معتصم ....ياخوي
الله يفتح شهيتك زي مافتحت شهيتي للحكي
اجمل شي طلعت بيهو الليلة انك مازعلان مني في شي فقد ذهبت بي الظنون مذاهب!!
اها جزاء لوضوحك الجميل ده حااتشجع واقول ليك انا بخاف عديل كده من تأملك ورصدك
عندك عين ماشاء الله ،لكن برضو مخيفة ........واقول ليك شي تاني
ناس الهندسة ديل أنا بخاف من تمحيصهم شديد وقوة ملاحظتهم الما بتجلي ابدا عشان كده بمشي منهم مع الحيطة وزي الضل .
وتخيل حكاية الشطار الانت قلتها لي دي منطبقة عليك انت وعشيرتك الشاطرة طبعا وليس تطبعا.
أما حكاية العشرة مواضيع دي ماتربشك دي ممكن تكون حالة دفاعية عشان ما تسألني أنت أو الآخر عموما وممكن تكون حيرة وغربة وجودية وممكن تكون محاولة للتخلص ممايؤرق ورميه على كاهل الآخر........ليحاول انتاج اجابات ، يعني انتاج السؤال ليجيب عليه اي زول الا انت يعني ده تذاكي ، كويس كشف الاوراق ده كده ؟
الحكي ده بالسايكولوجي
بي كلام الله والرسول زي مابتقول بيان دي محاولات لابقاء الناس قراب منك ولانتزاع مشاركة ما
فأنا اؤمن بكلام افلاطون .........."تحدث كي أراك"......وبمنتهى البساطة بحاول اتكلم واضع ليك نفسي سهلة وقريبة لنبدد حواجز الجغرافيا فنحن نتحدث دون رؤية مادية وماثلة ولنبدد غربات أخرى اصعب نعاني منها جميعا،صحيح القلب قد يرى احيانا قبل العين لكن دي شفقة بتكون لي طي مسافات لكسب الزمن ولاحداث مزيد من التفاهم والالتقاء ........بس
لكن بالتجربة ثبت لي أني قد اكون اقمت سد في وجه التفاعل ، لكن بلاقصد ، أها ده اسمو شنو ؟
(شوف ده تذاكي جديد...يللا جاوب)
يللا الفكرة كلها بتقود نحو الخوف من أن اموت وفي نفسي شئ من حتى لانه مفترض لما اموت اكون "دشرت" كل النفسي فيهو .دشرت دي رهيبة خالص.......لكن السؤال المحير الجدوى من كده شنو ؟؟؟؟؟؟
ماانت كده كده ميت ! لابتكون الاسئلة اتجاوبت ولا بتكون ركزت للبطان !
أها كيف الراي؟.........الغي نافوخي واعيش سعيد ولا اسمح للاسئلة تتناسل جواي وتبقيني نزيل في بعشر ؟ ويوم القيامة يطلعوني في طابور المشاغبين؟؟؟؟؟؟؟؟؟؟
اختار واحد من الخيارات دي ولو في سكة تالتة الحقني بيها ياهندسة ...................بسرعة
عارفة انا مؤذية لاني بسأل اسئيلة وجودية ومحرضة .......
مفهوم الحكي ولاّ طير وباقير ياخوانا؟
لو في زول عندو كتاب اناشيد ملدرور حايعرف انا مالي ولو ماعندكم شكيتو على الله الاداني الكتاب .....وعهد الله لو لقيت الكتاب انزله ليكم
اموت براي لي؟ موت الجماعة عرس ، تقرو وتموتو معاي
اسمع معتصم دي تقالة دم مني مابعدها
امشي نوم
لكن قبال ماتمشي اعفى لي واسمع مني فاصلة صغيرة
قلبت هوبة انت في بوست أفنان وأرقت ليلي ........عليك الف ابداع وليلتك فل
وياجماهير انا حاصل لي تداعي ولو بكرة قمت لقيت الكلام بتاعي ده بتاع مساطيل حااحذفو بس وروني كيف آلية الحذف او التعديل ؟
ليلة سعيدة وحنتكلم تاني ........بس بالله هس عم فتحي ما يشوف البوست ده !!!!
|
