الاعزاء حافظ وشبارقة
انا اتربيت في مدينة الحصاحيصا، والخريف هناك له طعم آخر
اتذكر بوضوح لمن تتجمع غمامة حمراء ضخمة من ناحية الشرق وتبدأ في الصعود بسرعة ناحيتنا، الجماعة يقولو ليك الهوا اتقلع! قصدهم التراب
بعد شوية تبدأ تهب النسائم الباردة المشبعة بالغبار ورائحة الدعاش، احساس لايمكن وصفه ابدا حاجة ممكن تحسها لكن مابتقدر تعبر عنها بالكلمات، احساسك الداخلي بقدوم الخريف
قبل كم يوم كنت بحاول اوصف لزميلي الاماراتي الخريف في السودان لمن وصلت مرحلة وصف الدعاش لقيت نفسي بوصف بي يديني واقول في كلام كتير ماعندو اي معنى، في النهاية قلت ليهو يازول بس ماعندك حل غير تمشي معاي اشممك ريحة الدعاش عشان تفهم
امي عندها مثل دايما بتقولو، (الشوكة من تبتها والعينة من نقطتها)
وكانت دايما بتقول ان اول نقاط ماء في اول مطرة في الخريف هي البتحدد لو الخريف ناجح او لا حسب حجم النقاط
سؤال:
حصل لاقتكم ريحة الدعاش في اي مكان غير السودان؟
