اها يا عمو رأفت انا جيتك اتكلمنا عن التربية وانها سبب اساسى فى خوف الانثى نمشى نتكلم عن التجربة
وكيف انو التجربة بتكون سبب يحفر عميقا عميقا فى وجدان اى انثى ويشكل معظم تكوينا النفسى والتكوين ده اكبرو خوف......
يلا التجارب دى نبداها من التحرشات التى تلحق بها وهى طفلة
وانا الخايفة منو بعتقد انو اى طفلة اتعرضت لشكل او اخر من اشكال التحرش
(لفظى.... حسى.... معنوى) لكن اعتقادى الجازم ان ليس هناك ناجية
طيب طالما انو التعرض للتحرش نحن كاسرة لا نستطيع ان ان نحمى طفلاتنا منه
(لانه ممكن يحصل فى اكثر الاماكن البنعتقد انها امنة زى البيت مثلا)
اذن يتوجب علينا على الاقل ان نوعيهن بالمسألة
ودى برضك حاجة صعبة وقاسية جدا لكن حتما ولابد نجد طريق آمن نسلكوا لتوعية طفلاتنا ....
انا شخصيا تجاربى فى الحتة دى كانت قاسية لدرجة انى وصلت مرحلة
من الخوف بقيت عاملة(محمد ولد)مستحيل البس الا بنطلون وقميص وكاب ....
والعب كورة قدم وكورة طايرة اذكر تماما انى كنت بكره حصة العربى فى
الصف الثامن فقط لان الاستاذ كان بضرب بى الامثلة كأن يقول:
(اكلت ماريل التمر) اها شفت من شدة ما انا معقدة ضرب المثل ده كان بيضايقنى
ونجحت ومشيت الثانوى وانا بكره العربى بى سبب الاستاذ
بذكر فى اولى ثانوى دخلت معهد واول يوم جيت داخلة كانت الحصة عربى
والاستاذ دخل قبلى دقيت الباب بذذذذذذذذذذذذكر
نزل النضارة كده شوية وعاين فينى من فوق لى تحت حسيت نظراتو اخترقتنى رغم
انى لابسة بنطلون وقميص وكاب
قال لى(اتفضلى)
دخلت
سألنى (اسمك منو؟؟)
(ماريل) قبل على السبورة وكتب
(ماريل كالقمر بهاء)
كانت الحصة عن التشبيه عارف انا عاينت وراى لقيت الشباك
طفرت بيهو وتانى ما جيت المعهد ده نهائى بس بسبب الخوف
وبقيت طول عمرى اكره اللغة العربية بسبب الاستاذين ديل
*حأقيف هنا واجيك راجعة كان الله مد فى الايام وادانى عافة العضام*
التعديل الأخير تم بواسطة ماريل ; 28-08-2012 الساعة 08:38 AM.
|
