أفتحن البيبان والطاقة ..

[فتحي مسعد حنفي]

المشاركة الأصلية كتبت بواسطة منال

طبعا ما تحكى تجربتك مع الخواجيات الاثنين قطع شك بتكون الاختلافات و الخلافات و رمتك و خستقت بالعلاقتين كمان...لكن حكينا عن الحب الذى جمع بينكم و ام عيالك و الحب الذى تعيشه عاطفة و حنان معاك ... كيف تبادر و تبادل الحب بالحب و الكلام المعسول الذى عو طبعا بنزين العلاقة التى تربط بينكما الى الان .... و لكل العشاق و المحبين ورونا تجاربكم و بكم نقتدى

انتي عايزة تشمتي فيني المجارمة ناس فيصل سعد وباقي المافيا مالك..
الزي ديل ما تغلطي تحكي ليهم حاجة عشان بيودوها التوثيق طوالي وبتدخل الأرشيف لوقت العوزة لكن عشان خاطرك حأديك اختصار لقصتي مع أم أحمد..
زمان في الستينات شفت بت عمتي في زيارة لي شندي ولقيت حاجة كدا زي باربي شعر دهبي وعيون خضر صورة مصغرة من زبيدة ثروت..بيني وبينك دخلت في مزاجي وكان سنها 12 سنة وأنا في امتحان الشهادة يعني لسة قدامي 5 سنين لنهاية الدراسة وقلت أكلم عمتي وأقول ليها تحجزها لي وللأسف عمتي قالت لي ما بتغلا عليك لكن متكلم فيها ود عمتك قبالك واحنا قلنا ليهو علي بركة الله...بيني وبينك جاتني صدمة ومشيت سألتو وقلت ليهو انت يازول بي جدك دايرها فقال لي آى فقلت ليهو مبروكة عليك وزي ما قال زيدان ورجعت حابس أدمعي في الليلة ديك.
المهم قلت انسي الموضوع ورجعت للدراسة ودخلت كلية الحقوق جامعة الفرع وبعد اكتوبر جاتني منحة وأنا في سنة تالتة لتشيكوسلوفاكيا فقررت أسيب الجامعه وأسافر يمكن في السفر أنسي وفعلا سافرت وبرضو ما نسيت واتزوجت المرة الأولي والتانية وبرضو ما نسيت...
بعد 17 سنة رجعت السودان في اجازة وكان زواج اختي آخر العنقود وهناك شفتها في العرس وراسي ضرب وأنا أياميها كنت رجعت من أوروبا واشتغلت في الامارات..عاينت لقيتها محننة حنة عرس فسألت أخواتي هي لسة ما عرست قالوا لي لأ وأظنها فرتقت الخطوبة فدخلت في حيرة وأنا زول متزوج مرتين ما بقدر علي العزوبية تاني وأنا في الامارات براي فقلت أخللي أمي تشوف لي واحدة مطلقة انشالله حتي لو عندها عيال ما بتفرق فأمي قالت لي ليه مش انت كنت داير زمان بت عمتك ما هي فرتقت فقلت ليها حرام أنا زول صاحب سوابق وأطفال وحرام أول عدلا يكون زول زيي فقالت لي انت ماليك دعوة انا بطلبها ليك فاشترطت عليها قبل ما تطلبها تسألها براها ولو وافقت تكمل ولو اعتذرت مافي داعي لضربة تاني علي راسي وبالفعل د الحصل..وطبعا في تفاصيل كتيرة بس ما بتتحكي لكن رايك شنو مش فلم هندي