الأحباب الأعزاء المتداخلين هنا بالمداخلات وبالقراءة
سلام ومحبة وشوق وتوق إلي رؤياكم جميعاً ...
نعم عاوز أعمل إنقلاب
بس مافيه لا دبابات ولا رصاصات طائشة أو صائبة ...
إنقلاب رسمي عديييييييييييييل كده ...
حأدخل الإذاعة والتلفزيون وبالحسنة وكحق شرعي لي كمواطن سوداني
الإذاعة والتلفزيون ديل حقاتي أنا كمواطن ومن حقي أدخلهم في أي وقت شئت أنا
أصدقائي وزملائي من الفنانين في الإذاعة التلفزيون (معدين / فنيين / مخرجين )حيساعدوني في فكرتي المنطقية دي ...
أها ...
أقول للشعب السوداني البسيط ده جاكم بلاء ...
البيان الأول:
أنا ناصر يوسف مسكت مقاليد الحكم في الوطن الجريح ومجروح من أفعال أبناءه السياسيين البلهاء ...
والبقول بِغِم حأوديه التوج
ما عندي محسوبية ولا ده ود عمي ولا ده من الحزب الفلاني والفلتكاني ولا عندي حاجه إسمها صالح عام أو غرقان
عندي حاجه إسمها عمل لأجل الوطن والعاوز يشتغل معاي اليجيني جاي
طيب حيجيني زول ويقول لي الكيزان المسكوا الواطاة ديل شيلهم للصالح العام
حأقول ليهم أبيييييييييييييييييت ما بشيلهم فقط عشان هم كيزان
حأشيل أي زول عواليق قاعد ليه في حته ما حتته
ولو كلهم مؤهلين وقاعدين في مواقع هم أكفاء ليها حيواصلوا وبرضو بشروط العمل لأجل الوطن
بيان رقم إتنين:
ما عاوز أسمع لي تاني حاجه إسمها أحزاب ولا جماعات ولا معارضة زاتو 53 سنة سويتو فيها شنو ؟؟؟
التحزب لأجل الوطن وبس وأي تحزب تاني ما عاوز أسمع بيه ومرفووووووووووض تماماً
بيان رقم تلاااااااااته:
كل المؤسسة العسكرية إلي سكانتها خارج المدن ... أُكرر خااااااااارج المُدن .. ويحق للمواطن إنو يضرب أي عسكري متعنطظ وبيقل في أدبه بلا شرطة مجتمع بلا لمّه
بيان رقم أربعة:
إلغاء مفهوم تحرير السوق لأنو جلب علينا الغِش والغلاء ونرجع تااااني لحكاية تحديد الأسعار
والراجل فيكم يا تجار السجم اليدس ليه شوال بصل سااااكت إلا أخليه يقطعه وياكله كلووو في فت قعده ..
بيان رقم خمسة:
كل أعمامنا وعماتنا وخيلانا وخالاتنا العمرهم فوق الستين يروقوا في عِلَبهم ويستمتعوا بحياتهم ويبعدوا لينا من أي ممارسة تنفيذية
بيان رقم ستة: (وده مهم شدييييييييييد)
أعمامنا ورؤوس بلاءنا من السياسيين بدءاً بــ :
بابا نميري مروراً بناس عمنا عمر البشير والترابي والصادق المهدي ومولانا الميرغني ومحمود حسنين وناس نافع وعلي عثمان وأبيل ألير وسلفاكير وبونا ملوال ود. خليل وناس منو ومنو ديلك رؤوس بلاوي السودان كلللللللهم
خصصنا ليهم مأوي جميييييييييييييييل يدخلوا فيه وما يمرقوا إلا علي القبور .. فيه أي حاجه حتلهيهم عن التمسك الأرعن بالسلطة إلا الإتصال بالخارج لا فيه تلفون أرضي ولا جوال ولا ثريا ولا عشه أختها زاتها
(هو زي السجن وما هو سجن) يعني زي الإصلاحية ديك بتعرفوها ؟؟
ونقول ليهم شكراً ليكم علي بلاويكم السويتوها في الوطن الجريح ويلا إرتاحوا وقضوا بقية عمركم ده في رواااااااااقة ..
الداير كوشتينة بيلاقاها والداير ضمنه بيلقاها والجرايد اليومية حنجيبها ليكم علي طول وحتي أكلكم وشرابكم ده علينا ... إنتوا ما ما قصرتو والله فينا تب وإنتو آباءنا وكبارنا ولازم نحترمكم ولا شنو ؟؟؟ ..
بيان نمرة سبعة:
التعليم آآآآآآآآآآآآآخ أنا من التعليم ... سنعيد للتعليم سيرته الأولي وحيكون المعلم هو المواطن رقم واااااحد ومن الدرجة الأولي .. ونعلن عن عودة معاهد التربية (الدلنج / شندي ... إلخ وكليات المعلمات) واليوم نلغي مفهوم مرحلة الأساس والعودة إلي النظام القديم كتسلسل منطي (خلوة / روضة / إبتدائي / ثانوي متوسط / ثانوي عالي / جامعة)
ويجب إعادة النظر في مفهوم المناهج وإختيار مناهج علمية أكثر منها نظرية عاوزين نخرج علماء فاعليييييييييين وليس منظراتيه لو تكرمتم يا أساتذتنا الأجلاء.
بيان رقم تمااااااانية:
المعاشيين لاااااااا حولة ولا قوة إلا بالله العلي العظيم ... كل إنسان وصل مرحلة المعاش يعيش بسلام وفي أمن أمان وياخد حقه من الحكومة علي دااااير المليم ... واليوم نفتح ملف شركة المعاشيين القااااااااابضة (قروشهم دي مشت وين ؟؟؟) وحيديروا الشركة دي المعاشيين بأنفسهم بعيد جداً عن أي تسلط حكومي عليهم مش كفاية إنهم بنوا السودان ده كلٌ في مجاله ؟؟؟ وطيب ...
بيان رقم تسعة:
اليوم أي شاب ما متزوج وعاوز يتزوج بس اليجيني ويقول لي داير فلانه بت فلان وبت فلانه علي كتاب الله وسنة رسوله (ده للمسلمين) وحتي المسيحيين برضو وبقية الأديان ولا دينيين ... المهم في الأمر الزوااااااااااااااج .. وأي بت عاوزه تتزوج حبيبها وأهلها واقفين ليها في حلقومها ده ورافضين التجيني وتكلمني ... بعد أسبوع من الآن جميع شابات وشباب السودان الما متزوجين عاوزهم يكونوا إتزوجو .. الكلام ده مفهوم .
حينط لي واحد ولا واحدة ويقولوا لي ... طيب الشباب الما شغالين وأم البت العاوزة كم في كم ديك ولا البت البتتدلع وعاوزه يجيبوا ليها لبن الطير ... عليكم أمان الله كلو يطير ليهم من عقلهم بس اليصولني ويكلموني .. وده قراااااااااااااااااار حكومي رسمي بعد أسبوع كل شابه وكل شاب في عمر الزواج يكونوا إتزوجو الكلام ده واضح ومفهوم ولا لأ ؟؟؟
بيان رقم عشرة:
تقرر إلغاء تسمية وزارة الشباب والثقافة والرياضة وفصل اللاته من بعضهم وتكون كل وزارة قائمة بحالها .. يعني وزارة للشباب ووزارة للرياضة ووزارة للثقافة والفنون بحالها .. والأخيرة دي حيكون وزيرها محمد وردي شخصييييييييييياً ووكيلها ديرك أويا الفريد ... في زول عندو مانع ؟؟؟ اليبلعو مانعه ولا رأيو ده .. إنتهي
بيان رقم حدااااااااشر:
مجلس الشعب القومي أو البرلمان سموهو بأي إسم ، حيبقي هو الجهة الشرعية ولها الحاكمية الأعلي وفوق هامة الرئيس (أنا ظاتي) .. لكن كيفن ؟؟؟ أول حاجه منو هم أعضاء المجلس الأعلي للشعب ؟؟؟ مواصفاتهم شنو ؟؟؟ حتقولوا لي إنتخابات شرعية وديمقراطية وشنو شنو داك وجهوية وترضيات سياسية وووو ده كلام فااااااااااااارغ ... حيتم إختيار عدد من أبناء المنطقة الواحدة عشان يترشحوا وبمواصفات محددة (ناس متعلمين / مثقفين / أفقهم أعلي من سقف مناطقهم ويصب في قالب الجميع – الوطن ) وفوق للبرلمان حيكون عندنا لجنة أعلي من البرلمان نفسه تسمي بلجنة الإنضباااااااااااااااط والمتابعة – ودي أعضاءها هم كل أفراد الشعب السوداني الجريح كلللللهم ..
بيان رقم: إتناااااااااااشر:
أنا زهجت من البيانات والكلام المشربح الكبااااااار وماشي أفطر فول وطعمية إتفضلوا معاي
|
