محزن ماقرأته....
كتبت فى قريتنا المجاورة على قوم بيان الله يطراها بالخير
التالى
{{ ازيك ياخالد
لىّ رجاء وانت فى كوستى
كوستى لا تكون حبيبة الاّ حين نذكر كل من عطروها بسيرتهم
احد هؤلاء معلمى استاذ الطاهر
درسنى لغة انجليزية فى المتوسطة
وكانت له مكتبة نهلت منها المدينة لما كان يميز كتبها وقيمتها المعرفية والثقافية
مكتبة رحمى- كانت فى نفس صف السنما الوطنية
بعد الانقلاب هاجر استاذ الطاهر مع اسرته الى القاهرة وقدم لاعادة التوطين
قمت بزيارة اسرته فى الاسكندرية فى عام 1999 وحكى لىّ تفاصيل رحلة الشقاء
تواصلنا لزمن ثم انقطع التواصل بيننا
عرفت من ابى انه رجع للسودان وكان مريضا
ثم رجعوا مرة ثانية الى مصر
لو سألت اى زول فى الرديف بيوصف ليك بيتهم
استاذ الطاهر احد الذين ينبغى ان يرد لهم اعتبارهم
لما قدمه لنا وللمدينة من معارف
اكون شاكرة لو لقيت اى اخبار منه ومن اسرته ولو فى تلفون رسلو لىّ على ايميلى الموجود فى البروفايل
شكرا ليك مقدما ياخالد وياريت تستعين بصلاح عوض الله }}
إتصلت بى ابوى قبل يومين وسألتو من استاذ الطاهر وقال لىّ اظنو لسه فى القاهرة
طلبت منو يرسل المغداد اخوى الرديف يسأل منو ومن اسرتو وكنت منتظرة الرد.. منتظرة تلفون ليهو عشان اتصل بيهو ونحكى. واذ بى اتفاجأ بانه غادر عالمنا... يالله
غادرها ومازالت بيننا حكايات لم تكمل وشجون تخص المدينة
ومازالت صورة استاذ الطاهر بقامته الفارعه وحلمة الممشوق ان نكون بنات للمعرفة تلاحقنى
هذا الطاهر الذى ذهب تاركا غصة فى القلب ورحل.. رحل ومازالت مكتبة رحمى- بتزكريها يا آمال.. جنب السنما واقرب لبيت ناس منقاوية, اجىء محملة بالكتب واغشاهم فى بيتهم, خالتى مريم الله يرحمها والدة ايمان ترحب وهى هشة وباشة, ادخلى يابت حليمة اشربى ليك شاى بى لين...
ياربى...
كم سلفنا من الكتب
وكم ناقشنا فيها حين استرجاعها
وينبهنا على الكتب الجديدة
ياربى...
كان كل حلمة ان يبنى لاطفاله مستقبلا , مانح المعرفة ما استطاع ان يمنح صغاره المعرفة التى عشقها
رحل ورحلت بدموعى الى هناك... يالهذه الدنيا... مسيخة والله
مرات تصيبك اللاجدوى من كل شىء
طيب لزومو شنو كل ده اذا فى النهاية بنموت..
طيب لزومو شنو التعب والاجهاد واللوعة والكلام اللى بينتهى بردمة تراب..
عزرا ..مازلت تحت تأثير ماقرأت الآن
ستمضى اذن الحياة...
وسنكسيها بالمعرفة- احدى هموم استاذى ومعلمنا ومربينا الطاهر
رحمة على روحك الطاهرة..
|
