اقتباس:
المشاركة الأصلية كتبت بواسطة عبد المنعم حضيري
التقومك من أهلك مريوق تغشيك أم شانق وتبيتك مرزوق
كدي النرجع شوية يا جماعة للمثل دا ونشوف معناه حسب رؤيتي وبعدين يمكنكم التوغل في متن القصة أو الرواية وإستخلاص المراد.
مريوق معناتا غير فاطر يعني لم تفك الريق بعد وقد تم شرحها بواسطة الإخوة ووجبة الإفطار تسمى فكة الريق وعند بعض الناس فكة الريق شي بسيط يَتَبَلّغْ به الشخص (وبالذات المزارعين) حتى لا يشربو الموية وهم خاوي البطون لأنهم بيصحو بدري واليوم عندهم يبدا بعد صلاة الفجر مباشرة وغالباً ما تكون أي حاجة بايتة زي كسرة أو قراصة يقرضا الواحد مع الشاي ...ووجبة الإفطار (زماااان) كان مواعيدا بين الساعة التاسعة والعاشرة صباحاً وبالتالي تكون فكة الريق عبارة عن سندة تعين الشخص حتى يحين موعد الفطور (إنتهى)
اليوم (زماااان) كان فيهو تلات وجبات غير السندات (فطور وغداء وعشاء) وبإسقاط المثل على ذلك الزمان يكون المعنى المراد..... أن المصيبة أو البلوى التي تجبرك على الخروج من دارك وأنت مريوق من هولها وعِظَمِهَا تغشيك قرية أم شانق غصباً عنك.... وإذا غشيت أم شانق فأقنع من وجبة الغدا طب ثم تخرج من أم شانق وأنت لا فطور لا غدا لتجد نفس بايت في مرزوق التي لن تجد فيها عشاء برضو.
وأهلنا زماااان ... لمن كنا نزعل ونحرد الأكل ونخرج من البيت زعلانين يقولولونا .... تمرق من بيتك حزين تمشي تلقاهو الفرح وين ..... ولعل هذا المثل يقع على المثل موضوع البوست ويشرحه.
أخونا أبو بكر أرجو أن أكون قد وفقت في الشرح
تحياتي
|
عبد المنعم الحضيري
تحية واحترام
يا اخوي تعرف اي حرف تكتبه وتنثره هنا هو محل احترام وتقدير
تحليلك منطقي خالص ..
لكن كاتبي المفضل بيكو ده زول كتااااااب يعلم الله
وما اعتقد بإنو الحكي لازم يطابق الواقع ولا شنو
بالنسبه للمثل يعني
ياخي مثل مثل ساكت كده ياخ
ههههههه
يعلم الله انا مستمتع بالبوست ده في كل حرف بيتكتب فيه لو من المتداخلين جت عليهم ولا من كاتبي المفضل بيكو ده
شكرا ليكم عطرتو محاثيثنا ياخ
