حبيبنا زول الله
العذر والسموحة ياخي لاني ما شفت مداخلتك دي إلا اسي
أها ياخ ما قلت لي شنو البخلي اللون الأبيض أحلى وأجمل من اللون الأسود؟!
أتراها فلسفة الأشياء التي ذهب إليها الفيتوري
وإنه أحساسنا اتجاه الاشياء هو الذي يهب الشيء معنى
يعني شنو اللون الأبيض لون اللبن؟!
طيب ما أهو اللون الأسود لون العسل
ويعني شنو اللون الأبيض لون النهار والوضوح وتلك الفلسفات التي تعتمد على احساسنا اتجاه الاشياء
قلت لي أنظر صورة بابكر
أضحك الله سنك ياخ
---
يا بابكر ما أظن إنه القصة قصة آخر مستعبدين
القصة كلها بتعتمد علي إرادة الحياة (بتتذكرها)
أها الحياة دي من ضمن اجندة ارادتها إننا يكون مكتوب علينا الدونية
وكدي اديك نظرتي لنظرة البيض لنا بدونية لأن لوننا أسود
يا عزيزي المشكلة ما في نظرة الأبيض
المشكلة فينا نحن كمتلقيين لنظرة الأبيض
احتقار الابيض لنا لا تسوي شيئاً بقدر احتقارنا أو تعظيمنا لانفسنا
يعني بالظبط كدة روحك هي البتديك هيبة أو دونية على حسب روحك
وكدي أتامل معاي اللون الأسود للممثلي ولاعبي ونجوم امريكا
ياخي لونهم الاسود صلاة النبي فوقو
خلا باقي الخواجات يصاقروا الشمس يومهم كلو بس عشان يسمروا لونهم الزي لحم السمك
أها أنت تعارف ليييه اللون الاسود للامريكان دا طلع حلو.... لأنه جمال روحهم انعكست علي اللون دا
يبقى يا عزيزي المسألة كلها بتعتمد علي نظرتك لي نفسك
وفي النهاية بترجع لأهل السلطة والعزوة والمقدرة
فلذلك تجد أن أفريقيا حرمت من السلطة والعزوة والمقدرة منذ الخليقة
لكن في المستقبل ح تكون القارة الوحيدة صاحبة السلطة على العالم كلو
وساعتها بس بكون اللون الأسود هو أجمل الألوان وافضلها ... واطفال البيض يتسألون لماذا خلوقوا بهذا اللون البغيض ، ولماذا شعرهم سبيبي مثل شعر الحصان ...
ودي كلها ح تصنعها إرادة الحياة
واقرب دليل هو عملية ارتفاع درجات حرارة الأرض
اللون الاسود هو لون متحمل لدرجات الحرارة
|
