قالوا بتحبو، قلت ليهم ماليهو
كثيرة هي المحاذير التي يطلقها أهل الطب وعلماء التغذية حول الإبتعاد عن المأكولات الدسمة والسريعة التي يطلق عليها جنك فوود وليتهم إكتفوا بذلك ودعوننا نستمتع بباقي أطايب الطعام ولكنهم يمعنون في حرماننا من المعجنات والحلويات الشرقية التي يتم إعدادها من السمن البلدي الشهي كالباسطة أو البقلاوة والسنبوسة والكنافة والمشبك وغيرها من الحلويات الشهية المذاق وإذا قلنا حسناً فسوف لن نقترب من هذه الحلويات وأقبلنا في تناول المشويات والتكات وخيرات الباربكيو بشتى صنوفها منحونا بعضاً من الأمان وأجازوا لنا تناولها ولكن بشرط أن لا يكون بقايا ثاني أكسيد الكربون عالقة على هذه الشاكلة من الأطعمة لأنها تسبب السرطان حمانا الله وإياكم فتركناها جانباً وأقبلنا نحو المطبخ الإيطالي وإلتهمنا كل ما هب ودب من أصناف المعكرونة الباشميلي والباسطا والبيتزا وغيرها من الأطباق الإيطالية الشهيرة ولكنهم يرفعون أمام وجوهنا البطاقات الحمراء ويقولون لنا بأنها مأكولات دسمة غنية بالكوليسترول الضار وهي من شأنها أن تسبب السمنة وفرط الوزن فنحتار حقيقة في المأكولات التي يمكن أن نستمتع بتناولها ونتجه نحو البقوليات كالفول وأخواته فنجد من يستوقفنا بحجة أن هذه الصنف من أطايب الطعام ثقيلة على المعدة وتسبب الغازات والإنتفاخ وهكذا دواليك!!! فما من وجبة أو أكلة لا تخلو من المحاذير والأضرار الناجمة من تناولها فماذا عسانا نلتهم من الطعام ونفسنا مفتوحة والحمد الله على السفسفة وملء البطون بما لذ وطاب ؟ أنا شخصياً ضعيف امام الحلويات الشرقية والمشويات بأشكالها وألوانها ومأكولات الأرز البخاري والبرياني والغوزي وأضرب بعرض الحائط نصائح الأطباء مع تقديري وإحترامي لهم ولرسالتهم السامية الرامية إلى الحفاظ على صحة الإنسان ولكن النفس ضعيفة وأمارة بالسوء فماذا نفعل؟ البقلاوة السخنة المعدة بالسمن البلدي أعشقها وبين إيديو هنايا وفي عينيو منايا حققنا أحلامنا والعاشق عقبالو أما قطع السنبوسة التي تلتهمها مع كباية الشاي الحليب عند الضحى هي نفسي ومنى عيني وبيني وبينو حكاية ،، ما ليها نهاية وأحلام دنيايا ولو شفتوه معايا خطوه الحالم آية يروي محاسنو رواية أما صينية المحاشي المتنوعة التي تتوسطها محاشي المومبار رغم تقلها على المعدة فإنني أهيم بعشقها خاصة عند الغداء آه من المحاشي الشهية كم ضوت دنيايا نور دربي برايا " وعلى الرغم من أنني أعاني من مرض ضغط الدم المرتفع (بعيد عنكم وعن السامعين) إلا أنني ضعيف أمام قراصة التركين عند الفطور مع الصباح الباكر وبمعيته قطع البصل المغموس في عصير الليمون والشطة بالدكوة !!! لعمري ما أشهى التركين المتبل بالبهارات أنا بحبو أكتر ياما هواه بيكبر ياما مشاعري بتكبر حبو النامي الأخضر راعيناه وأزهر في قليبنا ونور " والأطباء كدناهم،،، في لحظة نسيناهم حققنا أحلامنا والعاشق عقبالو وبينما كنا أنا وأقراني ذات صبيحة نستمتع سوياً بإلتهام قراصة التركين في تدافع رهيب: " الأحباب شافونا،، بالأفراح لاقونا هنونا وهنونا،، حبيناهم حبونا أكلوا معانا وشاركونا بالأحلام منونا يا عشاق عقبالكم قولولنا هنيالكم (صحتين وعافية) مع الإعتذار لمعشر الأطباء والعاملين في الحقل الطبي والصحي وإلى أمير الحسن وردي وشاعرنا الراحل المقيم أبو آمنة حامد |
حباب السادة
.... يا اخوانا الحِلّي دي مِنطلقي فوقها جوعة ولّ شنو؟؟ هسع لو كان ده رمضان كنا لقينالكم عذر البورد بقى ريحتو أكل أكل ياخ !! :):) .... |
اقتباس:
المشاركة الأصلية كتبت بواسطة الزوول http://sudanyat.org/vb/images/buttons/viewpost.gif حباب السادة .... يا اخوانا الحِلّي دي مِنطلقي فوقها جوعة ولّ شنو؟؟ هسع لو كان ده رمضان كنا لقينالكم عذر البورد بقى ريحتو أكل أكل ياخ !! :):) .... شكراً يا أيها الزوول السمح فات الكبار والقدرو يا الفرهدت فرح جواي طلتك هذه قصّر طول مشاويرنا وجمّل للفرح ممشى عشناك غناء يا حبيبنا الزوول إن شاء الله في مناسبة سعيدة سفرة تلمنا http://hh7.net/Aug/14/hh7.net_13132726371.jpg |
http://www.syadh.com/vb/img/2/55571alsh3er.jpg
فيك رايح بالي!!!! يطل الصباح على العالمين والصباح رباح فتستيقظ متثاقلا تنفض عنك غبار الكسل بعد ليلة طويلة تكون قد أمضيتها في سبات عميق مستمتعاً في نومك بكل ما طاب وتيسر من الأحلام الوردية السعيدة أو مبتلياً لا سمح الله بوابل من الكوابيس المزعجة التي تقض مضجعك فتصحو مذعوراً لتكون على موعد مع طقوس شاي الصباح بالحليب وشعائره التقليدية التي تزينها حبات البسكويت أو القرقوش أو المنين وأخواته من شاكلة الغريبة والبتفورد واللقيمات حيث تجتمع كافة أفراد الأسرة حول صينية الشاي وهم بتجاذبون أطراف الحديث فيما تنهمك الأم في التمتمة بالدعاء وهي تستبشر خيراً بالصباح الذي أقبل وهو يخبئ في طياته البشائر والخير الوفير الذي يجلبه ذلك اليوم الجديد ويذهب كل واحد من أفراد الأسرة في حال سبيله ولكن الأم وصديقاتها لهن موعد آخر قريب جداُ مع الإحتفالية بطقوس أخرى من طقوس شاي الضحوية ثم يحين موعد الإفطار ويليه شاي بعد الفطار وكذا الحال مع وجبة الغداء ووليمة الشاي السادة بسكر خفيف التي تليها ثم يأتي وقت القيلولة بعد الغداء ويضع أفراد الأسرة رؤوسهم فوق وسادات الأسرة أو الحصير والبروش في محاولة للإستمتاع بنوم لا يطول أمده ثم يصحون على شاي الضهرية وهي أهم الطقوس اليومية لدى النسوة من كبار السن وإذا فتتهن ممارسة هذا الطقس لأي سبب طارئ فقد يصبن بالصداع الذي يكاد أن يفتك بهن وللشاي موعد أخير في المغربية حينما يسدل الليل أستاره ساعة المساء يفرد جناحه ويلملم مصابيح النهار ويشرب الكون لون الجراح وتنوم العتمة في الجروف ويلبس الليل أجمل وشاح..... ولكن عشق الشاي أحياناً لا يقتصر على هذه الطقوس التي تمارس يومياً فحسب، بل يتعداه ويدخل في دائرة الإدمان والولع فالتلميذ أو الطالب حينما يذهب إلى المذاكرة ويصاب بالضجر والملل وربما النعاس يسعفونه بكأس شاي يعينه على التركيز ورب الأسرة الذي يتعكر مزاجه ويصيح في وجه زوجته متذمراً تناوله الزوجة مسكناً من الشاي السادة مما يهدئ من ثائرته فيهدأ ويصفو مزاجه وهكذا فالشاي يسلب الألباب دوماً لدى العديد من الناس... فكثير قد حير الشاي فكره وشغل باله وربما جننه كما ورد في رائعة الفنان الذري ابراهيم عوض طيب الله ثراه أما أنا فقد أدمنت الشاي وعشقته إلى حد الثمالة وقلبي سميرو لكين ما عارف الفي ضميرو سكير الروح جميل فتان كحيل نعسان يحيّر أفكار الإنسان تجلت حكمة الخلاق في تصويره يقاربك خطوة ويبعد ميل فقلت فيه متغزلاً ووالهاً: " فيك راح بالي،،، تفديك الروح أظهر لا تبالي في دجاك يا ليل الطيب هب لي ده جنن قيس وكتير قبالي هل نومي يعود والطيف يصبا لي ؟ ده يرد الروح في الجسم البالي الفاطرك نور فاهك عسالى ضيعت ألوف عشاق امثالى فى حبك أذوب لى هواك ما سالى بس اخشى عليك ياجميل تنسالى طيفك فى النوم لو كان يوحالى أتغزل فيه وينظر حالى متى منو يفيق عقلى ويصحا لى ده رحيق مختوم فى لهيجو الحالى ياحبيبى هواك طربا هزا لى بى سهر الليل شوقك يازالى لا أسمع فيك اقوال عزالى أسمع واطيع أمرك يا غزالى دأبى ده جزاى من جنس أفعالى أرعى الانجم ياليل أرعى لى " فكيف عشقكم للشاي أيها الأحبة فهل تفضلوه سادة أم بحليب؟ [/quote] |
أحبتي غريب أمر الحب ذلك الذي يداهم القلوب بغتة وعلى حين غرة فيخيم فيها ويسكنها
فلا نجد مفراً من الإنصياع لجبروته وعديدة هي أنواع الحب والعشق والهيام وقد تغنى الشعراء والمطربون لهذا الحب كثيراً فمنهم من قال: أغرك مــني أن حـبـك قــاتـلي وأنـك مـهـمـا تـأمـري الـقـلب يـفعـل أو وما عجبي مـوت المحبيـن فـي الهـوى ولــكـــن بــقـــاء الـعـاشـقـيـن عـجــيــب ومنهم من لا يكتفي بحب فرد يتيم فتجود قريحته فيقول: " أحــبـك حُـبــيــن حــب الهـوى وحـبـاً لأنــك أهــل لذاكـا ومن الخلق من يموت بشدة الحب كما قال أحدهم: أحبـك حـبـاً لــو يـفـض يسـيـره عـلـى الخـلـق مــات الخـلـق مـــن شدة الحب أما شاعرنا الراحل المقيم نزار قباني قال في الحب: وكيف أهرب منه؟ إنه قدري هل يملك النهر تغييرا لمجراه؟ لست أدري ما أحب به أحبه حتى خطاياه ما عادت خطاياه الحب في الأرض . بعض من تخلينا لو لم نجده عليها لإخترعناه " وقد إقتبست عنوان البوست من رائعة الراحل المقيم طيب الله ثراه خليل إسماعيل والذي كان يرددها أيضاً المرحوم عبد المنعم الخالدي التي تقول كلماتها: " يا الجمالك زينة بادي في رضاك غاية مُرادي تكفي منك إبتسامة ويا المعاك راحة فؤادي حُبي ليك حُب ما إعتيـــــــادي قلبي بلقي الفرحة جنبك لو تحن وتسيب عنادي عارفوا بتقسيهوا قلبك ليه بتتعمد عنادي حُبي ليك حُب ما إعتيـــــــادي زيد في دلك وزيد في تيهك وبرضوا ما بغيير في ريدي بس كفاية عليي أشوفك ونظره منك فيها زادي حُبي ليك حُب ما إعتيـــــــادي كلوا إحساس جوه قلبي بغني ليك ويقول وحيدي إنته ألحان عمري كلوا وإنته أنشودة وجودي حُبي ليك حُب ما إعتيـــــــادي " أما معشوقتي التي أنا بصدد الحديث عن حبي الجنوني لها لا تتعجلوا لتعرفوا من تكون وكيف أوصافها وإياكم لا تسألوني كيف كان الملتقى وفي دروبها مشيت وكيف جال الثغر في إبتهال فقد وشوشني العبير فما أبيت وساقني الهوى فما أبيت يد الحرير إرتعشت بكفي بكيت من رعشتها مشيت حسناً سوف أفصح عن معشوقتي علناً جهاراً ولا أبالي من الوشاة ولا أخشى في هواها أي زاجر فقد ضقت ذرعاً من عدم البوح والكتمان ولا ألقي بالاً إن تفشى الخبر وذاع وعم القرى والحضر إنها إذن سيدتي صاحبة الهيبة والوقار (ملاح الرجلة) فالقاصي والداني قد تناهى إلى مسامعه أنباء عشقي لها ولكم دعوني خصيصاً في مآدب وولائم كانت الرجلة تخطف فيها الأضواء من زميلاتها الأطباق الأخرى لا تدرون أيها الأحبة منذ متى وأنا أهيم عشقاً بها وقد تنامى حبي لها عبر الأزمان منذ نعومة أظفاري إنها تبهرني عندما تتزين باللحمة أو بالدجاح وتكون خالية من مكعبات الماجي وعندما تصطحب معها لفائف ورقائق الكسرة المرة ولكنني لا أمانع أن أواعدها في لقاء الغرام حينما تكون مزدانة بالرغيف والخبز اللبناني وإن كانت على سجيتها وعفويتها خالية من كل الشوائب فإن قلبي يتعلق بها فمن منكم يقاسمني هذا العشق الخرافي لهذه الطبخة الخرافية سيدة الموائد رجيلتي صاحبة الغنج والدلال؟ " أحبها وتحبني ويحب ريحتها نخيري" وقد تعلمت من حبها معنى للأشياء من حولي " اتعلمنا من ريدها نحب الدنيا ونريدها ونرحل في عيون الناس نشيل لى كل زول ريدة لما لقينا عينيها لقينا الدنيا وافراحها وللامال فتحنا دروب لى احلامنا كم ساحة غريبة الدنيا جمعتنا وبقولو عليها رواحة وجانا الريد يعلمنا نعيش الدنيا بالاحساس نسامح بي قليب طيب نشيل الريد لكل الناس عرفنا الريدة في الطيبة وحلاوة الريدة في الاخلاص يا ريت كل زول تايه يلاقي الريدة في دربو عشان الناس تحب الناس وذي عينينا يتحبو وما اصلو البزورو الريد حب الناس بزور قلبو " وأواه من حبك أيتها الرجلة الشهية المذاق كم عاشق صبح طربان تبكيهو وكم قلباً منور شوق وتطفيهو وكم وعداً يقرب يبقا تلغيهو غريبة الدنيا غريبة الدنيا حليل شوقي وعيانتك تلاقيهو يدور يرجع وتحلف ما تخليهو وياما عشت في نشوة قبل ما حبي تنسيهو وياما اتدفقت عبرات تزكي حنانا ترويهو مع الإعتذار لشاعر المرحوم خليل اسماعيل والمرحوم عبد المنعم الخالدي http://www.freeimagehosting.net/uploads/5c7ccbdf8c.jpg |
يا سلاااااااااام عليك يا صاحبي يا فنان.
وكأن تلك القصائد قد كُتبت في عشق تلك الأكلات التي سال لعابنا حبا لها. بالله التركين مش بحتاج لكلمات من شاكلة (حبيبة عمري) و (بنحب من بلدنا ما برا البلد)؟ حياك الغمام حسن سادة... |
اقتباس:
المشاركة الأصلية كتبت بواسطة عبدالأله زمراوي http://sudanyat.org/vb/images/buttons/viewpost.gif يا سلاااااااااام عليك يا صاحبي يا فنان. وكأن تلك القصائد قد كُتبت في عشق تلك الأكلات التي سال لعابنا حبا لها. بالله التركين مش بحتاج لكلمات من شاكلة (حبيبة عمري) و (بنحب من بلدنا ما برا البلد)؟ حياك الغمام حسن سادة... مرحباً بإطلالة شاعرنا الرقم عبد الإله زمراوي يا أيها المسكون بالإبداع والمعطر برحيق الجمال أما معشوقتنا التركين فحين تحمل صينيتها غادة حسناء وتدنو رويداً رويداً من صحن الدار وتفرش البرش المزخرف قبالة شجيرة الليمون الجاثمة في خفر وسط الحوش وقد كاد الزير السبيل الذي يتقطر سلسبيلاً أن يعانقها في عشق خرافي ويكاد الكوز الأبيض الذي تدلى فوق أغضان شجيرة الليمون أن تهوى صريعة وتخر فوق جردل النقاطة فتضع الغادة الحسناء الصينية على الحصير وتنزع الفوطة التي وضعت فوق الصينية فتنبعث روائح التركين الفواحة فأشمها بأنففي وأجدها أزكي من القرنفل http://www.shy22.com/upfiles/bJS75872.jpg |
جلست أمونة في الحوش وهي منهكمة في تقطيع البصل والثوم لإعداد ملاح الويكة التي تقوم بطهيها يومياص دون أن تكل أو تمل وكأنها روشتة طيبة حتى سأم أولادها الصغار من تناول ملاح الويكة بشكل يومي رتيب ولكنها وجدتها الطبق الأسهل إعداداً وأقل تكلفة ولم تكلف نفسها عناء التغيير والتبديل لطبق آخر يسيل له لعاب أطفالها وزوجها الغلبان وفجأة رن هاتفها النقال وكانت على الخط الآخر صاحبتها الثرثارة سعاد فقالت لها أمونة: ها يا ولية يا نضامة إنتي دايرة مني شنو؟ ما بتشبعي شمارات ؟ حتى شماراتك بقت بايتة وقديمة فضحكت سعاد وقالت لها: أنا برضو النضامة يا ست اللهيج السكري يا اللهيجك سكر وناعم كلامك قاعد تسوي في شنو يا المهجومة إنتي أكيد قاعدة تعملي في الويكة المقررة يوميا فضحكت أمونة وقالت: بسم الله عرفتي كيف؟ الليلة ويكة لكين بدون صلصة فقالت لها سعاد: الويكة إن كان بقت بدون صلصة أهلنا في الجزيرة قاعدين يقولوا ليها المشيفعة أنهت أمونة المكالمة لكي تتفرغ لطبخ الويكة ثم فرغت منها وغطت الحلة وتركتها فوق البوتاجاز ثم إنهمكت في مشاهدة التلفاز ريثما يعود زوجها من العمل ولكنها فجأة سمعت ضجيجاً أشبه بالمظاهرات الإحتجاحية ينطلق من المطبخ ثم هرولت مسرعة إلى مصدر الصوت وإذا بأطفالها الصغار يحاولون إسقاط حلة الويكة ورميها والتخلص منها وهم يهتفون بصوت واحد: " الشعب يريد إسقاط الإدام" " الشعب يريد إسقاط الإدام" http://www9.0zz0.com/2010/08/16/10/874808752.jpg وعلى ذكر الويكة أي المشيفعة بشتى أنواع وضروب طبخها فإنني من عشاق الويكة المطبوخة باللحم المجفف (الشرموط) ولكنني أفضّل تناولها بالكسرة الرقيقة وطالماً كنت أعتز بهذا الطبق كرمز وطني يمجد هويتي السودانية وتراثاً سودانياً ضارباً في أعماق الجذور إلى أن حدثت لي هذه الطرفة التي سأسردها لكم فيما يلي: ففي ذات يوم شتوي من أيام البحرين رقيق النسيم شحيح الرطوبة كثير الغيوم قصير العمر جلبت معي إلى المكتب ويكة سودانية مطبوخة باللحمة المفرومة وغنية بالبهارات والتوابل الحارة وعندما حانت فسحة تناول الغداء في الشركة جلست بمفردي في الكافتيريا المخصصة لتناول الطعام (بانتري) وقمت بتسخين الويكة بواسطة المايكرويف لأتناولها بالخبز المصري الذي أعشقه لحد الثمالة ثم دخل حمزة الصعيدي صديقي وزميلي في العمل وألقى على مسامعي التحية فرددت إليه بأحسن منها ثم أردفت أقول له: " إتفضل يا حمزة تعال أكل معاي العيش والملح هنيا مرئيا" ثم أعقبت أقول له وأنا أقطع في الخبز المصري: " معلش يا حمزة بيه الأكلة دي سودانية مية المية ويمكن ما تعجبكش" فدنا حمزة مني وألقى نظرة عجلى على الطعام ثم قال لي: " سودانية مين يا بابا دي الويكة دي عندنا في الصعيد ذي الهم على القلب وعلى قفا من يشيل وإيه رأيك يا حسن نحن بنعملها بنفس الطريقة دي وهي من الأكلات المفضلة عندي" ( بموت فيها أوي يا لهوي على الويكة وسنين الويكة ثم جلس معي ليقاسمني تناول الويكة ويلهف منها لهفاً وأنا لا أزال في حيرة من أمري وقد تحسرت على الويكة التي كنت أظن طوال عمري أنها ذات هوية سودانية خالصة وأنها من الأطباق السودانية الشعبية ولكنها خذلتني وطلعت صعيدية أيضاَ تماماً كالتوب السوداني الذي قاسمتنا في إرتدائه حواء الموريتانية وعندما لاحظ حمزة إندهاشي لهول المفجأة أردف يقول لي: " بص يا حسن" فقلت له مستغرباً: " إيه كمان يا حمزة غلبتني معاك؟" فقال وهو يلتهم الويكة بنهم شديد: " فاكر البصارة اللي إنت جبتها قبل أسبوع؟ فقلت له: " أيوة فاكرها؟ مالها؟ فقال لي: " هي الأخرى صعيدية بحتة" ربما قربنا نحن معشر الحلفاويين والمحس جغرافياً من صعيد مصر قد ساهم في تشابه العديد من العادات والأطباق بيننا فضلاً أن جل أجدادنا كانوا يعيشون في مصر المحروسة في أيامهم الخوالي http://www.alrakoba.net/newsm/8754.jpg |
بوست دسم
|
اقتباس:
هسه يعني انا اسوي شنو مع ساندوش الفول القدامي دا:( |
اقتباس:
المشاركة الأصلية كتبت بواسطة معتصم الطاهر http://sudanyat.org/vb/images/buttons/viewpost.gif بوست دسم عزيزي معتصم هكذا تكون طلتك كطلة العيد تداهمنا بشلال من الأفراح وقد تاه الفرح من دارنا وإنت فرحنا إحنا فنتوسد الأشواق ذي طفلاً صغير شايلنو شيل وذي طفلين كلامهم كلو بالهمسة وذي فرح البعيد العاد قف يا هذا!!!! هل أتاك حديث لقيمات صبيحة العيد التي أبهجتني وحتى ادتني السلام فرددت لها كلمات شاعرنا الرقم تيجاني حاج موسى: http://www.alfrasha.com/up/8243441981459532463.jpg " تبقي سيرتك هي الكلام وتبقي صورتك هي الروئ الحلوه البعيشها في صحوتي ،او حتي في عز المنام ويبقي إسمك هو الغنا هو البخفف لي عذابات الضني ماالشفتو منك يا مني الروح يا أنا، وصفو بصعب يا جميل... " |
اقتباس:
المشاركة الأصلية كتبت بواسطة جيجي http://sudanyat.org/vb/images/buttons/viewpost.gif الصحن التحت دا انا بحبه هسه يعني انا اسوي شنو مع ساندوش الفول القدامي دا:( شكراً لحضورك الزاهي المتبل بالود فأضحى مجلسنا بطعم البهارات الإستوائية ما مشكلة عصيدة الويكة والفول رغم البين أصبحوا روح واحدة في جسدين http://www8.0zz0.com/2010/04/07/09/864993584.jpg |
غايتو بوست يذيد الوزن اكتر
ياخي ممتع حد الدهشه مزاوجه غريبه بين الغناء و اصناف الطعام اول مره تمر علي واصل بالله عليك و اهم شيء ملاح الروب |
حسن كيفنك
غايتو الجوعة الدخلتها فينى ما بتمرق بــ هين ما عافية ليك كلو كلو:(:(:(:( دا بوست شحمان وسيدو زاتو شحمان:p:D |
اقتباس:
المشاركة الأصلية كتبت بواسطة نبراس السيد الدمرداش http://sudanyat.org/vb/images/buttons/viewpost.gif غايتو بوست يذيد الوزن اكتر ياخي ممتع حد الدهشه مزاوجه غريبه بين الغناء و اصناف الطعام اول مره تمر علي واصل بالله عليك و اهم شيء ملاح الروب المصونة العفيفة صاحبة الوقار ست نبراس شكراً لرذاذ الفرح الخلّى الجية خطوة عزيزة ويوم موعود ,, الخلاك تطرانا شوية ,, تسال فينا وتجي حارتنا دابها الليلة الفرحة طرتنا ,,والحظ جانا وغشى سكتنا ,,زارنا وجابك لينا هدية شكراً لهذه الإشراقة الوضيئة التي تذكرني بمعشوقتي الملوخية بالكسرة التي أدمنت بها هياماً وناجيتها بكلمات الراحل المقيم طيب الله ثراه شاعرنا سماعين حسن: فيك روحي وحبي النما مابسيبها ان بقى في السماء ما بخلي الناس تلهطها روحي في صحنك سالمة يا غرقت يا جيت حازمة http://up.g4z4.com/uploads/a1502dd438.jpg |
اقتباس:
المشاركة الأصلية كتبت بواسطة سارة http://sudanyat.org/vb/images/buttons/viewpost.gif حسن كيفنك غايتو الجوعة الدخلتها فينى ما بتمرق بــ هين ما عافية ليك كلو كلو:(:(:(:( دا بوست شحمان وسيدو زاتو شحمان:p:D شكراً يا ذات البهاء المتلألئ الشفيفة سارة إذ لاقيتيني في الزمن السمح وانا فيك بغلبني الكلام كل المداخل ما بتفيك لو أمطرت أحرف غناي أسأل الله أن نتلاقى في رواكيبا وعوضنا وفي الحواشات والجروف الكابة من شاطئ النهر في ربوع وطننا الحبيب وإن شاء الله في سفرة كاربة فرحة تلمنا آمين http://s.alriyadh.com/2009/08/06/img/627065201206.jpg |
أحبتي هل يناسبنا نظام البوفيه في تقديم الأكل في المناسبات والولائم العامة؟ وهل يشبه قيمنا السودانية التي تعودنا عليها أم أنها عادة غير سودانية ( So un-suanese) لقد دعيت إلى وليمة بمناسبة عيد زواج أحد معارفي السودانيين في المهجر وقد كان نظام بوفيه قد جلبت فيه أطايب الطعام من مطعم درجة أولى فاخر أو لربما جلبت من فندق فئة خمس نجوم وبما أن المائدة كانت حافلة بكل ما لذ وطاب من المحمر والمشمر جزاهم الله خيراً إلا أنني وبصفة شخصية كنت قد إفتقدت فيها شيئاً ما يدغدغ كياني ويبهرني حاجة فيها كانت ناقصة
(حاجة ذي نقر الأصابع) كما قال شاعرنا الهمام وعلى ذكر البوفيه إليكم حلقة من حلقات أمونة الشمشارة: إنهمكت أمونة في ريموت تشغيل جهاز الموسيقى الكائن في صالون الحريم وقد أمسكت بحزمة من سيديهات الأغنية السودانية بدءاً بأغاني الحقيبة ومروراً بالفن الحديث ووصولاً إلى أغاني الشباب السريعة الريتم (الإيقاع) أي أغاني الجبجبة والرَبَة ولكن مزاجها العام وهواها لم يكن ينصب في هذا الإتجاه فوضعت الجهاز جانباً وتلقفت حزمة من الصحف اليومية السيارة وأخذت تقلب فيها وتتصفحها ثم ألقت بهن جانباً وهي تقول : " بلا سياسة بلا صداع ،،، الواحدة فينا ما ناقصة هم ووجع... " ثم وقفت أمام مرآة التسريحة وتأملت وجهها وهي تفرك على جبينها بأطراف أناملها وهي تقول في شرها: " ووب عليكي يا أمونة وسجمك التجاعيد الظهرت عليكي دي شنو؟ إنتي لسع صغيرونة يا أمونة الهناء والسرور !!! ثم أطلقت ضحكة خافتة وهي تقول: " الواحدة مننا حتآخذ زمنها وزمن غيرها " ثم دخل عليها إبنها ميسرة وهو يمسك بموبايلها وهو يقول لها: " دي خالتو نفيسة يا أمي هاكي الموبايل كلميها" فتناولت الموبايل من ميسرة وهي تقول: " شنو يا زولة يا جافية إنتي من ديك وعيك ؟ وين الحي بيكي؟ لا سلام منك وما منك تحية للوراك خليتيهو عايشة في الأسية يا سلام يا الفنجرية ما تسيبي وصية المسافرة عينها قوية " فضحكت نفيسة وقالت لها: " وعرفتي كيفن بي سفرتي للشايقية؟ وبعدين تعالي هنا أنا أمبارح طول النهار من صباح الرحمن مسكلت ليكي وتسكت ليكي يجي عشرين مرة لقيتك خاتة تلفونك في الصامت كنت نايمة وللا شنو الحكاية؟ فقالت لها أمونة: " آآآي معاكي حق !!! " أنا أمبارح بالذات طول النهار كنت في العمارات شارع واحد مشيت لي بيت ناس سوسن صحبتي الجعلية مسؤولة شئون المرأة السودانية أكان عندنا ورشة عمل في بيتها بعنوان : " هموم حواء السودانية أكيد بتعرفيها يا نفيسة مش؟ فقالت نفيسة: " شفتها مرة مرتين في بيتكم لكن بيني وبينك الزولة دي ما نزلت لي من زوري وما حبيتها كلو كلو شايفة نفسها ومناخيرها في السماء ونضمها نص عربي ونص إنجليزي زولة بتاعة حركات ومظاهر " ثم أعقبت تقول: " خلينا من زولتك المقندفة دي بتاعة البوبارات والمظاهر وتعالي كلميني حسع!!! ما كانت في شمارات وحكايات في ورشة السجم دي؟ فقالت أمونة وهي مستغرقة في الضحك: " سبحان الله يا نفيسة!!! الغريبة أنا أول مرة أتفق معاكي في حاجة!!! الزولة دي رغم إنها صحبتي إلا كلامك صاح!! عندها الكبرياء والتعالي والدلع المسيخ بالكوم أمبارح لمان جينا نتغدى في بيتهم وقفت قدام البوفيه وبقت تنضم مع الخدامة وتقول ليها : " كلمي النساوين الضيوف ديل العندها كوليسترول تجي ناحية السشكن (القسم) المخصص للكولسترول فري (الخالي من الكوليسترول) والعندها سكري ما تقرب من الحلويات (ديزيرت) الفيها كالوري زيادة وتجي ناحية القسم المخصص للفركتوز والدايت سويت غايتو يا نفيسة بت أمي أنا كنت مغيوظة منها جنس غيظ المخلوقة دي أسكتي خلي سااي ووقفت جنب واحدة من جاراتها العربيات وقالت ليها: " تعالي ناحية الأكل بالبخار ده يا صافيناز حيعجبك خالص !!! ده من المطبخ الصيني الأوثنتيك (الأصيل) حاجة كدة هيلثي (صحية) ولايت (خفيفة) وما بيعمل ليكي إندايجتسشن (سوء هضم) فلم تستطع نفيسة كتم ضحكتها فاطعتها أمونة بقولها: " ها يا المهجومة أصبري شوية وأسمعيني!!!الضحك التقيل جااي وراء لسع" فسألتها نفيسة: " أجي يا أخواتي!!! أكتر من كدة شنو كمان عاد؟ فواصلت أمونة وهي تقول: الزولة وقفت نص الحريم ونادت ليكي الخدامة ومسحت بيها الأرض لامن الغلبانة بقت تبكي فقالت نفيسة وقد تملكتها مشاعر الفضول: "وقالت ليها شنو المسيخة دي؟ فقالت أمونة: بقت تقول ليها: " أنا ما قلت ليكي مليون مرة ما تشغلي الكونتري مويزيك أثناء تناول البوفيه وشغلي الإسلو مويزيك عشان يكون تنشن فري بارتي " فقاطعتها نفيسة بقولها: " معلش يا حبيبتي أمونة على المقاطعة " بس كنت عايزك تترجمي لي الدراب القلتيهو في الآخر ده،،، أصلك عارفة صاحبتك كانت ضعيفة في الكلام المعوج ده من أيام المدرسة" فقالت لها أمونة متهكمة: " غايتو البركة الما سقتك معاي يا نفيسة كنتي إسطحتي ساكت وبقيتي ذي الأطرش في الزفة" فمازحتها نفيسة بقولها: " أجي يا كوندوليزا رايس حسع اللي يسمعك يقول عليكي ما شاء الله لبلبة في الإنجليزي ما علينا واصلي يا إنتي " فقالت أمونة: " ما مشكلة إتريقي علي بعدين!! يعني قالت للخدامة أنا عايزة البوفيه ما يكون فوقو توترات ونرفزة وكدة ويكون جوهو هادي وشاعري ورومانسي " فقالت نفيسة: " الغلط ما منها!!! الغلط من الخدامة المسكينة دي أنا لو كنت منها!! قسماً عظماً كنت فلقتها بي مفراكة ومشيت أهلي " فقالت أمونة : " والله إنتي أكان دايرة الجد الدايرة فلق صحي إنتي دي أقول ليكي أكلات وأطباق على البخار وهيلثي تقولي لي مفراكة وبطيخ حسع الجاب المفراكة في جو البهجة دي شنو؟ المفراكة دي يا شقية الحال في تُكلنا نحن !!! |
خاطب هيثم والدته زينب التي كانت منهمكة في غسل الأواني في المطبخ:
" يما عليكي الله أديني موبايلك ثواني أكلم نزار صحبي وأرجعه ليكي" فقالت زينب وهي تنشف يديها بالفوطة بعد فرغت من غسل المواعين: " وليه موبايلك إنت مالو ؟ كعب؟" فقال هيثم: " أنا موبايلي قاعد يشحن" فناولته زينب الموبايل على مضض وهو تقول له: " بس ما تقعد تنضم لي بالساعات عشان عايزة أكلم خالتك حواء" فتلقف هيثم الموبايل وأخذ يتصل بنزار: هيثم: نزار إزيك صباح الخير أها الليلة المباراة قايمة والله إتلغت؟ وشكلتو الفورمة النهائية للفريق والله لسع قاعدين تعزلوا في اللعيبة؟ نزار: آي خلاص التشكيلة النهائية للفريق شبه جاهز لكين المشكلة إننا ما لا قين قواني لأنو الكابتن جمعة مصاب وما عارفين نتصرف كيف،،، إيه رأيك تكون إنت حارس المرمى ما زمان دي كانت خانتك! هيثم : لا لا أوع تقترح ليهم كدة أنا حسع غير رأس الحربة ما يناسبني فصاحت زينب غاضبة: يا هيثم دي الثواني الوعدتني بيها أنا شايفة الحكاية جرت وقربت للساعة أديني الموبايل عليك الله وبلاش غلبة بلا رأس حربة بلا جناح أيمن" فتناولت الموبايل وأخذت تتصل بصديقتها الصدوقة حواء: زينب: إزيك يا حواء شديدة إن شاء الله أكيد يا دوب صحيتي من النوم أنا عارفك كسلانة وجنك نوم حواء: نوم شنو يا بت امي النوم جافاني وقسمتو لي جيراني نوم في عز الضحوية والله الراجل كان يقتلني عديل وإنت أخبارك شنو ومالك متصلة بي؟ أكيد في شمار جديد لنج!! عارفك شماراتك ما بتكمل وما ليها حد وما ليها قيف زينب: شمار شنو إنتي كمان يا بت الحلال ده وقتو ده الشمارات يا أختي في المغربية ساعة النسمة ترتاح على هدب الدغش وتنوم وساعة المساء يفرد جناح ويلملم مصابيح النهار والعتمة تنوم في الجروف والليل يلبس أجمل وشاح حواء: طيب مالك في شنو كان ما شمار؟ أصلك ما متعودة تتصلي بي في الصباح زينب: أصلو الراجل صاحي الليلة من صباح الرحمن وقبل ما يمشي الشغل طلب مني طلب غريب أتقول كان حلمان بيه حواء: والله الرجال ديل قصتهم قصة طلب شنو أبو هيثم زينب: ما حتصدقي قال لي زملانه كلهم في الشغل نساوينهم قاعدات يطبخن ليهم طبخة ما سوادنية مرة في الأسبوع حواء: أقيفي هنا وشوية شوية علي عشان فهمي تقيل يعني كيفن طبخة ما سودانية يعني بيتزا والله باستا والله مسقعة زينب: إنتي ما تصبري لي شوية،،، أصلوا راجلي وزملانه في المكتب من المغتربين العائدين من الخليج يعني بالواضح كدة عايزين أكلات خليجية بالتحديد وأنا طلبتك إنتي مخصوص عشان إنتي زمان كنتي شهادة عربية وعشت بالرياض نص عمرك بس عايزك توصفي لي البرياني دي بتتعمل كيف حواء : والله طلب غريب وشاذ الله يكون في عونك يا أختي وإن شاء الله بعيد عن سمع راجلي كمان ما يقوم يطلب ليه كسكس مغربي والله كشري مصري أنحن ما ناقصات بلاوي خلاص جيبي ورقة وقلم وأكتبي المقادير زينب: يا هيثم إنت يا ولد عليك الله ناولني الورقة والقلم من الصالون وبعد أن تناولتهما قالت لحواء: يا الله أنا مستعدة قولي لي الحاجات اللي لازم أحضرها حواء: أول حاجة رز باكستاني ماركة بسمتي أو تليدا حتلقيهم في أي هايبر ماركت أو ميغامارت عندكم في السجانة وليمون ناشف وحبات هيل أو حبحان وحبات قرنفل وكام قطعة مكسرة من القرفة وزعفران أو كركم حسب الرغبة وقطعة دجاج مزارع مع البهارات اللازمة ذي الكزبرة والكمون والفلفل الأسود ومكعب من مرقة الدجاج وأول حاجة قطعي البصل والتوم دقاق وحمريهم في الزيت لغاية ما يقلب لونهم بني أو ذهبي تقومي تقلبيهم مع قطع الدجاج وخليها شوية لغاية ما تتجانس وبعدين تختي ليهم نص علبة من معجون الطماطم وحركيهم ووطي النار شوية وخليها لمدة ربع ساعة تقريباً لامن الدجاج يكون شبه ناضج تقومي تزيدي ليه الموية وتكبي الرز وبعدين البهارات ومرقة الدجاج والزعفران أو الكركم ووطي النار لآخر درجة بعد ما تقفلي حلتك بإحكام شديد وخليه تلت ساعة زينب: والله شغلة ما هينة ومعقدة غايتو الله يستر حواء: بس أقول ليكي حاجة،،، وإحتياطي كدة أعملي ليك ملاح تاني معاه إن شاء الله يكون بطاطس والله رجلة عشان لا قدر الله كبستك لو باظت تكوني مجهزة ليه غداء إحتياطي زينب: حواء ذي السمعتك قلتي إتفقنا ونحن مختلفات لا سمح الله حواء : سلامة أذنك يا بت أمي،، اللي قالت إتفقنا دي ما أنا دي سوسن بتي قاعدة جنبي هنا بتكوي ليها في بلوزة وقاعدة تغني أغنية ندوية إتفقنا ما علينا ... بنات آخر الزمن فايقات ورايقات نعمل ليهن شنو عاد يا بت أمي إستغفرتك يا مالك روحي!!! http://www.imuae.com/vb/imgcache2/6255.gif |
اقتباس:
"على النقيض منهم" وأن أكون ناقداً "سوداني أصيل يجيد التشنيف" أنا آرى غير رؤياك.. أولن تبادي الفول بث التقول بليلة (أوعك منه بالليل، حيرقانهو في اليد قبل البطن)، ما فيهو زيت "وما بتمها عمك فتحي يجي ناط"... ثانياً البامية في أقصى اليسار (لييييه ناس اليسار ديما مشاترين وفي الطرف الآخر ليتهم كانو من الآغر)، لست من سبب لتواجدها وسط هذه المجموعة المنتقاة ذات النقهة الفطورية (أغلبهم من الأسماء الذكورية، فول، زيتون، ملاح وحتى العصيدة عاصية كقلب الرجال) ثالثا الطعمية تحمل ذكرى إستعمار الوطن للمرة السابقة ولست الحالية، إبان الإستعمار، فهي مقدودة في الوسط (إحنا وناس عمك شوقي بدري بنتذكر التعريفة المقدودة) وهي ملطشة بين الأيادي كما تسمية هذه المسكينة (فلافل وطعمية وكفتة خضار مشكلة) رابعا هذه الصينية مستفذة للسوادنين ولكل الذين يعانون من عدم "الطمام" وغلبة "الطميمة" وذلك لأن "الزيتون" تبوء مكانة يبرز من خلالها عضلاته ككماليات لموائد أهل الإنقاص متوسطاً غذاء العامة "الطعمية والفول" خامسا لحمة الطوة الغير غذائية تظهر شحمها المكتنز متبرجة أما أعين (نخليها ساكت، خوفا من مقص الرقيب) لا تضع آي غطاء أو ستر "العياذ بالله من أمراض القلب وتصلب الشرايين"...... الحبيب أبو علي... اليوم عملتا ليا عملية في ضرسي ومن الصباح ما أكلتا شئ وممنوع من الأكل حتى يوم الغد على أخف تقدير.. تقوم تعمل فينا كدآ.. مع مراعاة أنه فيني عرق "حلبا" وبطيني... شكرن لك على بوست الذي ذخر بكل طيب وشهي.. محبة |
سلامات حسن سادة
صديقي المترف في كل شيء أهكذا غادرتني ثم قلت لي ترجل انت ياحكايات الصبا اليس يعنيك ما الذي قد ضاع من عمري هباء حقيقة لست ادري ما الذي يدفعني دفعا اليك يا صديقي لا عليك .... كم سعيد وممتن لسودانيات كونك هنا |
اقتباس:
المشاركة الأصلية كتبت بواسطة بابكر مخير http://sudanyat.org/vb/images/buttons/viewpost.gif الحبيب أبو علي... اليوم عملتا ليا عملية في ضرسي ومن الصباح ما أكلتا شئ وممنوع من الأكل حتى يوم الغد على أخف تقدير.. تقوم تعمل فينا كدآ.. مهلاً ترفق قليلاً أيا صاحب الحضور المشرق بابكر ودعني أهديك أقصى الود غير مقلل ثم أرفع الأكف في ضراعة تمزق وأدعو المولى أن يهبك موفور الصحة والعافية وسلامة ضرسك يا غالي وإليك هذه الوصفة التي أعددتها في شكل مقال وهو أحسن علاج لأوجاع الضرس وسلامتك من الآهة وزائرتي كأن بها حياء رغم أن زائرتي كانت قد أتحفتني بزيارتها غير المرغوبة وقد تسللت خلسة في ظلام الليل غير أني لا أحسب أنها كانت بها حياءُ ولا يحزنون... وبما أنها كانت قد طرَقت بابي بأناملها الناعمة حتى كل متنها لتلج شقتي وتناجيني ملياَ وتبث لي أسرار الهوى وتصوغ الصبح ذوباً بابلياً وتهمس لي حديث العشاق الحيارى، إلا أنني "لم أفرش لها المطارف والحشايا" "ولم أراقب وقتها من غير شوق، مراقبة المشوق المستهام" ولا أدري كيف وصلت هذه الزائرة من الزحام في ليلة خميس منامية ضوت بها ضي القمر كما في أغنية فنان العرب محمد عبده! ألم يكفها الأمرين الذين عانيت منهما جراء دوي أبواق السيارات التي تراصت كأعواد الثقاب في شارع المعارض في قلب المنامة - (أنا لي في المنامة غزال دائماً يغني عليهو) - من كل حدب وصوب وقد تباينت لوحاتها وتشكلت ما بين سعودية وقطرية وكويتية وإماراتية وهلم جرا ،،، ناهيك عن مواكب الدراجات النارية الفاخرة التي أخذت تجوب الشارع جيئة وذهاباً في كرنفال إستعراضي مهيب وجلس على متونها صبية في ريعان شبابهم من العجم أي من البحرينيين من ذوي الأصول الإيرانية أو الفارسية ولا هدف لهم في الحياة سوى التسكع والإستعراض ومغازلة الحسان وهكذا حال شباب اليوم من جيل الفاست فوود والنت والأنكى من ذلك أن الحسان يقفن متسمرات عند رؤية هؤلاء الحناكيش مرددات عبارات الإنبهار والإعجاب: " WOW!!! that is cool !!! hip!! in." يا لبجاحتهن!!! يا إلهي ماذا دهاني!!! لقد نسيت أن أفتح باب الشقة لزائرتي البغيضة التي لم تكن على شاكلة زائرة الشاعر المتنبي بل كانت أشد فتكاً وإثماً وضراوة فتباً لوجع الضرس المبرح الذي قض مضجعي في منتصف الليل وأنا أغط في سبات عميق غير آبه بالضجيج الذي كان يسود أركان المدينة فأخذت أبحث عابثاً عن أقراص البنادول في أدراج خزانتي وفوق الطاولة الكائنة في ركن قصي من الصالون وأصرت الآلام المبرحة أن لا تبرحني وأنا أهيم من غرفة إلى أخرى وأبدل أعواد القرنفل الواحدة تلو الأخرى عشان يمكن يكون أوفى ولكن هيهات أن تفارقني الآلام فهرولت إلى الصيدلية التي تقع على ناصية الطريق ولكنها لسوء حظي العاثر كانت قد أوصدت أبوابها وبينما كنت أقف متسمراً في مكاني قبالة الصيدلية والحيرة والآلام تتناوبان في إيذائي دون ذنب جنيته، وقفت سيارة كريسيدا بيضاء اللون أمامي وأخذ من بداخله يناديني من وراء الزجاج بصوت عال :" يا أبوعلي ! يا حلفاوي تعال أركب" وتفرست في وجهه ملياً فإذا هو البلولة العربي صديقي السوداني من شرق السودان وقد إرتدى سديرياً غامق اللون ونسي أنه في الخليج ورميت جسمي المتعب بداخل السيارة وتبادلنا طقوس السلام بالطريقة السودانية التي تثير الأعصاب وقادته مشاعر الفضول ليسألني قائلاً:" ما الذي أتى بك إلى هنا في هذه الساعة المتأخرة من الليل"؟ فقلت له وأنا أمسك بفكي ": إنه ألم الضرس اللعين فأتيت إلى هذه الصيدلية أبتغى بلسماً شافياً ولكنني وجدتها مقفلة بالضرفتين كما ترى!! لكنني لما رأيتك واقفاً ألفيت أن أروي لك ما جرى" هكذا قفيت كلامي كما في رائعة اليزيد بن معاوية "العامرية" وحينما إنتهيت من سردي أخذ يضحك بصوت عال ويقول :" والله صدق حلفاوي" فقلت له غاضباً :" وما بهم الحلفاويين ألا يعجبونك فقال لي مبتسماً": بل هم أحسن ناس ولكن علاجك الفوري عندي أنا" فقلت له كيف ألا تخبرني به؟ فقال:" إليك بهذه السفة الكاربة" فقلت له:" ولكنني لا أسف السعوط البتة وإن كنت أدخن المارلبو بشراهة" فقال لي وهو يناولني الحقة :" ولكن هذا ظرف علاجي طارئ" فأخذت منه السفة ووضعتها أسفل شفتي السفلي وشممتها بأنففي وألفتها أذكى من القرنفل وكانت هذه السفة هي زائرتي الأخري ذات الخفر ودل العذارى التي طردت الزائرة الأولي دون رجعة فأخذت أغني لها جذلاً "زمان الغربة والتبريح بسيبه عشان تشيلو الريح عشان يمكن صحيح الغربة بتوه عمرنا صحيح إنت معاي لا بندم ولا بقضي العمر تبريح " أصلو السن ناباً كان وضرساً كان كريه وكريه أصلو السن كان وهماً لبستو طقم وقبضت الريح....... مع الإعتذار لشاعر أغنية وردي |
اقتباس:
المشاركة الأصلية كتبت بواسطة مرتضى يوسف http://sudanyat.org/vb/images/buttons/viewpost.gif سلامات حسن سادة صديقي المترف في كل شيء أهكذا غادرتني ثم قلت لي ترجل انت ياحكايات الصبا اليس يعنيك ما الذي قد ضاع من عمري هباء حقيقة لست ادري ما الذي يدفعني دفعا اليك يا صديقي لا عليك .... كم سعيد وممتن لسودانيات كونك هنا لقد حسبت واهماً أن زخات المطر التي جادت بها السماء إيذاناً بقدوم موسم الخريف في غير أوانه فقلت له: " طريت المطر الرذاذ" ولكن هذا الرذاذ لم يكن سوى أنسام ندية مبللة بقطر الندى إصطحبت إطلالة نديد النسيم والدعاش جنابو الأديب الأريب مرتضى يوسف فقلت له متسائلاً: من أيِ أنسام الربيعِ أتيتِ؟ من أيِ الحدائقِ فاح عطرُكِ.. فاستردّ القْلبُ بعْضَ شجونِهِ ..وهفا؟ لقد كنت أفتش عنك في مكان آخر في هذا المنتدى الأغر وأنا أردد تارة: " مالو بدر السماء ما شروق مين حماهو ومنعو المروق؟ وتارة أخرى: " ليه غبتي يا قمرة جية العصافير قربت " شكراً لرذاذ الفرح الخلّى الجية يا أيها الذي فرهدت فرح جوايا http://forum.7dod.com/imgcache/2011/08/420.jpg |
كيف الجَبَنَة
إستغرقت عوضية في ونسة جانبية دقاقة مع السرة بنبرة أشبه بالهمس ولكن أمونة التي كانت تجلس على مقربة منهن تحاول جاهدة أن تسترق السمع لما يدور بينهن من حديث رغم أنها كانت تتظاهر بالإنشغال في مشاهدة التلفزيون كما فعلت بقية النسوة اللائي إجتمعن في مجلس صيوان الحريم في بيت أمونة ولكنها كانت ترخي السمع خلسة بين الفينة والأخرى وما أن سمعت عوضية تقول للسرة: " أريتها عرس الهناء والسرور يا بت أمي إنتي لو شفتي جنس الأكل الجايبنو ناس العريس حاجة فنانة خلاص موبالغة..... الأكل يا بت أمي كفى ووفى لامن فضل ودخلوا البواقي لي جوة أها وقت العصائر دي لامن مرقت أشكال وأشكال لامن الناس إتوهمت تشرب شنو وتخلي شنو لكين أقول ليكي يا السرة يا أختي جيب لي أضانك عشان أنا شايفة أمونة دي راخية أضانها وعاملة مشغولة بالشاشة البلورية ووجدانها كلو معانا هنا في عرس خديجة بنت التومة فقالت لها السرة: " أجي يا أخواتي إن شاء الله يا يابا يسمعوكي ناس الإذاعة والتلفزيونات ووكالات الأنباء كلها إلا أمونة دي بري يا يما دي شيالة حال والفولة ما بتتبل في خشمها " فقالت لهن أمونة: " ها يالسرة يا المهجومة إنتي وعوضية الكلامها نصه كضب هيا يا وهم إنتو هيي! أنا معاكم من العصائر المشكلة الجابوها في نص الحفلة ووهمت الناس وكان أكون ما كضابة يمكن وربما ضقت منها حبة إنتي يا السرة صوتك ده ما بتقدري توطيهو والشقيانة اللي القاعدة جنبك دي براها إذاعة عليكم الله إنتو حسع قايلات روحكن بتقولن في سر؟ بي صوتكن الجهوري ذي صوت الرجال ده قومي لفي عليكي الله فقالت عوضية لها عوضية: أنحن كلامنا كلو كان بالهمسة قدرتي تسمعيهو كيفن يا الشقية؟ فقالت أمونة وهي مستغرقة في الضحك: " ووب علي وسجم خشمي ذي طفلين كلامهم كلو بالهمسة أحسن ياعوضية أقولي حاجة لو بي همسة حتى عابرة قول أحبك " ثم إستطردت وهي تخاطب كل النسوة اللي في الصالون: " آي سمح ذكّرتوني العرس حسع!!! والِسيرة جابت الِسيرة يا جماعة الخير أنا القبضية بتاعي حقة الصندوق كان المفروض في شهر عشرة الجايي ده على حسب القرعة لكين دايرة آخذها حسع قبل رمضان عشان مسافرة البلد لي عرس بنت المرحومة أختي التومة الله يرحمها البت يا كاف البلاء وحيدة ويتيمة وأنا أبقى ليها أمها وأبوها أها موافقات يا حريم هووووي فساد الهرج والمرج بين النسوة وقالت لها نعمات: " إنتي يا أمونة الصندوق ده ما ليهو أهداف ورسالة واستراتيجية وأغراض ودوافع وكدة " فقاطعتها أمونة وهي تقول: " عليكي الله أقفلي لي خشمك ده يا نعمات الفقر صندوق شنو ده؟ يكون صندوق النقد الدولي اللي قالوا مسكوها لي مَرَة (إنتاية) ولا صندوق تاني؟ فقالت السرة: " مالك يا أمونة ما كلامها صاح ومنطقي الصندوق ده للأغراض الضرورية الملحة والحالات الطارئة القاهرة " فقالت أمونة: قومي بلا قاهرة بلا إسكندرية طارئ أكتر مما بنت أختي اليتيمة ما يكون جنبها واحد في ليلة العمر؟ فقالت آمنة : " يا جماعة الخير مالكن علامات شمطة ووجع رأس خلينا نخلي الحكاية استفتاء وتصويت بطريقة ديمقراطية بحتة: فقالت لها أمونة: " خلاص يا فاطمة عبد المحمود مالك إنتي ومال المواضيع دي إنتي خليكي في التسالي الكنت بتقرضي فوقها ذي الكًكو،،، مالك يا بت أمي ومال الديمقراطية والملكية الدستورية غايتو القروش أنا شايلاها شايلاها لكين تعالن هنا شهر عشرة الجاية ده الصندوق حيكون قبضسة منو فيكن؟ فقالت السرة وهي ترمقها بمكر: " يعني إنتي ما عارفة يا أمون شهر عشرة حقتي ومستعدة أتنازل ليكي منو لكين قدام الحريم ديل بشرط واحد والأولو شرط آخرو نور فقالت لها أمونة : بلا نور بلا مهند،،، أشرطي يا أختي عافك إنتهازية من صغرك " فقالت السرة: " تديني توبك الجديد الخطير ده الإسمو توب الربيع العربي " فقالت أمونة: " بس كدة غالية يا بت أمي والطلب الرخيص وأكان دايرة توب بو عزيزي الجابو لي أبو هيثم أمبارح القريب ده برضو موافقة " فقالت السرة:بري يا يمة،،، لا لا بلاش توب بو عزيزي ده عشان كمان ما يعمل لينا حريقة " ها يا أمونة سهيتي ولهيتي مالك؟؟ جبنتك بردت تب،،، أشربيها ولامن يجي شهر عشرة ربنا كريم http://www.sudanyat.org/upload/uploads/fhyfh.jpg |
المشهد الأول في البيت
إنهمكت أمونة في تقطيع نبات الرجلة في المطبخ لإعداد وجبة الغداء وهي تخاطب نفسها: " أنا الرجلة دي بحبها موت،،، بس لو ما شغلها الكتير والمقرف ده، أحي أنا،،، ووب علي ضهري قرب يتقطع حتة حتة وأنا شغالة في التقطيع من صباح الرحمن ولسع قدامي عواسة الكسرة" وفجأة رن موبايلها الموضوع فوق الطاولة في الصالة فأخذت تنادي ميسرة بصوت عال: " ميسرة حبيب قساي ،، عليك الله أجري جيب لي الموبايل الما داير يسكت ده قوام،،، دي أكيد رقية صحبتي عارفها جنها نضم في التلفون" ولكن المتصلة لم تكن صديقتها رقية كما توقعت بل كانت جارتها نفيسة بت الحاج التي قالت لها: " بختك يا إنتي عارفاك كنتي في سابع نوم،، أريتو كان حالي" فقالت أمونة وهي تلم الرجلة في صحن كبير: " نوم شنو يا مجنونة إنتي عاد النوم ما عندكم،، وأعقبت تقول: " نوم عيني البقى لي سهر،،، يا أختي النوم جافاني وقسمتو لي جارني،،، أنا شقية الحال،،، شغالة قطيع في الرجلة لامن إيديني ورمن ورم" ثم أردفت تقول: " يا ولية يا فاضية إنتي متصلة بي مالك؟ الشوق شاقاكي ولا شنو،،، ما شايفاكي أمبارح بالليل،، فقالت نفيسة وهي ميتة من الضحك: المفروض تحمدي ربك لمان يشتاقوا ليكي يا مرة يا سليطة اللسان،،،، أنا بس كنت عايزة أسوقك الليلة في المغربية عشان نمشي نزور ست النساء في المستشفى قالوا بعيد عنك وعن السامعين عملت عملية مرارة ربنا يشفيها المسكينة الغلبانة دي" فقالت أمونة: الزولة دي يا كاف البلاء أتقول من آكلة اللحوم يومي على الله تقعد تسفسف في اللحوم ذي الوحوش البرية،،، آخر مرة أنا حذرتها عشان تخفف من الدهون واللحوم وقلت ليها أنا خايفة يجيكي مرض الملوك" فقالت نفيسة وهي مستغرقة في الضحك: " إنتي يا أختي الملوك ديل كمان عندهم مرض براهم؟ حتى المرض بقى فوقه خيار وفقوس" فقالت أمونة: " يا مرة يا جاهلة خيار شنو وبطيخ شنو؟ ده مرض النقرس سموه كدة عشان الملوك زمان ما كانوا يأكلوا إلا الزفر" ثم واصلت في الحديث: " إنتي ما شفتيها عملت ليها كريشة أنا قلت ليها مرة يا ست النساء إنتي ما قاعدة تمشي الجم عشان تخففي ووزنك ؟ قامت خففت دمها بدل ما تخفف وزنها وقالت لي: " بري ،،، جم منو يا إنتي؟ جم كارتر؟ قمت قلت ليها: جم كارتر اللي يكسر رأسك إن شاء الله" فقاطعتها نفيسة بقولها: " أجي" فقالت أمونة: " لا ما تجي إنتي بجي أنا المصاحبة جنس الحريم ديل" ثم أعقبت قائلة: غايتو الله يكون في عونها ويشفيها يا رب،، إنتي يا نفيسة دي يودوا ليها شنو كمان والله أنا ما عارفة ومتحيرة أنا بستلتي لسع عند بخيتة جارتي شالتها وما رجعتها" فقالت نفيسة: " شفتي الرجلة اللي شاغلك دي من صباح الرحمن؟ بس أغرف ليها حتة،، حتجيها جيهة وهي ذاتها بتحب الرجلة" ثم أنهت أمونة المكالمة قائلة: " يا الله ودعتك الله نتلاقى في المستشفى في المغرب عشان الرجلة دي قربت تنشف مع السلامة" المشهد الثاني في عنبر المستشفى دخلت أمونة المستشفى وأخذت تصافح ست النساء قائلة: " سلامتك يا بت أمي وكلنا كرامتك ألف ألف لا بأس عاملة كيف بقيتي كويسة إنشاء الله" فقالت ست النساء وهي تحاول الإستعدال في جلستها بصعوبة بالغة: " إن شاء الله يسلمك يا أمونة حبيبتي يا أختى المؤمن مصاب حسع قبل شوية الدكتورة جات شالت السلك" فقالت أمونة مخاطبة نفيسة: " ووب علي يا نفيسة سلك شنو؟ يعني العملية دي ليها يومين تلاتة مالك ما كلمتيني من أول يوم" فقالت نفيسة: يعني حيكون سلك شنو؟ السلك الدبلوماسي؟ أنا ذاتي كلمتني حياة أمبارح بالليل" ثم أخذت أمونة تتفحص السرير في العنبر وما حول السرير ثم قالت: " إنتو يا جماعة الخير المستشفى ده ما فوقه فراشات العنبر مالو وسخ كدة؟ ثم أقبلت إحدى الفراشات فنادتها أمونة وقالت لها زاجرة: إنتي يا فراشة هييي،،، تعالي هنا ،،، مالك ما شايفة شغلك؟ فقالت لها الفراشة: " أول حاجة كلميني ذي الناس أنا ما شغالة عندك،، تاني حاجة منو القالت ليكي أنا إسمي فراشة؟ وقبل أن ترد أمونة قالت لها نفيسة: " أجي يا أخواتي،،، طيب ينادوكي شنو يا إنتي؟ أخصائية؟ ثم قالت أمونة وهي تخاطب الفراشة: لا صحي ينادوكي شنو يا متفلهمة إنتي؟ وزيرة الصحة؟ فقالت الفراشة: أنا هنا موظفة تنظيف وترتيب الغرف يعني هاوس كييبر فهمتن يا هوانم؟ فقالت أمونة متهكمة: " لا بالله والله عجبتيني يا إنتي" ثم أخذت نفيسة تردد: " البنسلين يا تمرجي نادوا الحكيم يا تمرجي سيب الهظار يا تمرجي البنج حار يا تمرجي دكتور لؤي يا تمرجي ما حاسي بي يا تمرجي دكتور صلاح يا تمرجي ضرب السلاح يا تمرجي تاح تاح ترح يا تمرجي http://www.alhadag.com/photos/93761.jpg |
| الساعة الآن 01:19 AM. |
Powered by vBulletin® Version 3.8.8 Beta 2
Copyright ©2000 - 2026, vBulletin Solutions, Inc.