثمان مشكلة سمع الكلام دا، من بعيد وطوالي فللي جري بيتم وجاب ليهو صفيحة واشتغلنا ليهو شغل عبد العزيز بركة:
دياشا.. دياشا.. ووب عليا أنا،
دياشا.. والديش نقلو فتاشة،
كُّر .. كُّرعلي أنا،
و من اليوم داك بقينا نلعب لحدي صلاة العشاء وما شغالين ليك "بسميرة راجل علي بانقا" دا!!
يتكلم معانا نجيب الصفيحة و نشغل الغنا...

* رحل لفريقنا = رحل جنبنا، قدم إلي حيّنا (حسب لغة سحاسيح مدني)

[حجة امنة]

اها أجيك للنجيضة يا "أستاذ" بابكر gap

الفلم العملتو ليك فوق دا بالإضافة لي إنو نوع من جِيه (من جيهه)
بالإضافة لي إنو نوع من جِيه الرقبة و نظام الزول ما قاصد يا عملات أسامة معاوية رضي الله عنه gap
دايره أقول ليك إنو نحنا السودانيين من الحاجات البتغيظني فينا إننا ما بنعرف نسوق (من تسويق) ماااابنعرف نسوق لي رقبتنا.

قول لي ليش يا عملاتكgap

انا أريد الله الما نسيب زول، برااااي بقول ليك ليش

الواحد يكون عامل ليو شغلة و باذل مجهود يفخر بيو و ممكن تكون البلد زاتا تفخر بيو و يخاف او يخجل يعلن عنو!!!

يعجبني جداً بروف (معز عمر بخيت)؛ معز يجي يفتح ليك بوست قدر الضربة يقول ليك انا إكتشفت دوا للمرض الفلاني او انا كسبت جايزة في البلد العلاني
و يجو الناس يباركو ليو و في واحدين تلقاهم يقولو و الله معز دا مغرور و فاكيها في روحو و واحدين عدييييل بيجو يقولو ليو كدا في البوست، بعد دا بيجي بعد يومين يفتح بوست تاني لو عمل إنجاز من أي نوعgap

عليك الله يا بابكر اليومين ديل انا معضوره كلامي الكتير الفوق دا حاول إستخلص منو فايدة
إتصرف ياخgap

[حجة امنة]

دقيقة دقيقة إتذكرت حاجة gap

جبت ليك الفلم دا كلو عشان أقول ليك إنت من الناس البيتعدو على أصابع يدي الواحدة البيعرفو يسوقو لي روحم، و عندي إعتراف خطير دايره أقولو، النصيحة لي الله انا إستفدت جداً من موضوع الترقيم الكنت قادينا بيو ردحاً من الزمنgap

ف شنو، شكراً و الله


الكلام دا ممكن تضيفو في مقدمة الطبعة الجاية

[أبوبكر عباس]

المشاركة الأصلية كتبت بواسطة طارق صديق كانديك

ياخي (وكت) الله فتحا عليك، أكتب في مدني كلام حلو ياخ.

عليك الله سوق أم سويقو، وقهوة ود أب لبدة، واستاد مدني، وميدان بانت، ومدرسة الهوارة وأم بارونة، ونادي الخريجين، وسور حديقة سليمان وقيع الله(بالقديم)،والملجة، والسينما الوطنية، وحموري، وجعفر نوبة، وغير ذلك كثير، كلو يطلع (كيت) في كتاب الجن بتاعك ده؟

غايتو اتلومت الدار دي، باصر لينا نشرمع ناس دار (ميسرة)، كان الله يفتحا عليك بكلام كويس

يا طارق يا أخي، النص بتاع مدني دا، بتكلم عن مدني سنة 1830
وبعدين، لا يخاطب الأدباء مخاطبة ما يطلبه المستمعين
الإحساس أساسي عندنا

[أبوبكر عباس]

المشاركة الأصلية كتبت بواسطة محمد علي

مبروك ....والف مبروك ...

ونكتفي بهذا القدر من المقتضفات حتي لايكسد الكتاب في السوق ...

المهم فاتحه شهيه ممتازه لقراءه ادبيه مغايره وغير نمطيه ...

اها رقم الايداع كم ؟ عشان نباصر دخول النسخ السودان

يا محمد علي يا مٌعجب، إزيك وكيف حالك؟
يا سيدي، نحن لا نكترث للعائد المادي ونكتفي بان نصنع الأمل والبسمة

[فتح العليم]

المدينة بصفة عامة قذرة الي حد البشاعة.

يعني المدينة التي أسسها الشيخ محمد ود مدني السني قبل مئات السنين من هذا التاريخ يقال عليها إجمالا " قذرة الى حد البشاعة. مما يعني أن المجهود البشري المادي الذي بذل خلال تلك الحقبة ضعيف جدا و غير معنوي.[/QUOTE]

هذه هو كتابك ، كلام جيد ومؤثر بالذات لنا انحنا ناس مدني .
وعلى فكرة وجدت نفس الموضوع منشور لك في سودان فور كأول مشاركة لك ووجد اقبالا شديد من القراء
تسلم ياصفوة

[أبوبكر عباس]

المشاركة الأصلية كتبت بواسطة حجة امنة

عليك الله يا بابكر اليومين ديل انا معضوره كلامي الكتير الفوق دا حاول إستخلص منو فايدة
إتصرف ياخgap

تجي وتجيبي معاك نبي الكتابة المرحوم علي المك ومعاهو الجميل بشرى الفاضل وبرضو تقولي إستخلص فائدة؟! زعلان منك
لو ما خائف يا حجة انو سحر وتماضر يزعلو مني كنت بمداخلاتك الجميلات ديل، صنفتك: أجمل زولة في عالم الأسافير كلها
لكن
الإشتراك ما بضر

[نبراس السيد الدمرداش]

المشاركة الأصلية كتبت بواسطة بابكر عباس

قبل صورة الغلاف خليني أوريك بعض المقتطفات من التقديم.
قدم لي الأديب عثمان قصة:
بابكر عباس، أديب خرج من رحم الأسافير، ليحتل مكانة مرموقة بين أدباء الواقع الخالي من دغمسة اللغة.
إستطاع الأديب (أي بابكر عباس) أن يحول مرضه النفسي الكائن خلف شاشات الكمبيوترات في هجرته إلى تفاعل إيجابي دخل وإستقر داخل قلوب مُعجبيه وزرع الأمل في قلوب القراء.

الاديب الاريب بابكر عباس
تهانيّ الحاره واكيد سيكون الكتاب اضافه للمكتبات العربيه
الملون بالاحمر دي صدق فيها وحاة الله

كان التهنئه دي ما عجبتك اعفى لي

[أبوبكر عباس]

المشاركة الأصلية كتبت بواسطة نبراس السيد الدمرداش

الملون بالاحمر دي صدق فيها وحاة الله

أي شئ يا نبراس محمر ومقمر ومشوي؛ بكيفني
والعجب لو جيت الخرتوم وعزمتوني عند عوضية سمك
لكن عليك الله، ما تدفعوني زي ما عملتي معاي قبال كدا انتي وسمرا باكفتريا لذيذ

[جيجي]

بكة ناشر ثقافة اللولوة
مبروك عليك الانثناءات الادبية المبشرة
بعوالم من الابدعات اللولبية

[مبر محمود]

سلام يا بابكر، وشكراً على كوكتيل الجمعة الماتع الذي لا يخلو من الغرض!
بالمناسبة، اليوم وعلى غير العادة، أشتريت لي مجموعة من صحف الخرطوم، وبعد جولة فاحصة على الأعمدة التي يكتبها بعض "الكتّاب!" خرجت باقتراح بسيط مفاده: ضرورة أن يكتبوا في أعلى تلك الأعمدة: "عامود كذا، يكتبه ويقرأه فلان الفلاني"!

يا حجة آمنة، ما تشكري لينا الراكوبة في الخريف، نحن السودانيين ديل -حفظنا الله ورعانا- إنجازنا الوحيد طولة لسانا دي!

[أبوبكر عباس]

المشاركة الأصلية كتبت بواسطة فتح العليم الإمام

هذه هو كتابك ، كلام جيد ومؤثر بالذات لنا انحنا ناس مدني .
وعلى فكرة وجدت نفس الموضوع منشور لك في سودان فور كأول مشاركة لك ووجد اقبالا شديد من القراء
تسلم ياصفوة

يا فتح العليم، يا أخي، عليك الله، ما تتحسس
مدني شنو؟ أنا كاتب عالمي، وأحاسيسي الأدبية لا تعرف المجاملة والحدود
أعفي لي

[أبوبكر عباس]

المشاركة الأصلية كتبت بواسطة مبر محمود

سلام يا بابكر، وشكراً على كوكتيل الجمعة الماتع الذي لا يخلو من الغرض!

الغرض منافسة تماضر على البانر فقط
أي شئ يجول براسك لا يعبر عن كاتب البوست والكتاب