شعر منداح تماماً

[بابكر عباس]

عماد الماحي
و الله داير أجاملك في البوست دا
لكن منداح دي معقداني و ما عارفها كلمة كويسة و لا كعبة!

[imported_عماد الماحي]

شنو يا عبس أراك كمن عبس و تولى .. عن دخول شيء أعجبه فأحجم عنه خوف من ظن داخل روحه لم تضئه كل هذه الكلمات الجميلة هل أقول فيك يا عبس كما قال المتنبيء:
إذا ساء فعل المرء ساءت ظنونه و صدّق ما يعتاده من توهم ؟
هل صارت اللغة فخ ؟ دا ما كلام زعل يا ابن عباس ولكن أعرف نكتة تقصدها بهذا التعبير ..
و الله يا – ابن عبّاس – كلمة – معقداني – التي أتت منك – حبلتك – و دي من جعلتك حبلاً لأن الحبل لا الرجل هو ما يعتريه – التعقد – أو الخيط يتعقد و لا أتركك حتى و أنت تستحبل أو تستهبل على لغة أنت تعرف معنى كلماتها و أنا لم أقل – أُبتليت حيزبون بأكل الاستمصال فأصابها لأجله استمصال، و الفدوكس مفترس – لأن اللغة تنداح منا نحن السوقة إلى أمثالكم الجهابيز فلا أراهم يكتبون لعمري حرفاً يزين هذا الجمال الذي نحن فيه دونهم حتى نتشاركه .
وعلي بانطلاق تكتب في هذا المقام وما تخاف و تنداح دي يا ابني يا عباس
كما قال سميك - اسمه زي اسمك يعني - قال ابن الرومي يصف خبّازا و هو علي بن العباس ، من أصل رومي (يوناني) مسلم ، أمو فارسية بقولولا (حسنة بت عبد الله ).
يقول :
ما أنْسَ لا أنْسَ خَـبّـازاً مــرَرْتُ بهِ يدْحُو الرُّقاقَةَ وشْكَ الَّلمْح بالبَصَرِ
مـآ بيــن رؤيِتهـا في كَــــفِّـهِ كُرَةً وبيْنَ رؤْيــتِها قَـــــوْراءَ كالــقمرِ
إلا بــمقدارِ ما تَنــداحُ دائرةٌ في صفحةِ الماءِ يُرمى فيه بالحَجْرِ
**
انداح خلينا النرتاح ..
فيا ابن عباس لمن ترمي ليك حجر في موية و سطح الموية تطلع فيه دوائر تكبر شوية شوية لي برة يعني تنداح .. أها دي تنداح أي تبدأ بشيء صغير و يكبر .
إذا حبيت الاندياح في الموضوع دا تعالي لي برواقة انداح معاك.
لو داير تنداح مع الشعر تعال خش توش و انداح ..
و الزعل ممنوع و الخوف ممنوع ..
تزعل من منو و تخاف من شنو كل الناس أهل كل الناس أحباب
وياخي انداح من هناك ..
وقلت لي شنو؟

[imported_هند محمد]

المشاركة الأصلية كتبت بواسطة عماد الماحي

الزول في الريد كان قلبو حاراً ما بتجمد
أكيد بريد هند السمحة بنت محمد
وكان دقس قال يحب الود اللذيذ عُمّد
من هسة بقدح الرماد الجماعة تبدأ تترمّد
**
و يا إنت الهندي أنا ما بدي
ولا بحر الشوف تقدر تعدي
أقول ليك سمنة و تمر هندي
تقول لي دي شني دي ؟؟!!

ياخي تخ
انا دقيت عليك مسكول
وكنت بفكر ضلعك محشي
اتاريك كنت بتلعب كورة
وتدهن ردي بزيت الخروع
أنا صدقت الفي توقيعك
نقعتك في الطايوق ومشيت
وكت فطيت احساسي وفتا
شفتك زي مصفاية الزيت
وأنا صدقتك
وقلت أمبيرك هاي في العالي
لقيتك بره الشبكة نهائي
الريده الليلك .. مالحة زيادة
وأنا ضغطي معلق في الترقابة

هجاء في فطة ردي ليك

[imported_عماد الماحي]

الهندي أنا ما بدي ..
**
يوم فطيت إحساسك
أنا كنت بقاوم
في برد الريدة المنك جاني
جمرك ولع و ما دفاني
و أنا أنفخ أنفخ نار الشوق قايداني
سعيت هبابة ..
هبيتك .. هبيتك جد
الناس عرفوني
كلامن فاتا أضاني
(هبيتو ما هباني)
أبقى عارف يا مدلل تاني
يا اللي قوامك تاني
ما بهبك غير محبك
كدي حاول تاني
بردك تاني أتاني
جبت بكتة بططّن ما كفاني
دبلت اتنين
بردك طنش .. و أنا جسمي اتكنش
يا برد الهند الجيت بي ريدك
يا حب القر
أنا عرقي يخر
أحمق و عُر
جعلي مشلخ تي
متقريف أشرب تي
أنا قلبي الفرمتي
قعدتي في غرفو اتفرجختي
لو بي إيدي اهدي
أنا كنت تلاتة حروف أدي
أيتش و انْ وحرف الدي ..!!

[imported_عماد الماحي]

سارة ..

سارة تظل سارة
لو ضاحكة لو صارة ..!!
لو صالحة لو ضارة ..
كان باردة كان حارة ..
لا حولة من نورا
نجمة و تجيك خارة
**
سارة ..
يا فلقة الشعر الجميل
يا فارعة الحرف النبيل
تاوقتا ليك
فكيتي من فوق ضحكتين
نطيت قبطهن و بسمت ليك
فرحت اتشعبطت فيك
و طلعت لمن جيت جنب وشيك
آه يا قلب من موسم الريدة الوشيك
اتكبكبت ..
اتحوقلت ..
لميت شوية ريق
واتوكلت عليك يا الله
و ما زلت بعاين فيك
هي كدي النسعلك
الغبا اليغبيك .........
ريسنا مش كانديك؟

[imported_elle]

ما بتعجبني لمن تبقى هادي

ولمن تقرا أفكاري و كأنك

بترسم قلبك الأحمر بشطة

جديدة وحارة في صحن الزبادي

ولا بتعجبني لو حاولتا تقشر

تطقم بي حزام بني ورمادي

ولا بتعجبني لو تعزمني مرة

على ود اللمين في اي نادي

ولا بتعجبني لو جكينا جكة

وغلبك تجري من اول تبادي

ولا بتعجبني أصلا وإحتملني

فحاول مشي لي موضوعي عادي

[imported_هند محمد]

المشاركة الأصلية كتبت بواسطة عماد الماحي

الهندي أنا ما بدي ..
**
يوم فطيت إحساسك
أنا كنت بقاوم
في برد الريدة المنك جاني
جمرك ولع و ما دفاني
و أنا أنفخ أنفخ نار الشوق قايداني
سعيت هبابة ..
هبيتك .. هبيتك جد
بردك طنش .. و أنا جسمي اتكنش
يا برد الهند الجيت بي ريدك
يا حب القر
أنا عرقي يخر
أحمق و عُر
جعلي مشلخ تي
متقريف أشرب تي
أنا قلبي الفرمتي
قعدتي في غرفو اتفرجختي
..!!

كل صواري
القطب الدشت ريحو شمالي
شافت فيك أكبر تلاجة

أي جليد كندك كل حاسه
ماكان الاكثافة ريدك
لمن جات سحقت إحساسي
ماهو جليدك أنتا أساساً !!

الهبوت كان وعدك ليا
كان هببتا النار القايدة
كان الريد جواي اتفرطق
كنت لقيت احساسي مكهرب
زي الصاقعة
كنت بقيت أكبر دفاية
وكان نجضتك
كان نجضتك في الشواية
لما تكاكي ..
القر الينفخ في جنحاتك
وتبقي مشلخ ديك وكوالتي

انا مامتقريف أشرب شانتي
وأصلا جافا هواي اتسكرب
وكل فورماتك فل مليانة
زي البص الساعة 3
عايزني كمان اركب كمساري ..!!