شليل فكرتك في السلك و نحن مجموعة أصحاب كان عندنا تجربة زي دي... في مدرسة في الاسكان الشعبي فيها 90 طالب ديل ما عندهم حق الفطور بشكل يومي, و الموضوع دا عامل أزمة للمديرة و التحية لهذه المرأة الأبنوسة ... المهم المدير حكت القصة دي لصاحبنا و بقي كل شهر بنجمع مبلغ الفطور للشباب ديل... الفطور كان بتعمل في المدرسة ذاتها و بتعملوا الفراشة ال رفضت تشيل اي قرش مقابل الخدمة البتقوم بيها دي... يعني أتخيل لي نشوف المدارس المحتاجة و اي مدرسة فيها فراشة ممكن نتفق معاها مقابل أجر عديل دي بتقلل لينا التكلفة الناتجة من أجرة الركشات و الأمجادات... المدارس الما فيها فراشة ممكن نشوف خالة محتاجة و ساكنه قريب من المدرسة تعمل الفطور...
كل ما في الأمر الموضوع محتاجة لمتابعة, محتاج ناس يطوعوا كل فترة و التانية يمشوا المدارس دي و يشوفوا الامور ماشة كيف... و أنا متطوع (لكن ما في هيئة الامر بالمعروف حقت ناس النور ديك)
-- ------------
تنهيده:
ما تتخيلوا المديرة إتصلت علينا و قالت أن نسبة تسرب التلاميذ السنة الفاتت دي قلة بشكل ملحوظ و كمان لاحظت أن نتيجة الامتحانات أتحسنت من السنين المضت, ما داير اقول دا من المجهود البسيط دا لكن قد يكون له أثر...
|
