اتفضلوا فى بيت أسامة

[معتصم الطاهر]

اقتباس:
المشاركة الأصلية كتبت بواسطة بابكر مخير

كدي يا أخونا
عايزين تصميم "للشبر" القدامنا

يا رب
شبرك ناصية فاتح شباك وباب على الفردوس ..

[معتصم الطاهر]

اقتباس:
المشاركة الأصلية كتبت بواسطة نبراس السيد الدمرداش

يا باش صباحاتك
وصباحاتكم جميعا

اها الاستثمار دا ممكن يكون بعمل سلم خارجي منفصل عن مداخل البيت

صاح
و ممكن يكون داخل البيت و فاتح برة ..

و ممكن يكون زى فكرتك الاولى ( بيت عكود و كيشو)..جزء من الطابق الاول غرف الموم والباقى للايجار ( بسلم داخلى)

[معتصم الطاهر]

يا جماعة
كايس مداخلة الامين العام

سحبها و دخل بالعراقى ولا شنو ..؟

المهم ( نوّر بوستنا ) ..

[أسامة معاوية الطيب]

المشاركة الأصلية كتبت بواسطة بابكر مخير

كدي يا أخونا
عايزين تصميم "للشبر" القدامنا

داك بيتصمم بأعمالنا يا حبيب ... ربنا يعدل طريقنا كلنا يا رب

[معتصم الطاهر]

أسحب يا عباس ..

انت ماشى كويس جدا ...

[أسامة معاوية الطيب]

المشاركة الأصلية كتبت بواسطة معتصم الطاهر

أسحب يا عباس ..

انت ماشى كويس جدا ...

كلامك محفز يا سيدي
ومنتظر الملاحظات

[بدر الدين اسحاق احمد]

المشاركة الأصلية كتبت بواسطة معتصم الطاهر

[frame="5 10"]
أسامة معاوية الطيب .. وآل سودانيات يدعونكم لتصميم منزله الكائن فى قلوبكم ..
تبدأ الأفراح من هذا البوست حتى صبحية ضبيحة الخروف حين الافتتاح ..
[/frame]

ربنا يتم على خيــر ..

والسايقة واصلــة

نقول يا معيــن

[أسامة معاوية الطيب]

المشاركة الأصلية كتبت بواسطة بدر الدين اسحاق احمد

ربنا يتم على خيــر ..

والسايقة واصلــة

نقول يا معيــن

انت يا بدرالدين مسؤول من الخير بي اسلاشاتك الكتيرة دي ما عندك في الهندسة ؟؟
ياخي كتر خيرك والسايقة واصلة ... الا ساقيتكم دي ابت تصل كلو كلو ... تكون مالا

[ام التيمان]

سلام عليكم يا اهل الدار
ان شاء الله دارنآ ترحب بيكم
جايبين قهوتنا نشربا معاكم فى ضل شدرتكم السمحة دى

[الأغبش]

سلام ياباش ..جيتك بي رواقة
لما بدأت أفكر في بيتي ..وبالمناسبة زمان كان عندي تفكير انو أصلو ماممكن في يوم يكون عندي بيت ...
كانت في ذهني هذه الأشياء ..
1/ أولاً مفروض يكون بيت مختصر ما كبير ومكلف وما صغير وضيق
2/ فصل تام بين الشفع والضيوف وغرفة النوم
3/ مع مراعاة نمة 2 اعلاه غرفة الاطفال ما تكون بعيدة شديد عن الأم لاحتياجها لذلك خاصة بالليل ..
4/ الصالون يكون مفصول ومافي حاجة اسمها باب داخلي ليهو ..مستعد ألف بالصينية الحوش كلو مافي مشكلة
5/ أهم حاجة صالة خارجية استقبال نسوان (ناس الحلة الراتبين وليس الضيوف)عشان البيت بالداخل يكون مرتب ونضيف ..ولو مافي ضيوف تكون للشفع وشاي المغربية وحاجات زي دي ...
6 / غرفة مكتب عشان ترتيب البيت برضو مش كل ما ترفع مخده يلاقيك كتاب وللا كراس ..
7/ المطبخ يكون في زاوية وبعيد من غرفة النوم
8/ حمام داخلي واحد لغرفة النوم والباقي في الخارج

لما عملت بيتي حاولت اطبق المطلوبات دي لكن زي ما قلت ليك مرات بتكون متناقضة

قمت أول حاجة فصلت ليك الدين عن الدولة عملت غرفة النوم وفاتحة في غرفة المكتب ومعاها الحمام ..وفصلتهم بباب عن الصالة وغرفة الاطفال ..وطبعا الصالون شرق الصالة وغرفة الاطفال .. وأسي مؤجل هو والصالة الخارجية ..
بعد البيم بتاع الساس مباشرة اكتشفت انو انا دقست في غرفة المكتب ..مفروض تفتح في الصالة أو في الخارج عشان لو معاك زول ممكن يدخل عادي خاصة انو ممن تستخدم كعيادة منزلية (مجانية )من حرمنا المصون ..لقيت ليك صعب انو تتغير لأنو مساحة غرفة النوم اربعة في اربعة والمكتب اربعة في تلاته .. دي مشكلة قائمة لو بتقدر تحلها ..
تانيا لقيت ليك المساحة للصالة الخارجية مع المطبخ غير كافية ..قمت غيرت المطبخ وديتو كورنر بقي خارجي ببابين ..لكن المشكلة بابة المقابل البيت المدخل ليهو الباب الخارجي بتاع الجزء الخاص الفيهو غرفة النوم والمكتب ..يعني حايبقي زريعة في المستقبل للدخول ولخروج ..ودي المشكلة التانية ..

الحلول ..1
/ فكرت أبني في السطوح غرفة نوم وحمام وأحول التحت كلو لي غرفة مكتب واطفال وصالة .. بتواجهني مشكلة السلم لأنو ما عملت حسابو قبيل وبالتالي إلا يكون خارجي ..
2/ وهنا في مشلة برضو غرفة النوم مافيها طائر في السقف وفي الحالة دي لو بنيت فوقها الشبابيك بتكون في الشارع وبتكشف الجيران خاصة انو المنطقة غير مرخصة درجة اولي لكن الجيران لا يمانعون في الطابق الثاني ..

طبعا ما بعرف ارسم زيك عشان اجيب ليك الخرطة ..اتخيل معاي شوية ..

أها نشوف رايك

[أسامة معاوية الطيب]

المشاركة الأصلية كتبت بواسطة الأغبش

قمت أول حاجة فصلت ليك الدين عن الدولة
أها نشوف رايك

الأغبش سلامات : دخلنا الغريق وواضح جدا انو حا نستفيد استفادة جد لحدي ما نلقى القروش البنبني بيها
أنا مافاصل الدين غايتو ... لحدي اسي ... قت اول شي الم في الدولة بعدين الفصل دا ملحوق
والله كلامك القتو دا لو لحق الباش رسمو لينا يقرب لينا الصورة والواحد يقدر يتخيل الممكن والمستحيل

[عكــود]

باشمهندس أسامة،

ياخي والله أنا متكيّف من تطوّرك المهني المضطّرد.
وعاجباني برضو تجربة اللغبش الما عندو مانع يلف بالصينيّة الحوش كلّو كِرمال فصل الدين عن الدولة.
بس اللّقولّك، السلّم تعمل حساب إنّو يكون خارجي وداخلي في نفس الوقت،
يعني بابين. ما تقول لي أنا أساساً ما ناوي أعمل طابق فوق، الظروف بتتغيّر.
وبرضك لا تقول لي أنا ما ناوي أؤجّر.
و بتابع معاك.

عندك مقاول وللاّ أدّيك توصية (عن تجربة)؟

[أسامة معاوية الطيب]

[QUOTE=عكــود;325142][COLOR="DarkRed"][SIZE="4"]باشمهندس أسامة،
شايف يا حبيب انت ما سوتلك شي وانا بتريحني شوية

انا قبل المقاول دايرلي زول يديني القروش
وكلامك على العين والرأس والباش يسمع ويقول

[عكــود]

شايف يا حبيب انت ما سوتلك شي وانا بتريحني شوية

ذكّرتني نظريّة ودبادي، هو طبعاً سريع خلاص في شكّير الناس، حتّى السجمانين منهم، والعجب لي أطفالو حتّى إن خمّجوا (الله يحفظهم). أقولّو يا ود بادي ما تخاف الله ياخ، هسّع الزول ده قدر شكرك ليهو ده؟ وهنا يأتي بالنظريّة القائلة، ما دام أصلو الحديث ماهو بي قروش، وبيبسط الناس، حابسنّو منّهم لي شنو؟
ياهو قولك، نحن آب يسوّيلنا شي، وبيريّح المُخاطَب.

[الأغبش]

المشاركة الأصلية كتبت بواسطة أسامة معاوية الطيب

الأغبش سلامات : دخلنا الغريق وواضح جدا انو حا نستفيد استفادة جد لحدي ما نلقى القروش البنبني بيها
أنا مافاصل الدين غايتو ... لحدي اسي ... قت اول شي الم في الدولة بعدين الفصل دا ملحوق
والله كلامك القتو دا لو لحق الباش رسمو لينا يقرب لينا الصورة والواحد يقدر يتخيل الممكن والمستحيل

رسمت رسم تقريبي في ملف ويرد عادي لكن غلبني انزلو هنا ..
شرح يا محسنين ..